اقمولا وبلىستىق فيلارمونياسىندا قازاقستان رەسپۋبليكاسى تاۋەلسىزدىگىنىڭ 20 جىلدىعىنا ارنالعان «كوكشەتاۋ – تال بەسىگىم» اتتى ءى حالىقارالىق مۋزىكا فەستيۆالى ۇلكەن گالا-كونتسەرتپەن اياقتالدى. قازاق مادەنيەتىنىڭ مايەگى سانالاتىن كوركەم ولكە ءۇش كۇن بويى الەمدىك كلاسسيكا, ۇلتتىق جاۋھار اۋەندەرمەن تولعانا تەربەلدى. تۋعان ەلدىڭ تەبىرەنەتىندەي جاعدايى دا بار. بۇل كۇندەرى الەمنىڭ ايتۋلى ونەر وردالارىندا ەڭبەك ەتەتىن كوكشەنىڭ ءتول پەرزەنتتەرى ساحنا تورىنە كوتەرىلدى.
فەستيۆال شىمىلدىعى بۇرىنعى قىزىلتۋ اۋدانىنىڭ تۋماسى, قازىر گەرمانيانىڭ كرەفەلد جانە مەنحەنگلادباح قالالارى تەاترلارىنىڭ ءانشىسى قايىرجان جولدىباەۆ پەن رەسپۋبليكامىزدىڭ ەڭبەك سىڭىرگەن ءارتىسى, وبلىستىق فيلارمونيانىڭ ءسوليسى شولپان دۇكىمباەۆانىڭ ورىنداۋىنداعى «ءبىرجان-سارا» وپەراسىنداعى ايتىسپەن اشىلدى.
كوكشە فەستيۆالى «تالانتقا تاعزىم» ۇعىمىن اسپانداتقان ايرىقشا وقيعا ەكەندىگى داۋسىز. ءار ءنومىر سايىن جان دۇنيەمىز شىمىرلاپ, جۇرەك ءلۇپىلى كۇشەيە تۇسكەندەي كورىندى. الەمدىك دەڭگەيدەگى مەترلەرمەن يىقتاسا سىنعا تۇسكەن جاستارىمىز, ۆەنا كونسەرۆاتورياسىنىڭ پروفەسسورى گەرنوت ۆينيشحوفەر مەن استانا مەملەكەتتىك فيلارمونياسىنىڭ كونتسەرتمەيستەرى, جەرلەسىمىز باعدات ءابىلحانوۆ يوگانن باحتىڭ «قوس كونتسەرتىن» ەرەكشە ناقىشتا قۇيقىلجىتىپ, جۇرتشىلىقتى تەربەتىپ تاستادى.
كورەرمەندەر جاس بولسا دا جەر ءجۇزىنىڭ ايتۋلى ساحنالارىنداعى جەتەكشى وپەرالىق انشىلەر ساناتىنداعى جەرلەستەرى, بۇگىنگى فەستيۆالدا «جۇلدىزدى تورتتىك» اتانعان سالتانات احمەتوۆا (يتاليا), ولگا سپيتسىنا (ماسكەۋ), دميتري فەدوروۆ (سانكت-پەتەربۋرگ), قايىرجان جولدىباەۆقا (گەرمانيا) العىس جاۋدىرۋمەن بولدى. كۆارتەت, اسىرەسە, ۆەرديدىڭ «ريگولەتتو» وپەراسىنان ءۇزىندىلەردى شەبەرلىكپەن ورىندادى. سونداي-اق, يتاليادا سىناقتان ءوتىپ جاتقان ماحاببات مۇحامەدجانوۆا مەن باۋىرجان ءاندىرجانوۆ وزدەرىنىڭ تالعام بيىگىندەگى تالانت يەلەرى ەكەندىكتەرىن تانىتتى.
