ءىرى قالالار ديزەلمەن جۇرەتىن كولىكتەرگە تىيىم سالماق

پاريج, مەحيكو, مادريد پەن افينا قالالارى 2025 جىلعا قاراي ديزەلمەن جۇرەتىن كولىكتەرگە تىيىم سالۋ تۋرالى شەشىم قابىلدادى. بۇل تۋرالى مەكسيكادا وتكەن C40 قالا باسشىلارىنىڭ كەزدەسۋىندە بەلگىلى بولدى, دەپ حابارلادى BBC. اتالعان ءتورت قالانىڭ باسشىلارى كەلەسى ونجىلدىقتا ديزەلمەن جۇرەتىن بارلىق جەڭىل جانە جۇك كولىكتەرىنە تىيىم سالماق. ولاردىڭ ايتۋىنشا, بۇل شەشىم اۋانىڭ تازالىعىن ساقتاپ قانا قويماي, ەلەكتر, سۋتەگى جانە گيبريدتى كولىكتەر سانىن ارتتىرۋعا دا سەپتىگىن تيگىزەدى. سونىمەن قاتار جاياۋ جۇرگىنشىلەر مەن ۆەلوسيپەدپەن قاتىناۋشىلاردىڭ سانىن دا ءبىرشاما كوبەيتەدى. پاريج مەرى ەنن يدالگو ء"بىز توكيونىڭ ۇلگىسىمەن قالامىزدىڭ اۋاسىن لاستايتىن اۆتوكولىكتەرگە تىيىم سالماقپىز", دەسە, مادريد قالاسىنىڭ باسشىسى مانۋەلا كارمەنا "اۋانىڭ تازالىعى كليماتتىڭ وزگەرۋىنە قارسى كۇرەسىمىزگە بايلانىستى. ەگەر اۋامىز تازا بولسا, بالالارىمىزدىڭ دا دەنى ساۋ بولادى", - دەدى. بۇل جاعداي اۆتوكولىك شىعارۋشىلاردىڭ جوسپارىنا دا اسەر ەتۋى مۇمكىن. سەبەبى, كولىك ونەركاسىبى باسقا دا ءىرى قالالاردىڭ وسىنداي شەشىم قابىلداۋى مۇمكىن ەكەنىن ەسكەرىپ, سوعان قاراي بەيىمدەلەتىن بولادى. دۇنيەجۇزىلىك دەنساۋلىق ساقتاۋ ۇيىمى اتموسفەرانىڭ لاستانۋىنان جىل سايىن 3 ملن ادامنىڭ  ولەتىنى ايتادى. وسىعان وراي ديزەلدىڭ اتموسفەراعا تيگىزەتىن زيانى سوڭعى جىلدارى ءجيى تالقىلانىپ جۇرگەن ماسەلەلەردىڭ ءبىرى.