ەكىباستۇزدا «پرەزيدەنت نازارباەۆ» گ ۇلى وسىرىلەدى

ەنەرگەتيكا – ەل ەكونوميكاسىنىڭ قوزعاۋشى كۇشى. ونسىز تىرشىلىكتى كوزگە ەلەستەتە المايمىز. بۇل رەتتە «بولات نۇرجانوۆ اتىنداعى گرەس-1» ستانساسىنىڭ دا, اينالا وندىرىستەرى قاپتاعان ەكىباستۇزدىڭ دا ورنى بولەك. ستانسا ەنەرگوبلوكتارى قازىر قالىپتى جۇمىس ىستەپ تۇر. بۇل – قاھارىنا مىنە باستاعان قىس ماۋسىمىنا دايىن دەگەن ءسوز. بۇل «سامۇرىق-ەنەرگو» اق قۇرامىنا قارايتىن گرەس-1 ستانساسىندا 2009-2017 جىلدارعا ارنالعان ۇزاق مەرزىمدى ينۆەستيتسيالىق باعدارلامالاردىڭ ناتيجەسى. باعدارلاما اياسىندا 1997 جىلى توقتاپ قالعان №8 ەنەرگيا بلوگى كۇردەلى جوندەۋدەن ءوتىپ, ىسكە قوسىلسا, №6 ەنەرگيا بلوگى تولىقتاي اۆتوماتتى جۇيەگە كوشكەن. بۇل جوسپارلانعان جوبالاردى جۇزەگە اسىرۋعا ۇلكەن مۇمكىندىك بەرۋدە. قازىر جۇمىسشىلاردى قىسقارتپاۋ, ونىمدىلىكتى تومەندەتپەۋ – باستى نازاردا. جاڭاشىل جوبالاردىڭ جاندانۋىنا گرەس-1 ستانساسى العاشقىلاردىڭ ءبىرى بولىپ قولداۋ كورسەتتى. وتكەن جىلى ستانساعا ىرگەلەس ورنالاسقان «Green نouse kz» كاسىپورنىندا جىلىجاي كەشەنى اشىلدى. نەگىزى, جىلىجايدىڭ قۇرىلىسىن گۇل وسىرۋدە وركەنيەتتى تاجىريبەسى بار گوللانديالىق «VAN DER HOEVEN» كومپانياسى جۇرگىزدى. جوباعا 3 ملرد تەڭگەدەن استام ين­ۆەستيتسيا سالىنىپتى. ينۆەستيتسيالىق جوبا گوللان­ديالىق ينۆەستورلارعا تيەسىلى كورىنەدى. ءبىز دە ستانسا مۇرجالارىنىڭ تۇبىندە ورنالاسقان جىلىجاي ءىشىن ارالاپ كورىپ ءجۇرمىز. كەشەن ءىشى وتە كەڭ, الاڭى 5 گەكتار جەردى الىپ جاتىر. جان-جاعىڭا قاراساڭ كوزىڭ جەتپەيدى, اينالا تولى گۇلدەر. جىلىجاي قىزمەتكەرى اسەل سادىقوۆانىڭ ايتۋىنشا, كوز جاۋىن الىپ, قىزىقتىرىپ تۇرعان عاجايىپ الاڭ ونىمدەرى گوللانديالىق تاسىلمەن وسىرىلەدى. بىلتىر قاراشا ايىندا العاشقى كوشەتتەر وتىرعىزىلعان. گۇلدەر بۇگىندە ەلىمىزدىڭ تۇكپىر-تۇكپىرىنە, رەسەيگە دە جەتكىزىلۋدە. – جابىق الاڭدا وسەتىندىكتەن جارىق پەن جىلۋدى ەرەكشە قاجەت ەتەدى. ءبىزدىڭ جىلىجايدا گۇلدىڭ جوعارى سۇرانىسقا يە «Red Naomi» دەگەن سورتى وسىرىلەدى. ساباعى 90 سانتيمەترگە جەتەدى. كەسىپ, جيناپ العان سوڭ, ارنايى توڭازىتقىشتاردا ساقتالادى. ۇيدەگى گۇلسال­عىش ىدىستاردا 4 كۇن بويى تۇرا الادى, – دەيدى ءا.