مادەنيەت جانە سپورت ءمينيسترى ارىستانبەك مۇحامەدي ۇلى ەلوردادا كاسىپقوي بوكسشى جانقوش تۇراروۆپەن كەزدەسىپ, الماتىدا وتكەن بوكس كەشىندەگى جەڭىسىمەن قۇتتىقتاپ, مينيسترلىك اتىنان ارنايى ەستەلىك سىيلىق تابىس ەتتى, دەپ حابارلادى قازاقپارات.
«الماتىدا وتكەن ايقاستا گانالىق ايساك اريەمەن وتكىزگەن جەكپە-جەگىڭدە جانكۇيەرلەرىڭە كەرەمەت كوڭىل كۇي سىيلادىڭ. ءبىز ەل مەرەيىن اسىرىپ جۇرگەن سەندەر سياقتى مىقتى سپورتشىلارىمىزبەن ماقتانامىز», – دەدى مينيستر.
بۇدان بولەك, كەزدەسۋ بارىسىندا ارىستانبەك مۇحامەدي ۇلى: «الدا ەكسپو كەلە جاتىر. وسىعان وراي استاندا ءبىر كاسىپقوي بوكس كەشىن وتكىزۋدى جوسپارلاپ وتىرمىز. وسىعان دەيىن, گەننادي گولوۆكين, قانات يسلاممەن كەزدەسىپ, وسى تاقىرىپتا اڭگىمە وربىتكەن بولاتىنبىز. بۇگىن سەنىمەن دە وسى تاقىرىپتا اقىلداسساق دەگەن ويمەن ارنايى شاقىردىق», – دەپ اتاپ ءوتتى.
ءوز كەزەگىندە جانقوش تۇراروۆ مينيسترگە العىسىن ايتىپ, ەگەر بيلىك تاراپىنان قولداۋ بولسا, بوكس كەشىن وتكىزۋگە قۋانا كەلىسەتىنىن جەتكىزدى.
«ەگەر, بيلىك تاراپىنان قولداۋ بولىپ جاتسا, نەگە بوكس كەشىن وتكىزبەسكە؟ ەكسپو الداعى جىلى ەلىمىزدە وتەتىن ەڭ ءىرى شارالاردىڭ ءبىرى. ەلباسىمىز دا سپورتقا ەرەكشە نازار اۋدارىپ وتىر. وسى ورايدا استانادا ۇلكەن بوكس كەشى ءوتىپ جاتسا, ەكسپو-عا كەلگەن قوناقتار ءۇشىن دە, جەرگىلىكتى قالا تۇرعىندارى ءۇشىن دە ۇلكەن قۋانىش بولار ەدى», - دەدى بوكسشى.
ايتا كەتەيىك, جانقوش تۇراروۆ وسىعان دەيىن 20 جەكپە-جەك وتكىزىپ, بارلىعىندا جەڭىسكە جەتكەن. ونىڭ 14-ءىن ۋاقىتىنان بۇرىن اياقتاعان.
