استانادا تاۋەلسىزدىككە ارنالعان فوتوكورمە اشىلدى

ەلوردانىڭ تاۋەلسىزدىك سارايىنىڭ عيماراتىندا ەل تاريحىنىڭ ءاربىر جىلىنىڭ باستى وقيعالارى مەن جەتىستىكتەرى تۋرالى باياندايتىن «تاۋەلسىزدىك جىلناماسى - 25» فوتوكورمەسى اشىلدى, دەپ حابارلادى استانا اكىمدىگىنىڭ ءباسپاسوز قىزمەتى. ونى استانا قالاسىنىڭ اكىمدىگى «National Geographic قازاقستان» جۋرنالىمەن بىرلەسىپ ۇيىمداستىردى. قازاق ەلىنىڭ سوڭعى شيرەك عاسىرداعى قالىپتاسۋ كەزەڭى, اتاۋلى كۇندەرى, ەلەۋلى وقيعالارى مەن ءجۇرىپ وتكەن جولىن ەسكە سالىپ, كورسەتەتىن كورمەگە قازاقستان جانە شەتەلدىك فوتومامانداردىڭ 80-نەن استام ەڭبەگى ۇسىنىلادى. «بارلىعىڭىزدى كەلە جاتقان مەرەكەلەرمەن قۇتتىقتايمىز. قازىر سارايدا ءتۇرلى وقيعالار ورىن الىپ جاتىر. بيىل تاۋەلسىزدىگىمىزدىڭ 25 جىلدىعىن مەرەكەلەۋدەمىز. وسى مەرەكە قارساڭىندا «تاۋەلسىزدىك» اتاۋى بار وسى سارايدا قازاقستان جىلناماسىنىڭ كورمەسىن اشىپ وتىرمىز. بۇل جەردە فوتوسۋرەتتەر ارقىلى ەلىمىزدىڭ تاريحى, تابيعاتى جانە بايلىعى تۋرالى سىر شەرتەتىن 90-نان استام جۇمىس قويىلعان», – دەدى تاۋەلسىزدىك سارايىنىڭ ديرەكتورى اسەل ءومىرشينا. فوتوتىلشىلەر ءوز تۋىندىلارىن بۇل كورمەگە قويۋ ارقىلى قازاقستاننىڭ باي مادەني مۇراسىنا, ءتول تاريحىنا, ۇلتتىق باستاۋىنا دەگەن ماحابباتى مەن قۇرمەتىن كورسەتۋدى الدارىنا ماقسات ەتىپ قويىپ وتىر. ەگەمەندىگىمىزدىڭ 25 جىلدىق مەرەيتويىنا ارنالعان فوتوكورمە قاراشانىڭ 30-نان باستاپ جىل سوڭىنا دەيىن استاناداعى تاۋەلسىزدىك سارايىنىڭ نەگىزگى كورمە زالىندا وتەدى.