پاۆلوداردا شاحماتتان حالىقارالىق تۋرنير ءوتتى

پاۆلوداردا شاحماتتان وتكەن حالىقارالىق ءتۋرنيردىڭ جەڭىمپازدارى انىقتالدى. جارىس قورىتىندىسى بويىنشا بەلگيالىق گروسسمەيستەر ۆاديم مالاحاتكو توپ جاردى, دەپ حابارلايدى pavlodarnews.kz. پاۆلودار قالاسىندا وسىمەن 11-ءشى مارتە جالاۋىن جەلبىرەتكەن جارىسقا الەمنىڭ توعىز ەلىنەن 100-گە جۋىق سپورتشى قاتىستى. جارىستا قازاقستاننىڭ تۇكپىر-تۇكپىرىنەن سونىمەن قاتار, ۋكراينا, رەسەي, وزبەكستان, قىرعىزستان, بەلارۋس, ءازىربايجان, بەلگيا, تۇركيا, موڭعوليا جانە سەربيا ەلدەرىنىڭ كىل مىقتىلارى باق سىنادى. وسى جىلدىڭ باستى ەرەكشەلىگى - تۋرنيردە 13 گروسسمەيستەردىڭ ونەر كورسەتۋىندە. تۋرنير قورىتىندىسى بويىنشا بەلارۋس ەلىنەن كەلگەن شاحماتشى كيريلل ستۋپاك كۇمىس مەدالعا قول جەتكىزسە, رەسەيدىڭ التاي ولكەسىنەن كەلگەن ۆيتالي بويارينتسەۆ ءتۋرنيردىڭ قولا جۇلدەگەرى اتاندى. ورالدىق 18 جاستاعى ويىنشى جانات ساين از عانا ۇپاي ايىرماسىمەن ۇزدىك ۇشتىكتىڭ قاتارىنا كىرە المادى. بۇعان دەيىن حالىقارالىق دارەجەدەگى سپورت شەبەرى جانە مەكتەپ وقۋشىلارى اراسىنداعى الەم چەمپيونى بەلەستەرىن باعىندىرعان ول وسى تۋرنيردە ءتورتىنشى ورىندى قاناعات تۇتتى. « ءتۋرنيردىڭ تاعى ءبىر ەرەكشە تۇسى  قاتىسۋشىلاردىڭ حالىقارالىق سپورت دارەجەلەرىنە قول جەتكىزۋىندە بولدى. ماسەلەن, بىلتىر قازاقستاندىق ءمادينا داۋلەتوۆا ايەلدەر اراسىنداعى حالىقارالىق گروسسمەيستەر اتاعىن العان بولاتىن. بيىل پاۆلودارلىق الىشەر سۇلەيمەنوۆ حالىقارالىق سپورت شەبەرى ۇمىتكەرلىگىنىڭ ۇپايىن جينادى. شاحمات تۋرنيرىنە شاحماردان ەسەنوۆ اتىنداعى عىلىمي-ءبىلىم بەرۋ قورى, قر مادەنيەت جانە سپورت مينيسترلىگىنىڭ سپورت كوميتەتى جانە قازاقستان رەسپۋبليكاسىنىڭ شاحمات فەدەراتسياسى قارجىلاي قولداۋ كورسەتتى», - دەيدى «شاحمات ءۇيىنىڭ» ديرەكتورى ءشارىپ قاشكەنوۆ.