شاھيزادا ابدىكارىموۆتىڭ شىعارماشىلىق كەشى ءوتتى

25 قاراشا كۇنى قىزىلوردادا اقىن, تەلەجۋرناليست, قر  تەلەراديوحابارلار تاراتۋشىلار ۇلتتىق قاۋىمداستىعىنىڭ پرەزيدەنتى جانە «قوعام تۆ» تەلەارناسىنىڭ قۇرىلتايشىسى شاھيزادا ابدىكارىموۆتىڭ 60 جىلدىق مەرەيتويىنا ارنالعان شىعارماشىلىق كەش ءوتتى. شاراعا قىزىلوردا وبلىسىنىڭ اكىمى قىرىمبەك كوشەرباەۆ قاتىستى. - شاھيزادا وتەتىلەۋ ۇلى شىعارماشىلىق جولىن كەڭەس جىلدارىندا باستاعان جانە ءالى كۇنگە دەيىن شىعارماشىلىقتان قول ۇزگەن جوق. ول كەزەڭدەردە شاكيزادا وتەتىلەۋ ۇلى تالانتتى جۋرناليست بولدى, ال قىزمەت باعىتتارىن ءبىر ارناعا توعىستىرۋ كەز كەلگەننىڭ قولىنان كەلە بەرمەيدى. بۇدان بولەك ول – ايماق ەكونوميكاسىنىڭ دامۋىنا زور ۇلەسىن قوسقان وبلىستىق ءماسليحات دەپۋتاتى,- دەدى ايماق باسشىسى. شىعارماشىلىق كەشتە شاھيزادا ابدىكارىموۆتىڭ ولەڭدەرى وقىلىپ, ونىڭ سوزىنە جازىلعان اندەر شىرقالدى. سونداي-اق, اۆتوردىڭ «سۇلەي داريا» اتتى ولەڭدەر كىتابىنىڭ, «ءتارجىما» قىرعىز اقىندارىنىڭ اۋدارمالار جيناعىنىڭ, «الپىس قۇلان قايىرعان» جيناعىنىڭ جانە باۋىرجان وماروۆتىڭ شاھيزادا ابدىكارىموۆكە ارناپ جازعان «گلادياتور» كىتابىنىڭ تۇساۋى كەسىلدى.