سالاماتتىلىق سايىسى

ەلىمىزدىڭ بولاشاعى, دامۋى, وركەندەۋى وتباسىنىڭ بەرەكەسى مەن بىرلىگىنە تىكەلەي بايلانىستى. اسپانىندا بەيبىت كۇنى جارقىراعان وتانىمىزدىڭ تىرەگى – باقىتتى وتباسى. وتباسى – بەرەكە-بىرلىكتىڭ قاينار كوزى. تەگىندە, ءار وتباسىنىڭ ايرانداي ۇيىعان تاتۋلىعى, بىلە-بىلسەك, ءبىزدى ەل ەتىپ, ەلدىك سانانى قالىپتاستىرىپ وتىر. مىنە, قازاقستان رەسپۋبليكاسى تاۋەل­سىزدىگىنىڭ 25 جىلدىعىنا وراي « ۇلى دالا ەلى – تاۋەلسىزدىكتىڭ 25 نەگىزى: جۇلدىزدى 25 كۇن» اياسىندا «تاراز ارەنا» سپورت سارايىندا وتكەن «وتباسى – باقىت مەكەنى» اتتى سپورت سايى­سى شاڭىراق شاتتىعىن ناسيحاتتاپ, قاتىسۋ­شىلاردىڭ رۋحىن كوتەرىپ, جىگەر­لەندىرىپ تاستادى. جارىسقا 12 وتبا­سى­لىق كوماندادان تۇراتىن 36 ادام قاتى­س­تى. ياعني, وتاعاسى, اناسى جانە 12 جاسقا دەيىنگى بالاسى سپورتتىڭ جۇگىرۋ, ەستافەتا, سەكىرۋ, ارقان تارتۋ جانە تاعى دا باسقا تۇرلەرىنەن ءوز باقتارىن سىنادى. شىن مانىندە, سپورتتان كەلەر پايدا ەڭ الدىمەن دەنساۋلىقتىڭ مىقتى بولۋى ەمەس پە؟ سوڭعى جىلدارى ەلىمىزدە دەنە شىنىقتىرۋ مەن سپورتقا, ونىڭ بۇقارالىق سيپاتتا دامۋىنا ايرىقشا كوڭىل اۋدارى­لىپ كەلەدى. بۇل سالاداعى ەڭ باستى ماقسات – جەرگىلىكتى تۇرعىنداردىڭ, ونىڭ ىشىندە جاستاردىڭ سالاماتتى ءومىر سالتىن ۇستا­نۋ ارقىلى دەنساۋلىعىن ساقتاۋعا ىق­پال ەتۋ جانە سپورت نىساندارىنىڭ قولجەتىم­دىلى­گىن ارتتىرۋ. ويتكەنى, سپورتى بيىك ەلدىڭ رۋحى بەرىك. وسكەلەڭ ۇرپاق تا الدىڭعى تولقىنعا قاراپ بوي تۇزەيدى. بۇل ورايدا «وتباسى – باقىت مەكەنى» سايىسىنىڭ جاس ۇرپاققا بەرەر ءتالىمى مول بولدى. جارىس سوڭىندا جەڭىمپاز كوماندالار تاراز قالالىق دەنە شىنىقتىرۋ جانە سپورت ءبولىمىنىڭ ديپلومدارىمەن, كۋبوك جانە ەستەلىك سىيلىقتارىمەن ماراپات­تالدى. ورالحان ءداۋىت, «ەگەمەن قازاقستان»  جامبىل وبلىسى سۋرەتتى تۇسىرگەن اقادىل رىسماحان