ءال-فارابيدەن ءال-ماشانيگە دەيىن

قازاقتىڭ ماڭدايىنا بىتكەن اقىل-وي يەلەرى تاريح بەتىن پاراقتاپ وتىرساڭ, جۇزدەپ سانالادى. اناۋ عاسىرلارداعى اناحارسيستەن باستاپ ءال-فارابي, اباي, الاش ارىستارى – وسىلاي جالعاسىپ كەتە بەرەدى. وتكەن عاسىرداعى سول ۇلىلاردىڭ ويىن دامىتىپ, جولىن جالعاعان عۇلاما عالىم, ءوزى سەكىلدى ەل جاقسىلارىمەن قاتار ءجۇرىپ, ۇلتتىق عى­لىم اكا­دەمياسىنىڭ ىرگە­تاسىن قالاعان, العاش­قى كوررەسپوندەنت-مۇشە­لەرىنىڭ ءبىرى بولىپ سانالعان. اقجان ءال-ماشاني ەدى. ماماندىعى كەنشى بولسا دا قازاقتىڭ كەڭ دالاسىنداعى جەر بايلىعى مەن ۇلتقا كە­رەك رۋحاني بايلىقتى قاتار الىپ ءجۇردى. سول اي­تۋلى تۇلعانىڭ 110 جىل­دىعىنا وراي ل.ن.گۋميلەۆ اتىنداعى ەۋرازيا ۇلت­تىق ۋنيۆەرسيتەتى تاريح فاكۋلتەتى «اقجان ءال-ماشاني جانە فارابي­تانۋ تاعىلىمى» اتتى رەس­پۋبليكالىق عىلىمي-ءتا­جى­ريبەلىك كونفەرەنتسيا ءو­تكىزدى. كەلىستى باسقوسۋدى ءبىلىم ورداسىنىڭ پرورەكتورى, ۇعا كوررەسپوندەنت-مۇشەسى ديحان قامزابەك ۇلى اشىپ, الاش رۋحتى ءال-ماشانيدىڭ كەڭەس ءداۋىرىنىڭ وزىندە ۇلت مۇراتى دەگەندە ۇلى ىستەر اتقارعانىن تاراتا ايتسا, پروفەسسور تىلەگەن سادىقوۆ عۇلاما عالىمنىڭ ماڭگىلىك ەلدىڭ مۇرات-ماق­ساتى بيىك بولاتىنىن دايەكتەپ كەتكەنىن العا تارتتى. پروفەسسور سەرىك نەگيموۆ عالىم تۋرالى ەستە­لىكتەر ايتىپ, ءال-فارابي مەن قازاقتى قاۋىشتىرعان ءال-ماشاني ەكەنىن جەتكىزدى. ال عالىمنىڭ باي مۇراسىن زەرتتەپ, زەردەلەپ جۇرگەن پروفەسسور زاداش دۇكەنباەۆا ايتۋلى وقىمىستىنىڭ 110 جىلدىق مەرەيتويىنا ارنالعان  ءىس-شارالار تۋرالى وي قوزعاپ, 100 جىلدىعى يۋنەسكو كولەمىندە اتالىپ وتكەنىن, وسى شارانىڭ ءوزى ەل تاۋەلسىزدىگىنىڭ 25 جىل­دىعىنا ارنالىپ وتىرعانىن تىلگە تيەك ەتىپ, قازاق باتىرى قاسىم قايسەنوۆتىڭ باۋىرجان مومىش ۇلى تۋرالى ەستەلىگىن ەسكە سالىپ, «ءال-فارابي بابامىزدىڭ الەمدە بارىن العاش اقجان ماشانوۆ جەتكىزگەنىن بىلە­سىڭ بە؟» دەپ سۇراپ, «ۇلت جوقشىسى وسىلاي بولادى» دەگەنىن مىسالعا كەلتىردى. كونفەرەنتسيادا ءال-فا­رابي مەن ءال-ماشاني تۋرالى كەلەلى اڭگىمەلەر قوز­عالىپ, الدا اتقارۋعا ءتيىس كەمەل ىستەرگە ۇيىتقى بولۋى جايى دا نازاردان تىس قالمادى. سۇلەيمەن مامەت, «ەگەمەن قازاقستان»