كونفەدەراتسيا كۋبوگى. سمەتوۆ جاڭا سالماقتا بەلدەسەدى

"وليمپيادادا التىن الۋعا ساتتىلىك قانا جەتىسپەدى", - دەيدى ەلدوس سمەتوۆ sports.kz - كە بەرگەن سۇحباتىندا. دزيۋدوشىنىڭ ايتۋىنشا, ول فيزيكالىق تۇرعىدا دا, پسيحولوگيالىق تۇرعىدا دا جاقسى دايىندىقتا بولعان. ءارى فينالدىڭ قالاي وتكەنىنە دە كوڭىلى تولادى ەكەن. "ماعان ەلىمنىڭ ۇلكەن جاۋاپكەرشىلىك ارتقانىن سەزىندىم. قازاقستان ءۇشىن وليمپيادادا كۇمىس مەدال الىپ, سول سەنىمدى اقتاي الدىم دەپ ويلامىن", دەيدى ەلدوس. دزيۋدوشىنىڭ ەندىگى ماقساتى - توكيو وليمپياداسىنان التىن الۋ. ءتىپتى, بولاشاقتا باپكەر بولۋ ويىندا بار ما ەكەنىن سۇراعان جۋرناليستكە ول: "بۇل تۋرالى ءالى ويلانبادىم. مەنىڭ قازىرگى ويىم دا, كۇشىم دە تەك توكيو وليمپياداسىنا باعىتتالعان", دەپ جاۋاپ بەردى. جاقىندا الماتىدا «بالۋان شولاق» سپورت كەشەنىندە  3-4 جەلتوقسان كۇندەرى جۇلدە قورى 125 ميلليون تەڭگەدەن اساتىن سپورتتىق جەكپە-جەك جانە كۇش قولداناتىن سپورت تۇرلەرى كونفەدەراتسياسى كۋبوگى وتەتىنىن حابارلاعان بولاتىنبىز. بۇل سايىستا 66 كگ سالماقتا بەلدەسەتىن ەلدوس ءوزىنىڭ دايىندىعى تۋرالى دا اتالمىش سۇحباتتا ايتىپ ءوتتى. "وليمپياداعا دايىندالعانداي قاتتى دايىندىعىم جوق. 66 كگ-عا دەيىنگى سالماق دارەجەسىندە شىعاتىنىم دا وڭاي بولمايتىنىن سەزىپ وتىرمىن. بارلىعىن تاتامي كورسەتەتىن بولادى", دەدى ول. ەستەرىڭىزگە سالا كەتەيىك, ول بۇعان دەيىن 60 كگ سالماقتا كۇرەسەتىن جانە ول وليمپيادادان كەيىن تاتاميگە ەندى شىققالى وتىر.