"اقتاستاعى احيكو" استانادا قويىلىپ جاتىر

استاناداعى بەيبىتشىلىك پەن كەلىسىم سارايىندا «اقتاستاعى احيكو» دراماسىنىڭ پرەمەراسى باستالدى. وعان دراماداعى باس كەيىپكەردىڭ تۇپتۇلعاسى احيكو اقساقال ارنايى كەلدى. سونداي-اق پرەمەراعا قر مادەنيەت جانە سپورت ءمينيسترى ارىستانبەك مۇحامەدي ۇلى مەن قر مەملەكەتتىك حاتشىسى گۇلشارا ابدىقالىقوۆا قاتىسۋدا, دەپ حابارلايدى قازاقپارات. سپەكتاكلگە جاپون ۇلى احيكونىڭ قيلى تاعدىرى ارقاۋ بولعان. ول كەڭەس ۇكىمەتى كەزىندە ستاليندىك قۋعىن-سۇرگىنگە ۇشىراپ, 15 جاسىندا جازىقسىزدان جازىقسىز اتاقتى «قارلاگ» تۇرمەسىنە تۇسكەن. جاستىق شاعىنىڭ 10 جىلىن ازاپپەن وتكىزىپ, ءولىمشى حالدە تۇرمەدەن شىققان سوڭ ول قازاق اناسىنىڭ ارقاسىندا امان قالادى. وسىلاي قاراعاندى ماڭىنداعى اقتاس قالاسىندا تۇراقتاپ, قونىستانىپ قالادى. كەيىن احيكو ءوز وتانىنا شاقىرتۋ الادى, بىراق وندا كوپ تۇراقتاماي, قازاقستانعا قايتىپ ورالادى. قازىر احيكو اقساقال 85 جاستا. 11 نەمەرە, 5 شوبەرە ءسۇيىپ, ۇلكەن اۋلەتتىڭ باسى بولىپ وتىر. احيكو تەتسۋرونىڭ تاعدىر جولى - ستاليندىك زۇلمات جىلداردا قازاقستانعا قونىس اۋدارعان, ايدالىپ, جازىقسىز سوتتالىپ لاگەرلەرگە اكەلىنگەن مىڭداعان ادامداردىڭ, ءتۇرلى ۇلت وكىلدەرىنىڭ تاعدىرى. قويىلىمدا احيكونىڭ تاعدىرى ارقىلى حح عاسىرداعى ەڭ اۋىر كەزەڭدە, ازاپ لاگەرلەرىندە وتىرىپ, ءوزىنىڭ ادامي بەينەسىن ساقتاپ قالعان رۋحى مىقتى, جاسامپاز جانداردىڭ جيىنتىق بەينەسى جاسالعان. ايتا كەتەيىك, قازاقستاننىڭ تەاتر كەڭىستىگىندە تۇڭعىش رەت كوزى ءتىرى ساياسي قۋعىن-سۇرگىن قۇربانىنىڭ تاعدىرى دەرەكتى دراماعا ارقاۋ بولىپ وتىر.  قازاقستاننىڭ ەڭبەك سىڭىرگەن قايراتكەرى, رەجيسسەر اسحات ماەميروۆ ساحنالاعان بۇل قويىلىم م.اۋەزوۆ اتىنداعى قازاق مەملەكەتتىك اكادەميالىق دراما تەاترى ۇجىمىنىڭ قازاقستان رەسپۋبليكاسىنىڭ تاۋەلسىزدىگىنىڭ 25 جىلدىعىنا ارناعان ۇلكەن جوباسى. باستى ءرولدى تەاتر اكتەرى دۋلىعا اقمولدا سومدايدى. سونداي-اق قويىلىمدا قازاقستاننىڭ ەڭبەك سىڭىرگەن قايراتكەرى بەكجان تۇرىس (اقايدىڭ قاسەنى), قازاقستاننىڭ ەڭبەك سىڭىرگەن قايراتكەرى قۋاندىق قىستىقباەۆ, قازاقستاننىڭ ەڭبەك سىڭىرگەن قايراتكەرى, قازاقستان جاستار وداعى سىيلىعىنىڭ لاۋرەاتى ازامات ساتىبالدى (ستەپان) سىندى تانىمال ارتىستەر وينايدى.