حالىق اندەرى سيمفونيالىق مۋزىكامەن ساباقتاسا شارىقتادى. استانا فيلارمونياسىنىڭ بەلدى دومبىراشىسى, حالىقارالىق بايقاۋلاردىڭ لاۋرەاتى انار مۇزداحانوۆا «ايناكول» فولكلورلىق ءانسامبلىنىڭ جەتەكشىسى, كوكشەلىك رۋسلان قويشىباەۆپەن جۇپتاسىپ, قازاق كۇيىنىڭ قۇدىرەتىن شالقىتتى. فەستيۆال قوناعى, قازاقستاننىڭ ەڭبەك سىڭىرگەن ءارتىسى قاپاش ق ۇلىشەۆا جەرلەستەرىنە ۇكىلى ىبىرايدىڭ «سۇلۋ كوكشە» ءانىن سىيعا تارتتى. سونىمەن بىرگە, الماتىلىق سازگەر, مۋزىكا زەرتتەۋشىسى ەدىل قۇسايىنوۆتىڭ ەجەلگى ۇلتتىق اسپاپتار – جەتىگەن, سىبىزعى, ساز سىرناي, قامىس سىرناي, قاۋىرسىن سىرناي, شاڭقوبىزدى شەبەر ءسويلەتۋى ۇلتتىق ونەر شەبەرلىگىنىڭ شەكسىزدىگىن ايگىلەدى.
تۇڭعىش فەستيۆالدىڭ سوڭعى كۇنى تۇتاستاي ۇلتتىق مۋزىكانى اسپەتتەۋگە ارنالۋى كوڭىلدەن شىقتى. كوپجانرلى اندەر, كلاسسيكالىق اريالار وبلىستىق فيلارمونيانىڭ حالىق اسپاپتارى ءانسامبلىنىڭ (ديريجەرى تۇرلىقوجا بازاروۆ) سۇيەمەلدەۋىندە ۇزدىكسىز كۇمبىرلەدى. ماسكەۋدىڭ جەتەكشى وپەرا ءانشىسى ۆەنيامين ەگوروۆ پەن سانكت-پەتەربۋرگتىك دميتري فەدوروۆ ابايدىڭ «كوزىمنىڭ قاراسى» جانە «قالامقاس» اندەرىن جوعارى دەڭگەيدە اۋە
لەتسە, ولگا سپيتسىنا حالىق ءانى «القوڭىردى» كلاسسيكالىق ءمانەردە شىرقادى. ەكى جەرلەسىمىز – استانا مەملەكەتتىك فيلارمونياسى قازاق ۇلت اسپاپتارى وركەسترىنىڭ كوركەمدىك جەتەكشىسى ءارى باس ديريجەرى داۋرەن عىلىموۆ پەن قوستاناي فيلارمونياسى وركەسترىنىڭ باس ديريجەرى بەرىك ءورازاليننىڭ باسقارۋىمەن حالقىمىزدىڭ جاۋھار كۇيلەرى ءتۇرلەنە تولقىنداندى.
ريزا كورەرمەن فەستيۆال فينالىنداعى «سوپرانو شەرۋىنە» تىك تۇرىپ قۇرمەت كورسەتتى. ونەر مەرەكەسىنىڭ كوركەمدىك جەتەكشىسى, ك.بايسەيىتوۆا اتىنداعى ۇلتتىق وپەرا جانە بالەت تەاترى سيمفونيالىق وركەسترىنىڭ باس ديريجەرى ابزال مۇحيتدينوۆ وسىناۋ زور اۋقىمداعى شارانى ۇيىمداستىرعان وبلىس باسشىلىعى مەن كورەرمەندەر ىقىلاسىنا ريزالىق ءبىلدىرىپ, ونىڭ ءداستۇرلى سيپات الۋىنا تىلەك قوستى.
وبلىس اكىمى س.دياچەنكو اقمولالىقتار اتىنان ونەر قايراتكەرلەرىنە العىس ايتىپ, فەستيۆال جۇلدىزدارىن ارنايى ديپلومدارمەن, ەستەلىك سىيلىقتارمەن ماراپاتتادى.
باقبەرگەن امالبەك.
كوكشەتاۋ قالاسى.
سۋرەتتەردە: قايىرجان جولدىباەۆ پەن شولپان دۇكىمباەۆا; ولگا سپيتسىنا; مارينا الەشونكوۆا مەن دميتري فەدوروۆ.
سۋرەتتەردى تۇسرگەن ەلەنا تەپلياكوۆا.
