بۇگىنىمە باقىتتىمىن

- مەن تابىستى بولام دەپ تىراشتانىپ كورمەدىم. وعان ۇمتىلمادىم دا. ءوز ءىسىڭدى جاقسى, بەرىلىپ ساپالى جاساساڭ, تابىس ءوزى كەلەدى. سوندا سەنى بايقايدى, شاقىرادى, - دەپ ويىمەن ءبولىستى قازاقستان رەسپۋبليكاسىنىڭ حالىق ءارتىسى, ارىپتەستەرىنە دە سۇيكىمدى اكتريسا 90-جىلدارداعى توقىراۋ كەزەڭىندە دە سۇرانىسقا يە بولدى, تالاي كينوعا ءتۇستى. ءبىر كينوعا تۇسكەننەن سوڭ جۇلدىز اۋرۋىمەن «اۋىرىپ قالاتىن» تالاي جاستاردى كورىپ ءجۇرمىز. ايانىشتىسى, ولاردىڭ ءوزىن ناعىز جۇلدىز سانايتىندىعىندا. گۇلنار ابدوللاقىزىنىڭ پىكىرىنشە, ساپالى ءارى كاسىبي كينوعا ءتۇسۋ وتە قيىن. ول كەزدەسۋلەردە جاستارعا قانداي بولسا دا جۇمىسقا ءۇستىرت قاراماۋ مەن ىسكە ادالدىق تۋرالى جانە جۇلدىز اۋرۋىمەن اۋىرعان ادام سىرت كوزگە كۇلكىنىشتى كورىنەتىنىن ايتىپ كەلەدى. گۇلناردى كينونىڭ ءوزى تاپتى. نەبارى 12 جاسىندا پيونەر لاگەرىندە جۇرگەن جەرىنەن رەجيسسەر ا.قارساقباەۆ ىزدەپ تاۋىپ, سىناپ, «باندىنى قۋعان حاميت» فيلمىنە ايگەرىمنىڭ ءرولىن ويناۋعا الدى. كوپ ۇزاماي, 1982 جىلى ونى تەلەۆيدەنيە ديكتورلىققا شاقىردى. وسى كەزدەن باستاپ ول كوپتەگەن ءتۇرلى جوبالارعا قاتىستى. تۋمىسىنان قابىلەتتى قىز ارنايى وقۋ ورنىن بىتىرمەي-اق ش.ايمانوۆ اتىنداعى «قازاقفيلم» كينوستۋدياسى اكتريسا رەتىندە قىزمەتكە قابىلدادى. مەكتەپتى التىن مەدالمەن بىتىرگەن جاس تۇلەك 1989 جىلى قازىرگى ءال-فارابي اتىنداعى قازمۋ-ءدىڭ فيلولوگيا فاكۋلتەتىن ءبىتىردى. دەگەنمەن ءتۋابىتتى دارىندى قىز ءوزىن كينو الەمىنەن تاپتى دا, بۇل سالاعا ءبىرجولا بەتبۇردى. گ.دوسماتوۆا وتىزعا جۋىق فيلمدەرگە ءتۇسىپ ءبىر-بىرىنە ۇقسامايتىن رولدەردى شەبەر وينادى. 1984 جىلى «چەلوۆيچەسكي فاكتور» فيلمىندەگى ءرولى ءۇشىن XVIII-بۇكىلوداقتىق كينوفەستيۆالدە ەڭ ۇزدىك ايەل ءرولىن سومداۋشى رەتىندە تاڭدالدى (مينسك). بۇدان كەيىنگى كەزەڭدە ونى «بەگۋششايا ميشەن» (1991), «سون ۆو سنە» (1992), «كارديوگرامما» (1995) جانە دە جولداسى حۋات احمەتوۆتىڭ رەجيسسەرلىگىمەن تۇسىرىلگەن «چەلوۆەك ۆەتەر» (2007) فيلمدەرى تابىسقا جەتكىزدى. ول 2000 جىلى ۇزدىك اكتريسا نوميناتسياسىنا يە بولدى. «بۇل كۇردەلى ماماندىقتا ورنىقتى, تاباندى مىنەز قاجەت. بۇل ونەر ساتسىزدىكتەرگە قارسى توتەپ بەرە الاتىن رۋحتى تالاپ ەتەدى. ويتكەنى, بۇگىن اتاقتى, ايگىلى بوپ, ال ەرتەڭ ءبارى سەنى ۇمىتىپ, شاقىرىلماي, ەسكەرىلمەي جاتۋىڭ دا مۇمكىن. وسىنىسىمەن ەشكىمدى ايامايتىن ونەر. بۇل جولمەن جۇرە الماعان ادامدار بار. سوندىقتان دا بۇگىنىمە باقىتتىمىن» - دەگەن ويىن ءبىلدىردى اكتريسا. تاجىريبەلى شەبەردىڭ وسى ماماندىققا بارعىسى كەلەتىن جاستارعا ايتپاعى