«EXPO 2017» كورمەسىنىڭ اشىلۋىن تاماشالاۋعا ەلىمىزگە الەمنىڭ تۇكپىر-تۇكپىرىنەن قوناقتار كەلەدى دەپ كۇتىلۋدە. ولارعا جايلى جاعداي جاساۋ, وزدەرىنىڭ سالتتارىنا جاقىن قىزمەت كورسەتەتىن قوناقۇيلەرمەن, ءتيىستى تاعام ونىمدەرىمەن قامتاماسىز ەتۋ شارالارى ۇيىمداستىرىلىپ كەلەدى. مۇسىلمان ەلدەرىنەن كەلەتىن قوناقتار دا از ەمەس, دەپ جازادى قازاقستان مۇسىلماندارى ءدىني باسقارماسىنىڭ رەسمي سايتى. مۇسىلمان ەلدەرىنەن كەلەتىن قوناقتارعا جوعارى دەڭگەيدە قىزمەت كورسەتۋ ماقساتىمەن استانا قالاسىنىڭ قوناقۇيلەرىن, قوعامدىق تاماقتانۋ ورىندارىن شاريعات تالاپتارىنا سايكەس سەرتيفيكاتتاۋ قولعا الىنىپ وتىر. وسىعان وراي, استانا قالاسى اكىمشىلىگىنىڭ «استانا كونۆەنشن بيۋرو» جشس-نىڭ ديرەكتورى سانيار ايتەكەنوۆ قازاقستان مۇسىلماندارى ءدىني باسقارماسىنىڭ توراعاسى ەرجان قاجى مالعاجى ۇلىنىڭ قابىلداۋىندا بولدى. كەزدەسۋ بارىسىندا باس ءمۇفتي قمدب تاراپىنان حالال سەرتيفيكاتتاۋ سالاسىندا «حالال دامۋ» جشس قىزمەت اتقارىپ جاتقاندىعىن ايتىپ, بۇل سالانىڭ ءمانى مەن ماڭىزىنا قىسقاشا توقتالىپ ءوتتى. وتىرىس سوڭىندا تاراپتار بىرلەسىپ جۇمىس جاساۋعا دەگەن ءوزارا ىقىلاستارىن ءبىلدىرىپ, ەكىجاقتى مەموراندۋمعا قول قويدى. ەندىگى كەزەكتە قمدب مەن استانا اكىمشىلىگى بىرلەسىپ قالالىق قوناقۇيلەردى شاريعات تالاپتارىنا سايكەس سەرتيفيكاتتاۋ جۇمىستارىنا كىرىسۋدى جوسپارلاپ وتىر.
