گولوۆكين: شارشى الاڭدا وزىڭە دەگەن سەنىمدىلىك بولۋ كەرەك

WBA (Super), IBO, WBC جانە IBF تۇجىرىمدارى بويىنشا الەم چەمپيونى قازاقستاندىق گەننادي گولوۆكيننىڭ (36-0, 33 كو) Big Bear لاگەرىندە وتكىزگەن جاتتىعۋلارىنا قاراپ WBA (Regular) بەلبەۋىنىڭ يەگەرى امەريكالىق دەنيەل دجەيكوبستى (32-1, 29 كو) جەڭەتىنىن الدىن الا بىلۋگە بولادى, دەپ جازادى LA Times باسىلىمى. «بىزگە كەلىپ جاتتىعاتىن تالاناتتى جاستار كوپ. بىراق ولار مەنىڭ جاساعانىمدى قايتالاي المايدى. جاستار ءۇشىن بۇل تىم كۇردەلى. مۇندا كەلگەندەر مەنىڭ وزگەشە دايىندالاتىنىمدى بىلەدى. 34 جاسقا كەلسەم دە, جوعارى دەڭگەيدە جاتتىعىپ ءجۇرمىن, ارينە بۇل مەنى قۋاندىرادى», – دەدى گولوۆكين. GGG-ءدىڭ كۇشىنە شەك كەلتىرۋگە بولماس. 36 جەكپە-جەكتىڭ 33-ءىن مەرزىمىنەن بۇرىن اياقتاپ, 23 كەزدەسۋىن قاتارىنان نوكاۋتپەن جەڭگەن, دەپ جازادى LA Times. «ۋاقىت وتە كەلە بالكىم قارسىلاستارىمنىڭ سوققىلارىن سەزىنەتىن بولارمىن. مۇمكىن سول كەزدە جۇرەكسىنەتىن شىعارمىن. بىراق قازىرگى ۋاقىتتا ءوزىمدى بارىنشا كۇشتى سەزىنۋ ءۇشىن تىنباي جاتتىعىپ ءجۇرمىن. قارسىلاستارىمنىڭ سوققىسىنا توتەپ بەرۋ ءۇشىن يەگىم مەن موينىمنىڭ بۇلشىق ەتتەرىن ءجيى شىنىقتىرامىن. سەبەبى, ءبىر عانا سوققى جوسپارىمنىڭ كۇل-تالقانىن شىعارۋى مۇمكىن», – دەدى قازاقستاندىق بوكسشى. گەننادي سوڭعى سپاررينگ كەزىندە ەكىنشى ورتا سالماقتاعى بريتان بوكسشىسى دجوردج گروۋۆستىڭ قابىرعاسىن سىندىرىپتى. ال سوڭعى جەكپە-جەگىندە قارسىلاسى كەلل برۋكتىڭ كوزىن شىعارا جازداعان بولاتىن. «بۇل جەردە كوپ نارسە تەك كۇشكە عانا بايلانىستى ەمەس. شارشى الاڭدا ءوزىڭدى ۇستاۋىڭ, سەنىمدىلىگىڭ بولۋ كەرەك», – دەدى ول. ايتا كەتەيىك, گولوۆكين 18 ناۋرىزدا نيۋ-يوركتەگى Madison Square Garden ارەناسىندا امەريكالىق دەنيەل دجەيكوبسپەن جۇدىرىقتاسادى. ەلىمىزدە بۇل كەزدەسۋدى «قازاقستان» جانە «KazSport» تەلەارنالارى 19 ناۋرىزدا 08:00-دە تىكەلەي ەفيردە كورسەتەدى.