جاڭا باعدارلامانىڭ نەگىزگى مىندەتتەرى ءتۇسىندىرىلدى

كەزەكتى ۇكىمەت وتىرىسىنان كەيىن وتكەن ءباسپاسوز ءماسليxاتىندا دەنساۋلىق ساقتاۋ جانە الەۋمەتتىك دامۋ ءمينيسترى تامارا دۇيسەنوۆا ناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋعا ارنالعان جاڭا باعدارلامانىڭ نەگىزگى ماقسات-مىندەتى جايىندا ءتۇسىندىردى. «مىسالعا الايىق, 2008-2011 جىلدارى ءبىز ارنايى جول كارتاسىن ىسكە اسىرىپ, جۇمىسسىز قالعانداردى ۋاقىتشا جۇمىسپەن قامتۋدى ماقسات ەتتىك. ال 2011 جىلدان باستاپ ونى جالعاستىرساق تا, اۋىلعا قاراي بۇرۋعا تىرىستىق, سول جەردەگى xالىقتى جۇمىسپەن قامتۋدى قالادىق. دەگەنمەن, «جۇمىسپەن قامتۋدىڭ جول كارتاسىندا» داعدارىسقا قارسى شارالار باسىم بولدى. قازىر ءبىز جاڭا كەزەڭگە اياق باسىپ وتىرمىز. سوندىقتان xالىقتىڭ قاجەتتى ماماندىقتى يگەرىپ الۋىنا جان-جاقتى جاعداي جاساماقپىز. وسىنىڭ ناتيجەسىندە ازاماتتار وزدىگىمەن جۇمىس تابا الادى نەمەسە ءوز كاسىبىن اشسا دا بولادى. وسىعان بايلانىستى «جۇمىسپەن قامتۋدىڭ جول كارتاسى» قايتا قارالىپ, ناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋدىڭ جاڭا باعدارالاماسى رەتىندە قولعا الىنادى», – دەدى دۇيسەنوۆا. ونىڭ ايتۋىنشا, جاڭا باعدارلاماعا «بيزنەستىڭ جول كارتاسى - 2020» باعدارلاماسى دا ەنىپ كەتەدى. «قازىرگى ۋاقىتتا شاعىن بيزنەستى اشۋعا قاجەتتى ميكرونەسيەلەر جۇمىسپەن قامتۋ باعدارلاماسىندا دا, بيزنەستىڭ جول كارتاسىندا دا, اگروونەركاسىپ باعدارلاماسىندا دا بار. ەندى سول بارلىق قۇرالداردى ءبىر باعدارلاماعا جيىپ, بىرىڭعاي شارتتارمەن بەرگەلى وتىرمىز. سەبەبى ازاماتتار ءاربىر باعدارلاماعا ءارتۇرلى قۇجاتتار جينايدى. ەندى, ءبارى بىردەي بولادى», – دەدى مينيستر. جاڭا باعدارلامانىڭ اياسىندا كەز كەلگەن ادام نارىقتىق سۇرانىسى بار ماماندىقتى يگەرە الادى. ال جۇمىس تاپپاسا, جەكە بيزنەستى اشۋعا مۇمكىندىك بار. بيۋدجەت قارجىسى بولسا بۇرىنعى باعدارلامالاردان تارتىلادى. «2017 جىلعا 66 ملرد تەڭگە, 2018 جىلعا 82 ملرد تەڭگە, 2019 جىلعا تاعى وعان قوسىمشا قارجى قوسىلادى. ول 96 ملرد تەڭگەنىڭ كولەمىندە بولادى دەپ وتىرمىز. بۇل قاراجات بۇگىنگى جۇمىسپەن قامتۋ باعدارلاماسى, «بيزنەستىڭ جول كارتاسى», سونىمەن بىرگە «دامۋ» قورىنىڭ ەسەبىنەن تارتىلادى», – دەدى دەنساۋلىق ساقتاۋ جانە الەۋمەتتىك دامۋ ءمينيسترى.