«تاۋەلسىز قازاقستان» پويىزى – شەجىرەلى شالقاردا

ۇستىمىزدەگى جىلعى 1 قاراشا كۇنى استانا قالاسىنان شىققان «تاۋەلسىز قازاقستان» پويىزى شالقار قالاسىنا تابان تىرەگەن ەدى. قازاقستان حالقى اسسامبلەياسىنىڭ ەل تاۋەلسىزدىگىنىڭ 25 جىلدىعىنا ارناعان رەسپۋبليكالىق اكتسياسىنىڭ اياسىندا جولعا شىققان پويىزدى شالقارلىقتار زور قوشەمەتپەن قارسى الدى. تەمىر جول ۆوكزالىندا ەرتەمەن تىنىق اۋانى تىلگىلەگەن اۋەزدى اۋەن مەن كۇمبىرلەگەن كۇي مەيمانداردى قارسى الۋ راسىمىنە جيىلعان قاۋىمنىڭ قاراسىن كوبەيتە ءتۇستى. اۋدان اكىمىنىڭ مىندەتىن ۋاقىتشا اتقارۋشى ەلەمەس شوتانوۆ ەگەمەندىكتىڭ مەرەيلى مەرەيتويى قارساڭىندا شالقارعا تابان تىرەگەن قوناقتار قادامىنا ساتتىلىك تىلەدى. ەڭبەك ارداگەرى, شالقار اۋدانىنىڭ قۇرمەتتى ازاماتى ورازباي ادىلباەۆ قوناقتارعا اقساقالدىق باتاسىن بەرىپ, شەجىرەلى شالقاردىڭ ارعى-بەرگى تاريحىنان سىر شەرتەتىن مازمۇندى اڭگىمەلەر تيەگىن اعىتتى. «تاۋەلسىز قازاقستان» پويىزىنىڭ شتاب جەتەكشىسى ءامىرجان الپەيىسوۆ بۇل ساپاردىڭ ماقسات-مىندەتىنە توقتالدى. توپ جەتەكشىسىنىڭ ايتۋىنشا, بۇل قۇرامدا جەتى مينيسترلىكتەن جانە «اتامەكەن» ۇلتتىق كاسىپكەرلەر پالاتاسى مەن «قازاگرو» ۇلتتىق حولدينگى, «قازاقستان تەمىرجولى» ۇلتتىق كومپانياسى» اكتسيونەرلىك قوعامىنان بارلىعى 271 ادام بار, ونىڭ 72-ءسى مەديتسينا قىزمەتكەرى. – باستى ماقسات – ەلدەگى الەۋمەتتىك احۋالعا كوڭىل ءبولىپ, ەلباسى ۇستانعان ساياساتتىڭ جەتىستىكتەرىن حالىققا جەتكىزۋ, بۇقارا مەن بيلىك اراسىنداعى بايلانىستى ودان ءارى نىعايتۋ. كۇن تارتىبىندەگى ماسەلەلەرگە وراي ءبىز ايالداعان جەرلەردە جۇيەلى جۇمىستار ءجۇردى, ناتيجە بار. وسى ءسوزىمىز بەن ىسىمىزدەگى ۇيلەسىمدىلىك شالقاردا دا جالعاسىن تابادى دەپ سەنىممەن ايتا الامىن, – دەدى ءا.الپەيىسوۆ. پويىز قۇرامىنداعى ماماندار «نۇر وتان» پارتياسى شال­قار اۋداندىق فيليالى عيما­راتىندا, اۋداندىق مادەنيەت ۇيىندە, اۋداندىق ورتالىق ەم­حانادا تۇرعىندارعا قوعامدىق قا­بىل­داۋلار جۇرگىزدى. قابىلداۋعا كەلگەن تۇرعىندار ساۋالىنىڭ دەنى – جۇمىسسىزدىق جايى بولدى. ال «مەكتەپتەگى بالاما بيىل وقۋلىق جەتىسپەدى», دەپ شاعىمدانعان بايان ساحيەۆانىڭ ماسەلەسى بىردەن شەشىلدى. بالاسى سال اۋرۋىنا تاپ بولعان ادەمى پىرالىقىزى ەسىمدى انانىڭ تىلەگى دە تاياۋدا ورىندالاتىن بولدى. ناۋقاس بالاسىن استانا قالاسىنداعى ءىرى دە بەدەلدى مەديتسينالىق ورتالىقتاردا ەم­دە­لۋگە كۆوتا الىپ بەرۋ قولعا الىندى. بۇدان دا وزگە مۇڭ-مۇقتاجىن ايتىپ كەلگەن تۇر­عىن­داردىڭ ماسەلەسى جاۋاپسىز قالمايتىن بولدى. مۇمكىندىگى شەكتەۋلى بالا­لارعا ار­نال­عان شالقار اۋدانىن­داعى پە­داگوگي- ­كالىق-پسيحولوگيا­لىق تۇزەۋ كابينە­تىندە «قايىرىم­دىلىق كەرۋەنى» اتتى شارا ءوتتى. وندا «تاۋەلسىز قازاقستان» پويىزىنداعىلار تۇزەۋ كابينەتىنىڭ تاربيەلەنۋشىلەرىنە سىي­لىقتار تابىستاپ, ونەرلەرىن تاماشالادى. اۋداندىق ورتالىق كىتاپحانادا كىتاپ­حا­ناشى­لارمەن جۇزدەسىپ, كىتاپحاناعا ەلباسىنىڭ ءومىر جولى, تاۋەلسىزدىكتى تولعايتىن قۇندى كىتاپ­تاردى تابىستادى. بۇدان سوڭ مادەنيەت ۇيىندە «تاۋەلسىز قازاقستان» پويىزى جولاۋ­شى­لارىنىڭ قۇرمەتىنە وراي كونتسەرتتىك باعدارلاما ۇسىنىلدى. جەرگىلىكتى ونەرپازدار ءوز ونەرلەرىن كورسەتىپ, كورەرمەن قوشەمەتىنە بولەندى. «تاۋەلسىز قازاقستان» پويىزىنىڭ اۋدان ورتالىعىنا ايالداعان ءبىر كۇنىندە ونىڭ قوعامدىق قابىلداۋىنا 120 ادام جازىلىپ, مەديتسينالىق كەڭەس­كە 406 ادام جۇگىنگەن. «تاۋەل­سىز قا­زاق­ستان» پويىزى ودان ءارى  قى­­زىل­وردا وبلىسىنا باعىت تۇزەدى. ساتىبالدى ءساۋىرباي, «ەگەمەن قازاقستان», مۇحتار مىرزالين, جۋرناليست اقتوبە وبلىسى, شالقار اۋدانى