قر ءىىم ۋاقىتشا تىركەۋگە جاتپايتىن ازاماتتار ساناتىن اتادى

قر ءىىم مەملەكەتتىك ءتىل جəنە اقپارات دەپارتامەنتىنىڭ ديرەكتورى الماس سادۋباەۆ ءوزىنىڭ فەيسبۋكتەگى پاراقشاسىندا  ۋاقىتشا تىركەۋدەن بوساتىلاتىن ازاماتتار ساناتىن اتادى. «ازاماتتاردى تىركەۋگە قاتىستى ماسەلەنى ايتا كەتەيىن. جاڭادان سالىنعان ۇيلەردىڭ ءتيىستى قۇجاتتارى دايىن ەمەس, سول سەبەپتى وسىنداي ۇيلەردە تۇرىپ جاتقان ازاماتتار تۇرعىلىقتى جەرى بويىنشا تىركەلە المايدى. وسى جاعدايعا بايلانىستى ءبىز جوعارى سوت, باس پروكۋراتۋرا, ادىلەت مينيسترلىگىمەن ارنايى شەشىم قابىلدادىق. جاڭادان سالىنعان ۇيلەردە تۇرىپ جاتقانداردى جاۋاپكەرشىلىككە تارتۋ دۇرىس ەمەس. وسى شەشىمگە سايكەس, وبلىستارداعى كوشى-قون پوليتسياسى بولىمشەلەرىنە ءتيىستى تۇسىنىكتەمەلەر بەرىلدى. بۇعان قوسا, ۇكىمەت قاۋلىسىنىڭ جوباسىنا تولىقتىرۋ ەنگىزىلدى. ول ۋاقىتشا تىركەۋگە جاتپايتىن ازاماتتاردىڭ ساناتىن قاراستىرادى. بۇلار 16 جاسقا تولماعان بالالار, ناۋقاس ازاماتتار جانە ەمدەلۋدە جاتقاندار, ۆاحتالىق ادىسپەن جۇمىس جاسايتىندار, əسكەردەگى ساربازدار», - دەپ جازدى الماس سادۋباەۆ.