ازاماتتىق قوعامنىڭ العاشقى نىشانى

الماتىدا وتكەن ح ازاماتتىق فورۋم ۇكىمەتتىك ەمەس ۇيىمدار مەن مەملەكەتتىك ورگانداردىڭ ءوزارا ارەكەتتەستىگىنىڭ جاڭا باعىتتارىن تالقىلاپ, ۇلكەن مەگاپوليستەگى ماڭىزدى ماسەلەلەردى بىرلەسە شەشۋ جولىن تالقىلاۋدى ماقسات تۇتتى. «بولاشاعىمىز بىرلىكتە» دەگەن ۇرانمەن وتكەن ازاماتتىق فورۋمنىڭ باستى تاقىرىبى ەلباسى ن.نازارباەۆتىڭ بەس ينستيتۋتسيونالدىق رەفورماسىن جۇزەگە اسىرۋداعى ۇەۇ-نىڭ ءرولىن  كورسەتۋگە ارنالدى. قوعامداعى ءار ادامنىڭ بەلسەندىلىگى مەن نەمقۇرايلى بولماۋىنان كوپ ماسەلە شەشىمىن تابادى. ول ءۇشىن ءار ازامات سەرگەكتىك تانىتىپ, ۇەۇ كوتەرەتىن ءتۇرلى باستامالارعا ازاماتتىق قولداۋ ءبىلدىرىپ, الەۋمەتتىك جانجالداردى ازايتۋ ءۇشىن جاعدايلار جاساۋعا, ءتۇرلى الەۋمەتتىك توپتاردىڭ جۇمىسىنا جاناشىرلىقپەن قاراۋعا, قوعامدىق ينستيتۋتتاردىڭ قاتىناس­تارىن ۇيلەستىرۋگە جاردەم بەرىپ ۇيرەنگەنى ابزال. قازاقستان حالقى اسسامبلەياسىنىڭ مۇشەسى, الماتى قالاسىنداعى كورەي ۇلتتىق ورتالىعى توراعاسىنىڭ ورىنباسارى گ.كان ەلباسىنىڭ «100 ناقتى قادام» ۇلت جوسپارىنداعى 4-قادامعا وراي, ازاماتتىق بىرتۇتاستىقتى قالىپ­تاستىرۋداعى قوعامدىق ۇيىمدار­دىڭ ءرولىن اتاپ كورسەتتى. گ.كاننىڭ, اسىرەسە, «ءاربىر جەكە ادام مەن الەۋمەتتىك توپ­تاردىڭ مەملەكەتتىك ءتىلدى مەڭگەرۋىمەن بىرگە قوعامدا كۇردەلى بولىپ كورىنەتىن كوپ ماسەلە بىردەن وڭ شەشىمىن تابار ەدى» دەگەن پىكىرىنە فورۋمعا قاتىسۋشىلار قىزۋ قولداۋ ءبىلدىردى. ازاماتتىق فورۋمدى ۇيىم­داس­تىرعان الماتى قالاسى ىشكى ساياسات باسقارماسىنىڭ باسشىسى نۇرلان سى­دىقوۆ جيىن باستالار الدىن­داعى كىرىسپە سوزىندە: «فورۋمنىڭ ءتاۋ­ەلسىزدىكتىڭ 25 جىلدىعى قارساڭىندا ءوتىپ وتىرعانى ءبىز ءۇشىن ماڭىزدى. ونىنشى رەت وتكىزىلىپ وتىرعانىنىڭ ءوزى – الماتىداعى ازا­ماتتىق قوعامنىڭ بەلسەندىلىگىنىڭ ايعاعى. رەسپۋبليكامىز بويىنشا 20 000 ۇەۇ تىركەلگەن بولسا, ونىڭ 600-گە جۋىعى الماتى قالاسىنا تيەسىلى. ازاماتتىق سەكتور – بۇل مەملەكەت پەن تۇرعىندار اراسىنداعى