جامبىل وبلىسىندا التىن ءوندىرۋ تەحنولوگياسى بار زاۋىت سالىنادى

گەرمانيانىڭ «Aurum Deutschland AG» (اۋرۋم دويچلاند اگ) كومپانياسى قورداي اۋدانىنداعى كەن ورنىنا ارنايى ازىرلەنگەن التىن ءوندىرۋدىڭ بىرەگەي تەحنولوگياسىن پايدالانۋدى جوسپارلاۋدا, دەپ حابارلادى قازاقپارات. تارازدا وتكەن Taraz Invest – «AgroChemical Day 2016» ينۆەستفورۋمىندا جامبىل وبلىسىنىڭ اكىمى مەن «Aurum Deutschland AG» كومپانياسى اراسىندا تاۋ-مەتاللۋرگيالىق كومبيناتتىڭ قۇرىلىسى تۋرالى مەموراندۋمعا قول قويىلدى. قورداي اۋدانىندا تاۋ-كەن كومبيناتىن تۇرعىزۋ جانە التىن كەنىن بايىتۋ تۋرالى كەلىسىمگە جامبىل وبلىسىنىڭ اكىمى كارىم كوكىرەكباەۆ پەن «Aurum Deutschland AG» جشس باس ديرەكتورى يوگان شتول قول قويدى. مايبۇلاق التىن كەن ورنىنداعى زاۋىتتىڭ جوسپارلانعان جىلدىق قۋاتى – 5-6 توننا. قۇرىلىستىڭ قۇنى شامامەن 250 ميلليون دوللارعا جەتەدى, ال جوبانىڭ جالپى قۇنى - 300 ميلليون دوللار, نەمىس كومپانياسى ءوز اكتسيالارىنىڭ 100% يە.  قورداي اۋدانىندا شامامەن 900 جاڭا جۇمىس ورنى اشىلادى. «قازىر مايبۇلاق كەن ورنىن بارلاۋ ۇستىندەمىز, - دەپ جالعاستىردى كومپانيا ديرەكتورى. - ءبىز وعان 30 ميلليون دوللار قارجى سالدىق, ءۇش جىلدا بىتىرەمىز دەگەن ويدامىز. قازىر جوبالىق جۇمىستار ءجۇرىپ جاتىر, ولاردى ءالى دە قورعاپ شىعۋ كەرەك. سوندا, شامامەن ءبىر جارىم جىلدان سوڭ زاۋىت قۇرىلىسىن باستايمىز. التىندى ءوندىرۋ جۇيەسى جاڭا گەرمانيالىق تەحنولوگيامەن جۇزەگە اسادى, ول ءالى الەمدە جوق, العاش رەت وسى جەردە سىناپ كورەمىز. جۇيە ازىرلەنىپ دايىن تۇر, ءبىز التىنمەن بىرگە وزگە دە مەتاللدار شىعاتىن قورداي اۋدانىنىڭ كەن ورنىنا ارنالعان تەحنولوگيانى ازىرلەۋ ءۇشىن 12 ميلليون ەۋرو جۇمسادىق», – دەدى يوگان شتول.