نەيمار ەكى جىلعا باس بوستاندىعىنان ايرىلۋى مۇمكىن

يسپانيا پروكۋراتۋراسى «بارسەلونا» ساپىندا ونەر كورسەتەتىن نەيماردى ەكى جىلعا باس بوستاندىعىنان ايىرىپ, 10 ملن.ەۋرو كولەمىندە ايىپپۇل سالۋدى تالاپ ەتتى, دەپ حابارلادى «ينتەرفاكس». قازىرگى ۋاقىتتا سوت جۇمىستارى ءجۇرىپ جاتىر. بۇل ءىس تاعى دا سول بۇرىنعى «سانتوس» كومانداسىنان اۋىسقان كەزدە ورىن العان زاڭ بۇزۋشىلىق جونىندە. بۇدان بولەك, ترانسفەرگە قاتىسى بار «بارسەلونانىڭ» بۇرىنعى پرەزيدەنتى ساندرو روسسەل مەن قازىرگى باسشىسى جوزەپ ماريا بارتومەۋگە دە ايىپ تاعىلىپ وتىر. پروكۋراتۋرا ەكس-پرەزيدەنتتى بەس جىلعا قاماۋعا الۋدى تالاپ ەتتى. وسىعان دەيىن حابارلانعانداي, «بارسەلونا» نەيماردى ساتىپ الۋ ءۇشىن 57 ملن. ەۋرو تولەگەن. بۇل سومانىڭ تەك 17,1 ملن. ەۋروسى «سانتوسقا» بەرىلسە, قالعان قارجى فۋتبولشىعا يەلىك ەتەتىن كومپانياعا, ياعني اتا-اناسىنا اۋدارىلعان. الايدا, تەرگەۋشىلەردىڭ پىكىرى بويىنشا, ويىنشى ءۇشىن 83,3 ملن. ەۋرو (كەيبىر مالىمەتتەردە 94 ملن. ەۋرو) تولەنىپ, «كوك-انارلار» سالىق شىعىنىن وسىلايشا قىسقارتىپتى. بۇل تۇستا برازيليانىڭ DIS ينۆەستيتسيالىق كومپانياسى زارداپ شەككەن. Marca باسىلىمىنىڭ اقپارىنشا, كومپانيا ونى بەس جىلعا قامالادى دەگەن ۇمىتتە. وتكەن جىلدىڭ قىركۇيەك ايىندا برازيليا سوتى جالپى قۇنى 48 ملن.ەۋرو بولاتىن نەيماردىڭ بارلىق اكتيۆتەرىنە شەكتەۋ قويىپ, وزىنە 16 ملن.ەۋرو كولەمىندە سالىقتان جالتاردى دەگەن ايىپ تاققان بولاتىن. ايتا كەتەيىك, نەيمار «بارسەلوناعا» 2013 جىلى «سانتوس» كومانداسىنان اۋىسىپ كەلدى. وسى ۋاقىت ارالىعىندا چەمپيوندار ليگاسىن, ۋەفا سۋپەركۋبوگىن, كلۋبتىق الەم چەمپيوناتىن, يسپانيا سۋپەركۋبوگىن, ەكى مارتە يسپانيا كۋبوگىن جەڭىپ, ەكى مارتە يسپانيا چەمپيونى اتاندى.