التىنسارين كەسەنەسى قايتا سالىنادى

ىبىراي ءالتىنساريننىڭ تۋعانىنا 175 جىل تولۋىنا وراي ونىڭ قوستاناي قالاسىنىڭ ىرگەسىندەگى كەسەنەسى قايتا سالىناتىن بولادى. بۇل جونىندە وبلىس اكىمى ارحيمەد مۇحامبەتوۆ ستۋدەنت جاستارمەن كەزدەسۋىندە مالىمدەدى. كەمەڭگەر اعارتۋشىنىڭ وبلىستا بىرنەشە شاعىن بيۋستەرى بار, بىراق ەڭسەلى ەسكەرتكىشى وبلىس تۇگەل رەسپۋبليكا كولەمىندە جوق. بىراق ارحيمەد بەگەنجا ۇلىنىڭ ايتۋىنشا, قازىر اعارتۋشىنىڭ ەسكەرتكىشىنەن بۇرىن وبلىستاعى كەسەنەسى مەن مەموريالدىق مۋزەيى جاڭعىرتۋ, جوندەۋ جۇمىستارىن قاجەت ەتىپ تۇر. سوندىقتان بيۋدجەتتەن بولىنەتىن قارجىعا ءبىرىنشى ورىندا وسى جۇمىستاردى اتقارۋ ءتيىمدى دەپ ەسەپتەلىپ, ىبىرايدىڭ كەسەنەسىن قايتا سالۋ كەرەك دەپ شەشىلدى. ويتكەنى  1992 جىلى سالىنعان كەسەنە توزعان. سول اۋماقتى – كەشەندى تولىق  جاڭعىرتۋ كەرەك. قازىر ىبىراي سۇيەگى جاتقان قوستاناي اۋدانىنىڭ اكىمى قايرات احمەتوۆ كەسەنەنىڭ جوباسىن سىزاتىن ارحيتەكتورلارمەن جۇمىس جۇرگىزۋدە, كەلەر جىلى ونىڭ سمەتالىق قۇجاتتارى جاسالادى. ەگەر قۇجاتتار تەگىس دايىن بولسا قۇرىلىس كەلەر جىلى سالىنادى, ۇلگەرمەسە ونى 2018 جىلى بىتىرەتىن بولادى. وبلىس اكىمى  ەسكەرتكىش تۋرالى ءسوز ودان كەيىن عانا قوزعالاتىنىن ايتتى. ءنازيرا جارىمبەتوۆا, "ەگەمەن قازاقستان".