سادىقوۆا. ال ەلەكتر ستانساسى بولسا, جىلىجايدى سۋمەن, ەلەكتر جانە جىلۋ ەنەرگياسىمەن قامتاماسىز ەتەدى. تۇتىناتىن ەلەكتر قۋاتى دا ارزانعا تۇسەدى. ياعني, ستانسادان شىققان ارتىق جىلۋ جىلىجايعا جىبەرىلەدى. القاپ 5 مۆت ەنەرگيانى قاجەت ەتەدى ەكەن. تاعى ءبىر جاڭالىعى – توپىراقسىز, سۋدا, تامشىلاتىپ سۋارۋ ارقىلى ارنايى ماتەريالدا گۇل جارادى. اليۋمينيدەن قۇراستىرىلعان ارنايى قوندىرعىلار 80 پايىزعا دەيىن كۇننەن جىلۋ الادى. راۋشان كۇتىمدى وتە قاجەت ەتەتىن نازىك گۇل. ۋاقتىلى سۋارىپ, جارىعىن ءتۇسىرىپ, سۋىقتان قورعاۋ كەرەك. ايتپەگەندە لەزدە سولىپ قالادى. جىلىجايدا ەكى اپتاداي ءومىر سۇرەدى. – ستانسا قاسىندا گۇل وسىرەمىز دەپ كىم ويلاعان؟ ومىردە ءبارى مۇمكىن. بىزگە دە يننوۆاتسيا, جاڭالىقتار جەتتى. سوندىقتان, جۇمىسقا ەرەكشە كوڭىل-كۇيمەن كەلەمىز. وزدەرىڭىز كورىپ تۇرعانداي, گۇلدەردىڭ ورتاسىندا جۇرگەننىڭ ءوزى ءبىر راحاتقا بولەيدى, – دەيدى گۇل ءوسىرۋشى قىزدار. قىركۇيەك ايىندا ەلباسى وبلىسقا جۇمىس ساپارىمەن كەلدى. «دوستىق» ۇيىندە جۇرتشىلىق وكىلدەرىمەن كەزدەسۋ ءوتتى. سول كەزدەسۋدە ليۋدميلا زەەۆالد جىلى­جاي­دا ەندى نۇرسۇلتان نازارباەۆتىڭ قۇرمەتىنە ارنال­عان اتاۋلى گۇل ءتۇرىن وسىرەتىندەرىن ايتقان ەدى. – گوللانديادا ءسىزدىڭ قۇرمەتىڭىزگە راۋشان گ ۇلىنىڭ جاڭا ءتۇرى شىعارىلدى. ءبىزدىڭ دە وسىنداي جوسپارىمىز بار. اتاۋلى گ ۇلىمىز ەلىمىزدە ۇلكەن سۇرانىسقا يە بولاتىنىنا سەنىمدىمىز, – دەگەن بولاتىن ل.زەەۆالد. ...كۇنى كەشە تاعى دا ەكىباستۇزعا بارىپ قايتتىق.  راۋشان گۇلدەرىنىڭ 400 مىڭ داناسى رەسەيگە ەكسپورتتالىپتى. جىلىجاي كەشەنىنىڭ ديرەكتورى ايما­عانبەت سارسەنبەك ۇلىنىڭ ايتۋىنشا, قازىر جىلىجايدان ايىنا 600 مىڭ ءتۇپ گۇل الىنادى. گۇلدەردىڭ 60 پايىزى ەكى ايدان بەرى ماسكەۋ, كراسنودار, ومبى, نوۆوسىبىرگە جەتكىزىلۋدە, سۇرانىس ارتۋدا. قازىر راۋشان گۇلدەردىڭ  «اۆالاني», «بيكولور», «شەرپا» اتاۋىنا يە قىزىل, اق, سارى جانە ارالاس گۇلدەر وتىرعىزىلۋدا.  سۇرانىستىڭ ارتۋىنا بايلانىستى كەلەسى جىلى تاعى 5 گا اۋماققا گۇلدەر ەگۋ جوسپاردا بار. كاسىپورىندا 70-كە تارتا ادام جۇمىس ىستەيدى. فاريدا بىقاي, «ەگەمەن قازاقستان» ەكىباستۇز