ەل تاۋەلسىزدىگىنىڭ مەرەيتويلى جىلىندا استانا قالاسىندا 46 بالاباقشا اشىلدى. بۇل تۋرالى ەلوردا اكىمىنىڭ كەڭەسشىسى فەيسبۋكتەگى ءوزىنىڭ پاراقشاسىندا حابارلادى.
ونىڭ ايتۋىنشا, بۇگىنگى كۇنى قاراوتكەل (يلينكا) تۇرعىن القابىنداعى 240 ورىندىق №92 «جاۋقازىن» بالالار باقشاسىنىڭ قۇرىلىسى اياقتالدى. جالپى اۋماعى 5 مىڭعا جۋىق شارشى مەتردى قۇرايدى. ەكى قاباتتى عيمارات قازاق تىلىندە ءتالىم الاتىن 12 توپقا ارنالعان. بۇلدىرشىندەردى قابىلداۋ كەلەسى جىلدىڭ 1 قاڭتارىنان باستالادى.
استانادا مەكتەپكە دەيىنگى ءبىلىم بەرۋ مەكەمەلەرىنىڭ تاپشىلىعى جاڭا بالاباقشالاردىڭ اشىلۋىمەن, سونىڭ ىشىندە مەملەكەتتىك-جەكەمەنشىك سەرىكتەستىك كومەگىمەن شەشىلۋدە.
«بيىل 46 بالالار باقشاسىنىڭ ىرگەسى قالاندى. سونىڭ ىشىندە مەملەكەتتىك تاپسىرىسپەن 8859 ورىندىق 44 جەكەمەنشىك بالاباقشا جانە بيۋدجەت قارجىسى ەسەبىنەن 440 ورىندىق 2 بالاباقشا بار. ودان بولەك, مەملەكەتتىك-جەكەمەنشىك سەرىكتەستىك اياسىندا 2480 ورىندىق 10 بالاباقشانىڭ جوباسى جۇزەگە اسىرىلىپ جاتىر. «بيزنەستىڭ جول كارتاسى» باعدارلاماسىمەن – 31, سونىڭ ىشىندە بيىل 5 جوبا جاسالدى. 2017 جىلدىڭ ءبىرىنشى جارتىجىلدىعىندا 480 ورىندىق 2 بالاباقشانىڭ اشىلۋى جوسپارلانۋدا», – دەپ جازدى ول.
ايتا كەتەيىك, قازىرگى تاڭدا استانادا 48 مىڭ 154 بۇلدىرشىنگە ارنالعان ءارتۇرلى ۇلگىدەگى 261 مەكتەپكە دەيىنگى ءبىلىم بەرۋ مەكەمەسى قۇرىلعان. ونىڭ 95-ءى – مەملەكەتتىك, 2 – ۆەدومستۆولىق, 116 – جەكە, 48-ءى شاعىن ورتالىقتار.
0-6 جاسقا دەيىنگى بالالار سانى – 87 947. 3-6 جاس ارالىعىنداعى بالالاردىڭ كەزەگى – 25 550 بالا.