التىن كوپىر» دەپ اتاپ ءوتتى. قالالىق ءماسليحاتتىڭ دەپۋتاتى كونستانتين اۆەرشين سەنبى, جەكسەنبى كۇندەرى «قالانى قاردان تازالايىق!» اتتى اكتسيا ۇيىمداستىرىپ, ءوزى رەستوراتور بولعاندىقتان, باسقا ارىپتەستەرىنە ءۇن قاتىپ, قولىنا كۇرەك ۇستاپ, قار كۇرەۋگە شىققان بارلىق ەرىكتىلەردى ىستىق اسپەن قامتاماسىز ەتكەن. ح ازاماتتىق فورۋمنىڭ اياسىندا قوعامدىق ماڭىزى بار جانە الەۋمەتتىك ىرگەلى ىستەردى جۇزەگە اسىرۋدا ەرەكشە تابىسقا جەتكەن ۇزدىك جوبا يەلەرىن انىقتاپ, ماراپاتتايتىن «ورلەۋ-2016» سىيلىعىن سالتاناتتى تابىستاۋ ءراسىمى ءوتتى. بيىلعى «ورلەۋ-2016» بايقاۋىنىڭ جەڭىمپازدارى بولىپ رەسپۋبليكالىق «ارداگەرلەر ۇيىمى» قوعامدىق بىرلەستىگى الماتى بولىمشەسىنىڭ جەتەكشىسى ەرەنعايىپ شايحۋتدينوۆ, «كومەكتەس» قوعامدىق ۇيىمىنىڭ جەتەكشىسى الەكساندر ساپەلكين, «Reliance» قو­عامدىق قورىنىڭ ءتورايىمى ساۋلە الپىسوۆا, ەكولوگيالىق باعىتتاعى «يا – الماتينەتس» قوعامدىق بىرلەستىگىنىڭ باسشىسى كونستانتين اۆەرشين, «اۆرورا» قوعامدىق قورىنىڭ باسشىسى رۋبەن كازاريان, «شاراپات» مۇگەدەكتەردىڭ جاستار ۇيىمى» قوعام­دىق بىرلەستىگىنىڭ جەتەكشىسى راۋشان مانانباەۆا, «ديابەت قورى» قوعامدىق قورىنىڭ باسشىسى ناتاليا تۋكالەۆسكايا, «فوند جەنسكوگو ليدەرستۆا» قوعامدىق قورىنىڭ ءتورايىمى ماريا گۋسەينوۆا, «رودنيك» قوعامدىق ۇيىمىنىڭ ءتورايىمى نينا بالاباەۆا تانىلدى. ۇزدىك جوبالارىمەن ۇلكەن جەتىس­تىككە جەتكەن ۇەۇ-نىڭ جەڭىم­پاز­دارىن الماتى قالاسى ىشكى سايا­سات باسقارماسىنىڭ باسشىسى نۇر­لان سىدىقوۆ, الماتى قالاسى قوعام­دىق كەڭەسىنىڭ توراعاسى, «تۇران» ۋني­ۆەرسيتەتىنىڭ رەكتورى راحمان ال­شانوۆ, «اقپاراتتىق رەسۋرس­تار ورتالىعى» قوعامدىق قورىنىڭ ءتور­ايىمى التىناي كوبەەۆا ماراپاتتادى. جيىنعا قاتىسۋشىلار 25 قاراشا كۇنى استانادا وتەتىن قازاقستان رەسپۋبليكاسى ازاماتتىق فورۋمىنا دەلەگات بولىپ باراتىن ۇمىتكەرلەردى ۇسىنىپ, ولارعا داۋىس بەردى, ءنا­تيجەسىندە, 10 دەلەگاتتىڭ ەسىم-سويى ناقتىلاندى. ايگۇل احانبايقىزى, «ەگەمەن قازاقستان» الماتى