اكادەميا جۋرنالى Scopus بازاسىنا ەندى

الماتىداعى عىلىم ورداسىندا «قازاقستان رەسپۋبليكاسى ۇلتتىق عىلىم اكادەمياسى حابارلارى. گەولوگيا جانە تەحنيكالىق عىلىمدار سەرياسى» جۋرنالىنىڭ رەداكتسيالىق القا مۇشەلەرىنە Scopus حالىقارالىق مالىمەتتەر بازاسىندا يندەكستەۋ جونىندەگى كۋالىك سالتاناتتى تۇردە تابىس ەتىلدى. ۇلتتىق عىلىم اكادەمياسىنىڭ 1946 جىلدان باستاپ شىعىپ تۇراتىن 8 عىلىمي جۋرنالى («ۇعا بايان­دامالارى», «ۇعا حابارشىسى», «ۇعا حابارلارى. بيولوگيالىق جانە مەديتسينالىق سەرياسى», «ۇعا حابار­لارى. فيزيكا-ماتەماتيكالىق سەرياسى», «ۇعا حابارلارى. گەولو­گيا جانە تەحنيكالىق عىلىمدار سەرياسى», «ۇعا حابارلارى. حيميا جانە تەحنولوگيا سەرياسى», «ۇعا حابارلارى. قوعامدىق عىلىمدار جانە گۋمانيتارلىق عىلىمدار سەرياسى», «ۇعا حابارلارى. اگرارلىق عىلىمدار سەرياسى») 1960-70-جىلدارى-اق رەيتينگتەرى جوعارى حالىقارالىق عىلىمي جۋرنالداردىڭ تىزىمىنە قوسىلعان بولاتىن. اكادەميانىڭ اتالمىش عى­لى­مي جۋرنالدارى 1960 جىلدان باستاپ اقش, ۇلىبريتانيا, گەر­مانيا, فرانتسيا, جاپونيا سياقتى 73 مەملەكەتتىڭ ءىرى ۇلتتىق كىتاپحانالارىنا جىبەرىلىپ تۇرادى. وسى جۋرنالداردى تۇگەلدەي حالىقارالىق رەيتينگ بەرۋ جانە ايگىلى Elsevier كومپانياسىنىڭ Scopus مالىمەتتەر بازاسىنا قوسۋ ءجونىن­دەگى ءىس-شارالار تولىق جۇزەگە اسار بولسا, قازاقستاندىق عالىمدار, وقىتۋ­شىلار مەن ستۋدەنتتەر كوپ­تەگەن ماتەريالدارعا, ايماقتىق زەرتتەۋ اقپاراتتارى مەن پايدالى سىلتەمەلەرگە, الەمدىك زەرتتەۋلەر سالاسىنداعى قازىرگى ۇردىستەردىڭ تولىق نۇسقاسىنا قول جەتكىزە الماق. الەمدىك رەفەراتيۆتىك بازاسىندا 21000-نان استام عىلىمي-تەحنيكالىق جانە مەديتسينالىق, 5000-عا جۋىق حالىقارالىق باسىلىم يندەكستەلەتىن Scopus ءمالى­مەتتەر بازاسىنا ەنىپ وتىرعان «ۇعا حابارلارى. گەولوگيا جانە تەحنيكالىق عىلىمدار سەرياسى» جۋرنالىنىڭ رەداكتسيالىق القا مۇشەلەرىنىڭ مۇنداي ۇلكەن جەتىستىككە جەتۋىنە جۋرنال اۆتور­لارى­­نىڭ دا جوعارى ساپالى عىلىمي ماقا­لالارىنىڭ جاريالانىپ وتىر­ۋى سەبەپشى بولسا كەرەك. ەندى اكا­دەميانىڭ قالعان ءتورت جۋرنالىن دا وسى حالىقارالىق بازاعا كىرگىزۋ مۇمكىندىگى قاراستىرىلۋدا. نيدەرلاندتىڭ امستەردام قالا­سىنان وسى سالتاناتتى جيىنعا ارنايى كەلىپ, ۇلتتىق عىلىم اكادەمياسىنىڭ پرەزيدەنتى, پروفەسسور مۇرات جۇرى­نوۆقا ءوز قولى­مەن كۋالىك تابىس ەتكەن Elsevier حالىقارالىق كومپانياسىنىڭ اتقارۋشى ۆيتسە-پرەزيدەنتى دجينو ۋسسي ءوز بايانداماسىندا: «الەم بو­يىنشا 130-عا جۋىق مەملەكەت عالىم­دارى Scopus مالىمەتتەر بازا­سىندا ماقالالار جاريالاپ وتىرادى, سولاردىڭ ىشىندە قازاق­ستان عالىمدارى دا بار. الايدا قازاقستاندىق عالىمدار ەڭبەگىنىڭ ساپاسى ءالى دە بولسا ىزدەنۋدى قاجەت ەتەدى. مەنىڭشە, سىزدەر دامىعان ەلدەر ۇلگىسى بويىنشا دامىتۋدى اسا قاجەت دەپ سانايتىن سالالاردى عانا تاڭداپ الىپ, سول باعىتتاعى عىلىمي ىزدەنىستەردى تەرەڭدەتكەندەرىڭىز ءجون»,  دەگەن كەڭەسىن ايتتى. ەلىمىزدىڭ الەمدىك كەڭىستىككە ەگە­مەندى مەملەكەت رەتىندە كىرۋى قازاق­ستاندىق عىلىمنىڭ دا بىرىڭعاي حالىقارالىق عىلىمي كەڭىستىك ينتەگ­راتسياسىنا اكەلۋدە. قازاقستاننىڭ الدىڭعى قاتارلى عالىمدارى, ياعني اكادەميانىڭ تولىق مۇشەلەرى (اكادەميكتەر) مەن كوررەسپوندەنت-مۇشەلەرى, شەتەلدىڭ قۇرمەتتى مۇشەلەرى كىرەتىن ۇلتتىق عىلىم اكادەمياسى JAP (حالىقارالىق عىلىمي ماسەلەلەر بويىنشا اكادەمياارالىق كەڭەسى), حعاق (حالىقارالىق عىلىم اكادە­ميالارىنىڭ قاۋىمداستىعى), TWAS ء(ۇشىنشى الەم ەلدەرىنىڭ عىلىم اكادەميالارى), AASSA (ازيا ەلدەرىنىڭ عىلىم اكادەميالارى قاۋىم­داستى­عى), يىۇ عاق سياقتى بىرقاتار حالىق­ارالىق عىلى­مي ۇيىمداردىڭ مويىن­دالعان مۇشەسى بولىپ سانالادى. سالتاناتتى جيىنعا ءال-فارابي اتىنداعى قازۇۋ رەكتورى عالىمقايىر مۇتانوۆ, ءبىلىم جانە عىلىم مينيستر-لىگى عىلىم كوميتەتى توراعاسىنىڭ ورىن­با­سارى اسقار جاركەنوۆ, وتاندىق عى­لىم سالاسىنىڭ مايتالماندارى مەن عى­لىمي جۋرنالداردىڭ باسشىلارى قاتىسىپ, ءسوز سويلەدى. ميرا بايبەك, «ەگەمەن قازاقستان» الماتى