نىسانباەۆ: ىرعىز-تورعاي تابيعي رەزەرۆاتىن ۇلعايتامىز

بيىل ىرعىز-تورعاي تابيعي رەزەرۆاتى اۋماعى 410 مىڭ گەكتارعا ۇلعايتىلادى. بۇل تۋرالى بۇگىن قر پارلامەنتى ماجىلىسىندە ءوتىپ جاتقان «وسىمدىكتەر مەن جانۋارلار دۇنيەسىن قورعاۋدىڭ, ءوسىمىن مولايتۋدىڭ جانە ولاردىڭ وبەكتىلەرىن ورنىقتى پايدالانۋدىڭ وزەكتى ماسەلەلەرى» تاقىرىبىندا ءوتىپ جاتقان دوڭگەلەك ۇستەل وتىرىسى بارىسىندا اۋىل شارۋاشىلىعى ۆيتسە-ءمينيسترى ەرلان نىسانباەۆ مالىمدەدى. «بيولوگيالىق سانالۋاندىق پەن تابيعي ەكوجۇيەلەردى ساقتاپ قالۋدىڭ ەڭ ءتيىمدى شاراسى – ەرەكشە قورعالاتىن تابيعي اۋماقتاردى دامىتۋ. قازاقستان 1994 جىلى قوسىلعان بيولوگيالىق سانالۋاندىلىق تۋرالى كونۆەنتسيادا ەرەكشە قورعالاتىن تابيعي اۋماقتاردىڭ كولەمىن ءاربىر ەلدە 2020 جىلعا قاراي 17 پايىزعا دەيىن ۇلعايتۋ كوزدەلگەن. ەلىمىزدە ەرەكشە قورعالاتىن تابيعي ايماقتاردىڭ جالپى كولەمى 24 ملن. گەكتاردى نەمەسە ەل اۋماعىنىڭ 8,8 پايىزىن قۇرايدى. كونۆەنتسيا ۇسىنىستارىن ورىنداۋ ءۇشىن ءبىز ەرەكشە قورعالاتىن تابيعي اۋماقتاردى 46,3 ملن. گەكتارعا  جەتكىزۋىمىز, ياعني, 22,3 ملن. گەكتارعا ۇلعايتۋىمىز قاجەت», – دەدى نىسانباەۆ. ونىڭ اتاپ وتۋىنشە, سوڭعى  جىلدارى رەسپۋبليكادا ەرەكشە قورعالاتىن تابيعي اۋماقتار جەلىسىن ودان ارى دامىتۋ بويىنشا بىرقاتار جۇمىس جۇرگىزىلىپ جاتىر. ماسەلەن, 2013-2015 جىلدارى ارالىعىندا 7 جاڭا ەرەكشە قورعالاتىن تابيعي اۋماق قۇرىلىپ, بۇرىننان بار 6 اۋماقتىڭ القابى كەڭەيتىلگەن. «بيىل ىرعىز-تورعاي تابيعي رەزەرۆاتى اۋماعىن 410 مىڭ گەكتارعا ۇلعايتۋ ءىس-شارالارى جۇرگىزىلۋدە», – دەدى ۆيتسە-مينيستر.