شىعىسقازاقستاندىقتار تۇڭعىش پرەزيدەنت كۇنىن شات-شادىمان كوڭىل-كۇيمەن اتاپ ءوتتى. ءوڭىر باسشىسى دانيال احمەتوۆ وبلىستىق دراما تەاترىندا وتكەن سالتاناتتى جيىندا تۇرعىنداردى اتاۋلى مەرەكەمەن قۇتتىقتاپ, بۇگىنگى قازاقستاننىڭ قالىپتاسۋى مەن دامۋىنداعى ەلباسى نۇرسۇلتان نازارباەۆتىڭ تاريحي تۇلعاسىنا توقتالدى.
– مەملەكەت باسشىسى قازاقستاننىڭ كەلەشەگى ءۇشىن تاريحي جاۋاپكەرشىلىكتى الا وتىرىپ, ەلدى جاڭارتۋدا حالىقتىڭ ءومىر ءسۇرۋ ساپاسىن جاقسارتۋعا باعىتتالعان اۋقىمدى ەكونوميكالىق جانە الەۋمەتتىك رەفورمالاردى جۇزەگە اسىردى. ەلباسىنىڭ حالىق پەن مەملەكەت يگىلىگى جولىنداعى بەلسەندى قىزمەتى وتانعا قىزمەت ەتۋدىڭ جارقىن ۇلگىسىنە اينالدى, – دەدى د.احمەتوۆ.
سالتاناتتى جيىن ءوڭىر تۇرعىندارىنىڭ «استانا وپەرا» تەاترىنىڭ انشىلەرى ا.كاريموۆا, م.چوتاباەۆ جانە قازاقستاننىڭ ەڭبەك سىڭىرگەن ءارتىسى ۆياچەسلاۆ تكاچ, قازاقستاننىڭ حالىق ارتىستەرى, اعايىندى ابدۋلليندەر اتىنداعى شىعىس قازاقستان ونەر ۋچيليششەسىنىڭ اكادەميالىق حورى, «ينكورو», «اللەگرو» توپتارى مەن «پيرۋەت», «جاستار» حورەوگرافيالىق انسامبلدەرىنىڭ قاتىسۋىمەن وتكەن «ءبىر ەل – ءبىر تاعدىر» اتتى مەرەكەلىك كونتسەرتتى تاماشالاۋىمەن جالعاستى.
شىعىس وڭىرىندە تۇڭعىش پرەزيدەنت كۇنىنە وراي 150-دەن استام شارا ءوتتى. مازمۇندى باعدارلاما اياسىندا قىسقى سپورت تۇرلەرىنەن كەشەندى جارىستار ۇيىمداستىرىلدى. سونىمەن بىرگە, وسكەمەندەگى №7, №44 ورتا مەكتەپتەردە حوككەي قوراپشالارى اشىلسا, كومسومول ارالىندا «شاڭعى-2017» بۇقارالىق اكتسياسى, ال مۇز مودۋلىندە حوككەيدەن «جۇلدىزشا» ويىندارى ءوتتى.
دۋمان اناش,
«ەگەمەن قازاقستان»
