ورال-اتىراۋ باعىتىنا قاتىنايتىن اۋە رەيسى اشىلدى

بۇگىن «QAZAQ AIR» اۋە كومپانياسى ورال-اتىراۋ باعىتىندا جاڭا رەيستى باستادى, دەپ حابارلايدى قازاقپارات. «QAZAQ AIR» اق-نىڭ باسقارما توراعاسى بلەك پوللوكتىڭ اتاپ وتكەنىندەي, بۇل – اتالمىش اۋە كومپانياسىنىڭ مارشرۋتتىق جەلىسىندەگى ون ەكىنشى قالا. قازاقستاندا اۋە ۇشاقتارىن وتكەن جىلدىڭ ورتاسىنان باستاپ ۇشىرا باستاعان كومپانيا وسى كەزگە دەيىن 180 مىڭ ادامعا قىزمەت كورسەتكەن. مۇنى جىل اياعىنا دەيىن 200 مىڭعا جەتكىزۋ كوزدەلۋدە. جولاۋشىلاردى وسى ۇشاقتى وندىرەتىن زاۋىتتان الىنعان ءۇش جاڭا «Bombardier» تاسىمالداۋدا. «ءبىز قازاقستانداعى ەڭ جاس اۋە فلوتىن پايدالانۋدامىز. كونسالتينگتىك قىزمەت كورسەتكەن حالىقارالىق اۋە كومپانيالارىنىڭ كومەگىمەن جۇمىس جاساۋدامىز. جەرگىلىكتى 12 ۇشقىش «Bombardier» ۇشاعىن باسقارۋعا ماماندانۋ ءۇشىن ەۋروپادا ءبىلىم-بىلىگىن جەتىلدىرۋدە. ولار جىل اياعىنا قاراي قىزمەتىنە كىرىسەدى. اتىراۋدان ورالعا جانە كەرى باعىتتا جولاۋشىلار اپتاسىنا ەكى رەت - جۇما جانە جەكسەنبى كۇندەرى «Bombardier Q400» بورتىندا ساپار شەگۋگە مۇمكىندىك الادى. بۇل ۇشاقتاردا ۇشۋ قولايلى, بارلىق جاعداي جاسالعان. الداعى جىلى جاڭا ۇشاقتار الىپ, قالاارالىق ۇشۋ رەيستەرىنىڭ سانىن ارتتىراتىن بولامىز», – دەدى برەك پوللوك. «ورال» حالىقارالىق اۋەجايىنىڭ باس ديرەكتورى حايرەدين رىسقاليەۆتىڭ ايتۋىنشا, بۇگىننەن باستاپ بارلىق اۋە كومپانيالارى ورالعا جولاۋشىلار تاسىمالداۋدا. مىسالى,  «ەير استانا», «بەك ەير» الماتى, استانا باعىتىندا قىزمەت كورسەتسە, «QAZAQ AIR» اتىراۋ, «سكات», «بەك ەير» ۇشاقتارى جولاۋشىلاردى اقتاۋعا جەتكىزەدى. الداعى جىلى «سيبير» اۋە كومپانياسى ماسكەۋ باعىتىندا رەيس اشۋدى ويلاستىرۋدا. وبلىس اكىمى التاي كولگىنوۆتىڭ ۇسىنىسىنا سايكەس «ەير استانا» ەۋروپاعا جول اشپاقشى.   تاعى ءبىر جاڭالىق, اۋەجاي عيماراتىن جوندەۋ جونىندە وبلىس اكىمدىگى مەن «قپو ب.ۆ.» كومپانياسى اراسىندا كەلىسىمگە قول جەتكىزىلدى. بۇل ماقساتقا 1 ملرد. استام تەڭگە قاراستىرىلماق. بۇل جۇمىستار الداعى جىلى باستالادى. ەسكە سالا كەتەيىك, بۇدان بۇرىن 2015 جىلى  رەسپۋبليكالىق بيۋدجەتتەن بولىنگەن 7 ميللياردتاي تەڭگەگە اۋەجايدىڭ ۇشۋ-قونۋ جولاعى قايتا جوندەلىپ, كەڭەيتىلگەن بولاتىن.