«تاۋەلسىز قازاقستان» پويىزى – تارازدا

ەلىمىزدىڭ الىس تۇكپىرلەرىندەگى بەكەتتەرگە ايالداپ, وڭىرلەردىڭ ەكونوميكالىق احۋالىمەن, حالىقتىڭ الەۋمەتتىك جاعدايىمەن تانىسىپ, ولارعا دارىگەرلىك, كاسىپكەرلىك, الەۋمەتتىك, قۇقىقتىق, اۋىلشارۋاشىلىق ماسەلەلەرى بويىنشا قابىلداۋ وتكىزىپ, ساۋالدارىنا جاۋاپ قايتارىپ, كەڭەس بەرۋ ءۇشىن جولعا شىققان «تاۋەلسىز قازاقستان» پويىزى تاراز قالاسىنا كەلگەن ەدى. كونە قالاعا بۇل پويىز ءتۇننىڭ ءبىر ۋاعىندا كەلىپ توقتاسا دا, كەرۋەندى قارسى الۋشىلاردىڭ قاراسى مول بولدى. – تاريحى تەرەڭنەن باستاۋ الا­تىن ءبىزدىڭ قالامىزعا الىس­تان كەل­گەن­دەرىڭىزگە شەكسىز العىسى­مىزدى ءبىل­دىرەمىز, – دەدى سالتانات­تى قارسى الۋ شارا­سىندا تاراز قا­لاسىنىڭ اكىمى نۇر­جان كالەن­دەروۆ. – ۇلى جىبەك جولىندا ور­نا­لاس­قان حالىقارالىق ساۋدا, عىلىم مەن رۋحاني دۇنيەنىڭ اسا ماڭىزدى ورتا­لىقتارىنىڭ ءبىرى بولعان كونە تاراز قا­لاسىنىڭ تۇرعىندارى بۇل پويىز­دى اسىعا كۇتتى دەسەك, ار­تىق ايتقان­دىق ەمەس. لايىم, ەل ءتاۋ­ەلسىزدى­گىنىڭ 25 جىل­دىعى اياسىندا قولعا الىن­عان بۇل ءىس-شارانىڭ حا­لىققا تيگىزەر پايداسى مول بولسىن. پويىز شتا­بى­­نىڭ جەتەكشىسى, پرو­فەس­سور ءامىر­جان الپەيىسوۆ بۇل شا­را­­­نىڭ باستى ماقساتى – قازاقستان رەس­پۋب­ليكاسىنىڭ تۇڭعىش پرەزيدەنتى نۇرسۇلتان نازارباەۆتىڭ باسشىلى­عىمەن ءوز دامۋ جولىن تاپقان قازاق­ستان­نىڭ تابىستارىن پاش ەتۋ, «ماڭگىلىك ەل» يدەياسىن جان-جاقتى ءتۇسىندىرۋ, وسكە­­لەڭ ۇرپاقتى وتانسۇيگىشتىك, ىزگىلىك قاسيەت­تەرگە تاربيەلەۋ, ءتۇرلى ءما­دەني شارالار شەڭبەرىندە مادەني قازى­نا­لارىمىزدى دارىپتەۋ, سونىمەن قاتار, دارىگەرلىك, الەۋمەتتىك مۇقتاجدىقتاردى شەشۋگە كومەكتەسۋ ەكەنىن باسا ايتتى. ءسويتىپ, كەشە كۇنى بويى پويىز مۇشەلەرى بىرنەشە جەردە قالا تۇرعىن­دارىمەن كەزدەسىپ, بيزنەس, كاسىپكەرلىك, اۋىل شارۋاشىلىعى, تۇتىنۋشىلاردىڭ قۇقىقتارىن قورعاۋ, ءبىلىم بەرۋ ماسە­لە­لەرى بويىنشا كەڭەستەر بەرسە, تاعى ءبىر توپتار جەرگىلىكتى حالىققا ءتۇرلى كومەك­تەر كورسەتتى. تاراز قالاسىنىڭ تۇرعىنى ەليزاۆەتا ورىنباەۆانىڭ ءبىر بالاسى اۋعان سو­عىسىندا وپات بولىپتى. ال ءبىر بالاسى قازىر شۋ قالاسىندا تۇرادى. بىراق قارت اناسىنا قامقور بولماق تۇگىلى, مۇلدەم حابارلاسپايدى دا ەكەن. كەيۋانا بۇگىندە وتباسىلىق جاتاقحانادا جالعىز ءوزى كۇن كەشۋدە. سوندىقتان «نۇر وتان» پارتياسى جامبىل وبلىستىق فيليالىندا وتكەن قابىلداۋعا كەلگەن ە. ورىنباەۆانى قارتتار ۇيىنە ورنالاس­تىرۋدى سۇرايدى. الەۋمەتتىك قورعاۋ سالاسىنىڭ ماماندارى قارتتار ۇيىنە ورنالاسۋدىڭ ءوز ءتارتىبى بار ەكەنىن ايتا كەلە, بىراق بۇل ماسەلەنى جاقىن ۋاقىتتا شەشىپ بەرۋگە ۋادە بەردى. ال تاراز قالاسىنىڭ تاعى ءبىر تۇر­عىنى ەلەنا بۋگاەۆانىڭ بيىلعى جىل­دىڭ 3-4 قاراشاسىندا بولعان جوي­قىن داۋىلدان ءۇيىنىڭ شاتىرى ۇشىپ كەتىپتى. سونى جوندەپ, قالپىنا كەلتى­رۋدى وتىنەدى. تاراز قالاسى اكىمىنىڭ ورىن­باسارى جاقسىلىق ساپاراليەۆ بۇل ءما­سەلەدەن حاباردار ەكەن. ءدال قازىر داۋىل­دان زارداپ شەككەن ۇيگە كەلگەن شىعىن قۇنى ەسەپتەلىپ, جوندەۋگە قارجى قاراستىرىلىپتى. ەندى ءبىر اپتانىڭ كولەمىندە مەردىگەر كومپانيا ءۇيدى جوندەپ بەرەتىن بولادى. سونداي-اق, وزبەكستاننان كوشىپ كەلگەن زەينەتكەر جاننات مۇساەۆا جەكە باسىن كۋالاندىراتىن قۇجاتتاردى جوعالتىپ العاندىقتان, قازاقستان رەسپۋبليكاسى ازاماتتىعىن راستايتىن جەكە كۋالىككە قولى جەتپەي ءجۇر. بۇل ماسەلە بويىنشا كوشى-قون پوليتسياسى جانە ادىلەت باسقارماسى, زەينەتاقى تولەۋ ورتالىعىنىڭ ماماندارى ءوز ويلارىن ورتاعا سالىپ, قارياعا زاڭ بويىنشا جاڭا قۇجات جاساپ بەرۋدىڭ جولدارى بار ەكەنىن ايتتى. ءتىپتى, جاقىن كۇندەردە بۇل ماسەلەنى شەشۋدى تاراز قالالىق ادىلەت باسقارماسىنىڭ ماماندارى ءوز مويىندارىنا الدى. ءدال وسىلايشا مەحري يشانحانوۆا, ەلميرا مومىنوۆا جانە باسقا دا ازاماتتارعا ماسەلەلەرى بويىنشا تۇشىم­دى جاۋاپتار بەرىلدى. مەملەكەت باسشىسىنىڭ تاپسىر­ما­سىمەن تاۋەلسىزدىكتىڭ شيرەك عاسىرلىق مەرەكەسىنە وراي ۇيىمداستىرىلعان بۇل ءىس-شارادا دارىگەرلەر قالالىق ەمحانالاردا قابىلداۋ جۇرگىزدى, كوپ­بالالى انالارعا كومەك كورسەتتى. ورالحان ءداۋىت, «ەگەمەن قازاقستان» جامبىل وبلىسى