«بايتەرەك Development» اق-نىڭ ەكس-باسشىسى قاماۋعا الىندى

«بايتەرەك Development» اكتسيونەرلىك قوعامىنىڭ بۇرىنعى باسقارما توراعاسى باقىت جاقسىباەۆ تۇتقىندالى, دەپ حابارلايدى جەمقورلىقپەن كۇرەس ۇلتتىق بيۋروسىنىڭ ءباسپاسوز قىزمەتى. وسى ىسكە قاتىستى مالىمەتتەردەن بەلگىلى بولعانىنداي, اسا ءىرى كولەمدە پارا الدى دەپ ايىپتالعان «بايتەرەك Development» اق-نىڭ لاۋازىمدى تۇلعالارىنا قاتىستى فاكتى بويىنشا, قىلمىستىق سحەمانى ۇيىمداستىرۋشىلاردىڭ ءبىرى – بۇرىنعى باسقارما توراعاسى, قازىرگى تاڭدا قر ۇلتتىق ەكونوميكا مينيسترلىگىنىڭ «قازاقستاندىق تۇرعىن ءۇي كوممۋنالدىق شارۋاشىلىعىن دامىتۋ مەن جاڭعىرتۋ ورتالىعى» اق-نىڭ باسقارما توراعاسى ب.جاقسىباەۆ تۇتقىندالدى. «باقىت جاقسىباەۆ قىلمىستىق ارەكەتكە قاتىسۋشىلاردىڭ بارلىعىنىڭ ارەكەتتەرىنە جەتەكشىلىك ەتىپ, ولاردىڭ اراسىنداعى رولدەردى ءبولىپ, الاتىن پارالارىنىڭ مولشەرىن بەكىتىپ وتىرعان», – دەپ ءتۇسىندىردى جەمقورلىققا قارسى كۇرەس ۆەدومستۆوسىنىڭ وكىلدەرى. 2016 جىلدىڭ 30-قاراشاسىندا اتالعان ازاماتقا قاتىستى الماتى اۋداندىق №2 سوتىنىڭ سانكتسياسى نەگىزىندە «قاماۋعا الۋ تۋرالى» شارا قولدانىلدى. ايتا كەتەيىك, وسىعان دەيىن اۋداندىق سوتتىڭ سانكتسياسى نەگىزىندە «بايتەرەك Development» اق باسقارما توراعاسىنىڭ ورىنباسارى جاقىپوۆ, مەملەكەتتىك جانە جەكەمەنشىك سەرىكتەستىگى ديرەكتسياسى دەپارتامەنتىنىڭ جەتەكشىسى ايتىمبەتوۆ, بۇرىنعى جانە قازىرگى باسقارۋشى ديرەكتورلار انارباي جانە ساريەۆ, «Project City Group» جشس-ءنىڭ جەتەكشىلەرى سماعۇلوۆ, ەسمۇقانوۆ, جۇمانازار مەن كوماروۆ تۇتقىندالعان بولاتىن. اتالعان ازاماتتاردىڭ بارلىعىنا «نۇرلى جول» مەملەكەتتىك باعدارلاماسىنىڭ اياسىندا وڭىرلەردە جالعا بەرىلەتىن تۇرعىن ۇيلەردى قۇرىلىسىن جۇرگىزۋ ءۇشىن قاجەتتى مەملەكەتتىك قىزمەتتەردى ساتىپ الۋ كەزىندە قۇرىلىس كومپانيالارىنا باسىمدىق بەرگەنى ءۇشىن جۇيەلى تۇردە اسا ءىرى كولەمدە پارا الدى دەگەن ايىپ تاعىلىپ وتىر. وسىعان دەيىن حابارلانعانىنداي, 13 كاسىپورىن تارتىلعان قىلمىستىق سحەما رەسپۋبليكانىڭ بارلىق ايماقتارى: ورال, كوكشەتاۋ, اقتوبە, تاراز, تالدىقورعان قالالارى بويىنشا جۇزەگە اسىرىلعان.