ايتىس ارقاۋى – ازاتتىق

قوستانايدا «تاۋەلسىزدىككە ارناۋ: ماڭگىلىك ەل جاستارى جىرلايدى» ايماقتىق جاس اقىندار ايتىسى ءوتتى. جىر دوداسىنا ون اقىننىڭ بەسەۋى قوستانايدان قوسىلسا, بەسەۋى قاراعاندىدان, سەمەيدەن, پاۆلو­داردان, ارقالىقتان كەلدى. ايتىس قاشان دا حالىقتىق ونەرگە سۋساپ وتىراتىن كورەرمەننىڭ ءشولىن باساتىن سۋات سەكىلدى. قوستانايلىق جىرسۇيەر قاۋىم «تالاپتىڭ تۇل­پارىن مىنگەن» جاس اقىنداردىڭ ارقايسىسى ايتقان تۇششىمدى ويعا, تاپقىر ازىلگە, ورامدى سوزگە قول سوعىپ, قوشەمەتىن ايامادى. ايتىسقا قوستاناي وڭىرىندەگى ەلىمىزگە تانىمال اقىن-جازۋشىلار ءاسيا بەركەنوۆا, عۇمار احمەتچين, ناعاشىباي مۇقاتوۆ, ءالفيا ور­مان­­شينا جانە ابىلاي ماۋدا­نوۆ قازىلىق جاسادى. – بۇل جولعى ايتىستىڭ باستى ەرەكشەلىگى – ونىڭ شىنايىلىعى دەر ەدىم. كەي ايتىستاردا جاپ-جاس اقىن شىعادى دا, الدىن الا دايىنداپ كەلگەن جىرىن اسان قايعى سەكىلدى تولعانىپ, قارا اسپاندى سۋعا الدىرىپ ايتقاندا, قانشالىقتى ۋاقىتتىڭ وزەكتى ماسە­لەلەرىن كوتەر­گەنمەن دە شىنايى­لىقتىڭ جوقتى­عىنان كورەرمەنىن ماي ىشكەندەي ەتەدى. ال بۇل ايتىستا جاس اقىندار ءوز جاسىنا, جاستىق شاققا لايىق ماسەلەلەردى ايت­تى, بارلىعى دا جاراسىم تاۋىپ تۇردى, – دەيدى ابىلاي ماۋدانوۆ. جۇيرىكتەن جۇيرىك وزعان ايتىس­تا قازىلار باس بايگەنى ون اقىن­نىڭ ىشىندەگى قىزعالداقتاي قوستا­نايلىق اقىن قىز ءناريا اقبا­باعا لايىقتاپ, ول 500 مىڭ تەڭگەنى يەلەندى. ءناريانىڭ سۋىرىپسالما­لىلىعىمەن قاتار, قارسىلاسىن ساستىراتىن تاپقىر ءۋاج ايتا بىلە­تىندىگى كورەرمەنىن دە, قازىلاردى دا ءتانتى ەتتى. ءبىرىنشى ورىندى يەلەنگەن پاۆلودارلىق نۇرقانات قايراتقا 250 مىڭ تەڭگە بەرىلدى. 200 مىڭ تەڭگەنى سەمەيلىك سەرىك قۋانعان قانجىعاعا بايلادى. 3-ءشى ورىن مەن 100 مىڭ تەڭگە اقشالاي سىيلىق ارقالىقتىق باتىرلان ساعىنتايعا تابىس ەتىلدى. ى.التىنسارين جانە ا.بايتۇرسىنوۆ اتىنداعى ارنايى جۇلدەلەر ارقاي­سىسى 80 مىڭ تەڭگەدەن قارا­عان­دىدان كەلگەن نۇرمۇحاممەد باي­سۇگىروۆ پەن ارقالىقتىق قايروللا حافيزعا بەرىلدى. ايتىسقا قاتىسقان نۇرسۇلتان قاسىم, ايبار راعاتوۆ, بەكبولات قالەنوۆ, ەرنۇر اۋەزحان سەكىلدى جاس اقىندار دا نازارسىز قالعان جوق, ىنتالاندىرۋ سىيلىعىمەن ماراپاتتالدى. ءنازيرا جارىمبەتوۆا, «ەگەمەن قازاقستان» قوستاناي