شىعارما ارقاۋى – تاۋەلسىزدىك

كەشە ورال قالاسىنداعى دوستىق ۇيىندە ايماقتىق قوعامدىق كەڭەس پەن وبلىستىق ءبىلىم باسقارماسى بىرلەسىپ ۇيىمداستىرعان مەكتەپ, كوللەدج جانە كاسىپتىك تەحنيكالىق مەكتەپ وقۋشىلارى اراسىندا تاۋەلسىزدىك تاقىرىبىنا جازىلعان شىعارماشىلىق جۇمىستاردىڭ قورىتىندىلارى شىعارىلدى. بۇل جونىندە ايماقتىق كەڭەستىڭ ساراپتامالىق-تالداۋ ءبولىمىنىڭ باس كەڭەسشىسى ايسۇلۋ مۇقاتاەۆا گازەت تىلشىسىنە بىلاي دەپ حابارلادى. شىعارما جۇمىستارىن جازۋعا وبلىستاعى ورتا مەكتەپتەردىڭ 7-11 سىنىپتارىندا جانە كوللەدجدەر مەن كاسىپتىك-تەحنيكالىق مەكتەپتەردە ءبىلىم الاتىن وقۋشىلار قاتىستى. شىعارماعا قازاق مەكتەپتەرىندە وقيتىن وزگە ەتنوس وكىلدەرىنىڭ ۇل-قىزدارى دا قاتىسىپ, باق سىنادى. وسى قاۋىرسىن قانات شىعارما يەلەرىنىڭ اراسىنان 8 جۇمىس ىرىكتەلىپ الىنىپ وڭىرلىك كەزەڭنىڭ جەڭىمپازدارى دەپ تانىلدى. ولاردىڭ بارىنە ۇيىمداستىرۋشىلار اتىنان ماراپاتتاۋ قاعازدارى تاپسىرىلدى. ءبىز وسى كونكۋرستا شىعارماسى ۇزدىك دەپ تانىلعان ورال تەحنولوگيالىق كوللەدجىنىڭ وقۋشىسى ەكاتەرينا ۆولوگينانى سوزگە تارتقان كەزدە ول بىزگە جازعان جۇمىسىنىڭ جوعارى باعالانعانىنا وتە قۋانىشتى ەكەنىن جەتكىزدى. تاۋەلسىزدىك – ءبىزدىڭ ەڭ باستى قۇندىلىعىمىز. ال قازاقستان – ءبارىمىزدىڭ ورتاق وتانىمىز. ەگەمەن ەلىمىزدىڭ ودان ءارى ءوسىپ-وركەندەۋىنە ءوز ۇلەسىمىزدى قوسۋدى باستى پارىزىمىز دەپ سانايمىز. ءبىز ءوز ەلىمىزدى ماقتان ەتەمىز. ونىڭ ءبىر كىرپىشى بولىپ قالانۋعا ءازىرمىز. مەن شىعارمامدا تاۋەلسىزدىك جونىندەگى وسى وي-پىكىرلەرىمدى جازىپ كورسەتكەن ەدىم. بۇل ەڭبەگىم قازىلار القاسى تاراپىنان ۇزدىك دەپ تانىلعان ەكەن. مەن بۇعان شەكسىز ريزامىن دەدى رەسپۋبليكالىق كونكۋرستىڭ وڭىرلىك كەزەڭىنىڭ جەڭىمپازى. تەمىر قۇسايىن, «ەگەمەن قازاقستان» ورال