قازاقستان 2017 جىلى قاي ەلدەرگە استىق-ەت ەكسپورتتايدى؟

اۋىل شارۋاشىلىعى مينيسترلىگى 2017 جىلى وتاندىق ەت پەن استىقتىڭ قانداي مەملەكەتتەرگە ەكسپورتتالاتىنىن جاريا ەتتى, دەپ xابارلايدى قازاقپارات. «ءبىز 2021 جىلعا دەيىن سيىر ەتى كولەمىن ارتتىرا وتىرىپ, كەلەسى جىلى ەاەو ەلدەرىنە - 30 مىڭ توننا, قىتايعا - 40 مىڭ توننا ىرىقارا ەتىن باعىتتاماقپىز. استىق سىندى سۇرانىسى جوعارى تاۋارلاردى ەاەو ەلدەرىنە - 479 مىڭ توننا, تمد مەملەكەتتەرىنە - 2,5 ملن. توننا, قىتايعا - 1 ميلليون توننا, اۋعانستانعا - 86 مىڭ توننا, يرانعا - 900 مىڭ توننا جانە وزگە دە ەلدەرگە - 370 مىڭ توننا ەكسپورتتالادى دەپ كۇتىلۋدە», – دەدى ورتالىق كوممۋنيكاتسيالار قىزمەتىندە وتكەن برەفينگتە اۋىل شارۋاشىلىعى ۆيتسە-ءمينيسترى گۇلميرا يساەۆا. بۇنىڭ الدىندا xابارلاعانىمىزداي, قازاقستاندا اگروونەركاسىپتىك كەشەننىڭ ەكسپورتتاۋ ورتالىعى قۇرىلادى. ورتالىقتىڭ مىندەتىنە اۋىل شارۋاشىلىعى تاۋارلارىن وندىرۋشىلەردى سەرۆيستىك جانە قارجىلىق قولداۋ مەن ولارعا ارنالعان ەكسپورتتىق ارنالار ەنەتىن بولادى. ورتالىق ساتىپ الۋشىلاردى ىزدەۋ, ءونىمدى جەتكىزۋ بويىنشا ساۋدا جەلىلەرىمەن كەلىسىمشارت جاساۋمەن اينالىسادى. بۇدان باسقا, ورتالىق ەكسپورتتىق ارنالار اشۋ ماقساتىندا تاۋارلار توپتاماسىن قالىپتاستىرۋ ءۇشىن ءونىمدى ساتىپ الۋدى جۇزەگە اسىرۋى مۇمكىن. سونداي-اق, مەملەكەتتىك باعدارلاما اياسىندا ەكسپورتتاۋ ورتالىعى ساۋدالىق قارجىلاندىرۋ, ەكسپورتتىق كەلىسىمشارتتاردى ساقتاندىرۋ, ىلگەرىلەتۋ مەن لوگيستيكاعا ارنالعان ەكسپورتتىق گرانتتاردى ۇسىناتىن بولادى.