بار. ول – «كينوسىز ءومىر سۇرە المايمىن» دەگەن سەزىم بولسا عانا اكتەر, اكتريسا بولۋعا بەلىڭدى بۋ, ويتپەسەڭ جاستىق شاعىڭدى بوسقا وتكىزىپ, ءومىرىڭدى قور قىلاسىڭ دەگەن اقىلى. ودان دا باسقا ءبىر سالانى تاڭداپ, ءاپ-اسەم ءومىر سۇرۋگە بولادى. كينو, اكتەرلىق بۇل ورتانقولداردىڭ اينالىساتىن كاسىبى ەمەس دەپ قارايتىن گۇلنار بدولللاقىزى كينوعا تۇسكەندە اتاق, اقشا, تابىسقا جەتۋدى ماقسات تۇتقان ەمەس. ول بويىڭدا جارىپ تۇرعان تالانتىڭ بولسا عانا كينوعا كەل دەگەن ۇستانىمدا ءومىر ءسۇرىپ كەلەدى. ءيا, اكتريسانىڭ وسى ۇستانىمى مىنا وقيعادان دا ايقىن كورىندى. قىزى ايشا ورازباەۆا يتاليادا, سونان سوڭ لوندوندا جوعارى ءبىلىم العان سكريپكاشى. ول حالىقارالىق ستيپەنديالار يەگەرى ءارى ەۋروپاداعى كوپتەگەن وركەسترلەردىڭ كونتسەرتمەيستەرى. وتانىمىزدا سۇلۋ قىزدى 15 جاسىنان باستاپ كينوعا تۇسىرۋگە ءبىراز ۇسىنىستار بولدى. رەجيسسەر د.ومىرباەۆ تا «شۇعاعا» تۇسىرمەك بولدى. ايشا دا بۇعان قىزىقتى. بىراق اناسى ءۇزىلدى-كەسىلدى قارسى بولدى. كىم بىلەدى, ءجاسوسپىرىمنىڭ كوزقاراسى وزگەرىپ كەتسە... دارىندى مۋزىكانتتىڭ الدا وقۋى بار, ماقساتى بار, ءوز تاڭداعان جولى بار عوي دەگەن ويمەن شىر-پىر بولىپ, رۇقسات بەرمەدى. گۇلنار ورتانقول اكتريسا شىققانىنان گورى دارىندى سكريپكاشى, كومپوزيتوردىڭ جولىن ءجون كوردى. «ءبىزدى ولتىرمەگەننىڭ ءبارى ءبىزدى مىقتى قىلادى» دەگەن ءسوز بار عوي, مەن ونەر جولىندا اسا قيىندىقتاردى كەزدەستىرگەم جوق. بىراق بارلىق بۇلتارىس پەن ساتسىزدىكتەرگە ىلعي ىشتەي دايىن بولعاندىقتان ولاردان ساباق الىپ, قاتايا تۇسەم», - دەيدى ول. ونى كوپ ويلاندىراتىنى – كوپ رەجيسسەردىڭ ومىرلىك تۇيگەنى بار, ايتارى بار, جان دۇنيەسى كەمەلدەنگەن ورتا جاستاعى ايەل وبرازىن ەمەس, جالىندى جاستاردىڭ ءومىرى مەن سەزىمىن تۇسىرۋگە اۋەستىگى. بۇنى ويلاي وتىرىپ كەيدە ءوزى رەجيسسەر بوپ كەتكىسى كەلەدى. گۇلناردىڭ ارمانى الەمدىك كلاسسيكادان ايەل ءرولىن سومداۋ. كۇردەلى دە پسيحولوگيزمگە قۇرىلعان جاقسى دراماتۋرگيانى ىزدەيدى, ءالى دە كۇتەدى. قاشان مەنى ويلاعانىمداي رولگە شاقىرادى دەپ كۇتىپ وتىرا بەرۋگە تاعى بولمايدى, سوندىقتان دا ىلعي ىزدەنىس پەن قوزعالىس ۇستىندە. ءان سالۋ, بي بيلەۋ, اكتريسالىق, تەلەجۇرگىزۋشىلىك – مۇنىڭ ءبارى ءبىر-بىرىنە تۋىس ونەر دەپ تۇسىنەتىن اكتريسا بويىنداعى جان-جاقتى قىرىن وسى سالالاردا اشا ءبىلدى. گ.دوسماتوۆا قىرىق جىلعا جۋىق ۋاقىتتان بەرى قازاق كينوسىنىڭ دامۋىنا بويىنداعى تالانتىمەن اتسالىسىپ كەلە جاتقان اكتريسا. بۇگىندە مول تاجىريبە جيناعان شىنايى شەبەردىڭ ءالى دە ونەر جولىندا كورسەتەرى كوپ, بەرەرى مول. باقىت جولدىبايقىزى