ايدىڭ سوڭىندا اياز كۇشەيەدى

ەلىمىزدە جەلتوقساننىڭ ءۇشىنشى ون كۇندىگىندە مينۋس 38-گە دەيىن اياز ءتۇسۋى مۇمكىن دەپ بولجايدى سينوپتيكتەر. قازگيدرومەتتىڭ جەلتوقسان ايىنا جاساعان بولجامىنا سايكەس وسى ايداعى اۋانىڭ ورتاشا تەمپەراتۋراسى باتىس قازاقستان, سولتۇستىك قازاقستان, اقمولا, پاۆلودار, اقتوبە مەن قوستاناي وبلىستارىنىڭ كوپ بولىگىندە نورمادان 1 °س تومەن, رەسپۋبليكانىڭ قالعان اۋماعىندا - نورماعا جۋىق بولادى دەپ كۇتىلۋدە. جاۋىن-شاشىننىڭ ايلىق مولشەرى: اتىراۋ, ماڭعىستاۋ, قىزىلوردا وبلىسىنىڭ كەي جەرلەرىندە - نورمادان تومەن; باتىس قازاقستان, سولتۇستىك قازاقستان, اقمولا, پاۆلودار, اقتوبە مەن قوستاناي وبلىستارىنىڭ كوپ بولىگىندە, شىعىس قازاقستان, الماتى, جامبىل, وڭتۇستىك قازاقستان وبلىستارىنىڭ تاۋلى جانە تاۋ بوكتەرى اۋداندارىندا - نورمادان جوعارى; قالعان اۋماقتا - نورماعا جۋىق بولادى. «جەلتوقسانداعى قۇبىلمالى اۋا-رايى بەلسەندى تسيكلونداردىڭ ءجيى وتۋىمەن جانە ولارعا قاتىستى بولاتىن اتموسفەرالىق فرونتتارمەن بايلانىستى بولىپ, ەلىمىزدىڭ سولتۇستىك جارتىسىندا قار جاۋىپ, جەل كۇشەيىپ, بۇرقاسىن تۇرادى, وڭتۇستىك جارتىسىندا تۇمان باسىپ, كوكتايعاق قۇبىلىستارى ورىن الادى. ال جەلتوقساننىڭ 5-8, 10, 13-16 كەزەڭىندەگى سۋىق انتيتسيكلوننىڭ تارالۋىمەن - اشىق بىرقالىپتى ايازدى اۋا-رايى كۇتىلەدى», دەلىنگەن حابارلامادا. كۇنىلگەرگى بولجام بويىنشا تاۋەلسىزدىك كۇنى مەرەكەسىندە اۋا تەمپەراتۋراسىنىڭ ەداۋىر تومەندەۋى كۇتىلۋدە, سول كەزدە تەرمومەتر باعانى: باتىستا 13-14 جەلتوقساندا تۇندە 23...28-گە دەيىن, كۇندىز 17...22-گە دەيىن ايازدى; ەلىمىزدىڭ سولتۇستىگىندە, ورتالىعىندا جانە شىعىسىندا 14-16 جەلتوقساندا تۇندە 25...33-كە دەيىن, كۇندىز 20...25-كە دەيىن ايازدى; وڭتۇستىك پەن وڭتۇستىك-شىعىستا 15-16 جەلتوقساندا تۇندە 13...20 دەيىن, كۇندىز 8...13-كە دەيىن سۋىتادى. «ۇزاق مەرزىمدى بولجامعا سايكەس ايدىڭ ءۇشىنشى ون كۇندىگىندە اۋا تەمپەراتۋراسىنىڭ تومەندەۋى: سولتۇستىك جارتىسىندا تۇندە 30...38-گە دەيىن اياز, كۇندىز 23...28-گە دەيىن اياز; وڭتۇستىك جارتىسىندا تۇندە 20...25-گە دەيىن اياز, كۇندىز 13...18-گە دەيىن اياز كۇتىلۋدە», دەپ حابارلادى «قازگيدرومەت» رمك-ءى.