فرانتسيا پروكۋراتۋراسى مەملەكەت پرەزيدەنتتىگىنە كانديداتتاردىڭ ءبىرى فرانسۋا فيونعا قارسى قىلمىستىق ءىس قوزعالعانىن حابارلادى, دەپ جازادى ۆۆس. ول فرانتسۋز پارلامەنتىندە دەپۋتات بولعان كەزدە ءوز وتباسى مۇشەلەرىنە زاڭسىز ەڭبەكاقى تولەگەن دەپ ايىپتالۋدا. ۆەدومستۆونىڭ حابارلاۋىنشا, فيونعا مەملەكەتتىڭ قاراجاتىن جۇمسادى دەگەن ايىپ تاعىلعان. فيوننىڭ قورعاۋشىسى بۇل اقپاراتتى رەسمي تۇردە راستادى.
فيون ءوزىنىڭ ايەلىن جۇمىسقا ورنالاستىرىپ, وعان ەڭبەكاقى تولەگەن. بىراق ءىس جۇزىندە ول ەش قىزمەت اتقارماعان. 1986 - 2013 جىلدار ارالىعىندا پەنەلوپ جالاقى رەتىندە مەملەكەت بيۋدجەتىنەن جۇزدەگەن مىڭ ەۋرو العان. فرانتسيانىڭ Le Canard enchaîné باسىلىمى حابارلاعانداي, پەنەلوپ فيون پارلامەنتتەگى كۇيەۋىنىڭ كومەكشىسى رەتىندە 500 مىڭ ەۋرو پايدا تاپقان. فرانتسيا زاڭى بويىنشا كومەكشى رەتىندە وتباسى مۇشەلەرىن قابىلداۋعا تىيىم سالىنباعان. بىراق پەنەلوپ فيونعا وتە كوپ مولشەردە جالاقى بەلگىلەنگەن, سونىمەن قاتار ول 2012-2013 جىلدار ارالىعىندا كۇيەۋىنىڭ دوسى مارك لادرە دە لاشارەر اتتى كاسىپكەردىڭ جۋرنالىنان دا ايىنا 3,5 مىڭ ەۋرو الىپ وتىرعان. فيون وزىنە تاعىلىپ وتىرعان ايىپتارمەن كەلىسپەيتىنىن ايتتى. ەستەرىڭىزگە سالا كەتسەك, فرانتسياداعى پرەزيدەنتتىك سايلاۋدىڭ العاشقى كەزەڭى 23 ساۋىردە وتەدى. فيوننان باسقا پرەزيدەنتتىككە ەمانۋەل ماكرون مەن مارين لە پەن ۇمىتكەر. وسى داۋدان كەيىن العاشقى ورىندا كەلە جاتقان فرانسۋا فيون قازىر ءۇشىنشى ورىندا تۇر.
