«سىناقتىڭ قاندايىنا بولسا دا دايىنمىن»

دزيۋدو كۇرەسىندە وزىندىك قولتاڭباسىمەن جارقىراي كورىنگەن بالۋاننىڭ ءبىرى, ازيا چەمپيوناتتارىنىڭ كۇمىس جانە قولا جۇلدەگەرى, ازيا ويىندارىنىڭ كۇمىس مەدال يەگەرى يسلام بوزباەۆ ەكى جىلداي ۇزىلىستەن كەيىن ەل قۇراماسىنا قايتا ورالدى. ورالعاندا دا دارىندى دزيۋدوشى قانجىعاسى مايلانىپ, ولجالى ورالدى. ول ازەربايجان استاناسىندا وتكەن Grand Slam تۋرنيرىندە 90 كيلو سالماق دارەجەسىندە توپ جارىپ, مۇنداي دەڭگەيدەگى دودانىڭ التىن جۇلدەسىن ۇتقان ءتورتىنشى قازاقستاندىق دزيۋدوشى اتاندى. كەشە ەلگە ورالعان بالۋانمەن تەلەفون ارقىلى تىلدەسۋدىڭ ءساتى تۇسكەن ەدى. تومەندە سول جە­دەل سۇحباتتى سىزدەردىڭ نازار­لا­رىڭىزعا ۇسىنىپ وتىرمىز. – يسلام, جەڭىس قۇتتى بولسىن! جالپى, قۇراما كو­مانداعا ورالۋىڭ دا سەنىڭ جان­كۇيەرلەرىڭ ءۇشىن قۋانىشتى وقيعا بولىپ جاتىر... – راحمەت! تاعدىردىڭ جازۋى شىعار – قيىن سىناقتى باس­تان وتكەردىم. وسى كەزدە ماعان سەنىم ءبىلدىرىپ, قولداۋ كور­سەت­كەن جانداردىڭ بارىنە, اتاپ ايتقاندا جەكە باپكەرىم سەر­گەي دميتريەنكوعا, ۇلت­تىق قۇرامانىڭ جاتتىقتىرۋ­شى­لارىنا جانە دە قۇراماداعى دوستارىما, ءوزىمنىڭ جانكۇيەرلەرىمە مىڭ مارتە العىس ايتقىم كەلەدى. وتكەننەن ساباق الۋ – كىم-كىمگە بولسا دا اسا پايدالى دۇنيە دەپ ويلايمىن... – باكۋدەگى «ۇلكەن دۋلىعا» دوداسىنا ورالساق... قاي بەلدەسۋ سەن ءۇشىن, اسىرەسە قيىنعا سوقتى؟ – شىنىمدى ايتسام, وڭايى بولمادى. گوللانديالىق نوەل ۆان تە ەندپەن اراداعى ەكىنشى بەلدەسۋدىڭ اسا تارتىستى وتكەنىن ايتۋعا بولادى. ارينە, مۇنداي تۋرنيردە فينالدىق بەلدەسۋدىڭ جاۋاپكەرشىلىگى مول بولاتىنى بار. قارسىلاسىم, تاتامي يەسى مامەدالي مەحديەۆ مىقتى بالۋان­داردىڭ ءبىرى. گران-پري تۋرنيرلەرىنىڭ بىرنەشە مارتە جۇلدەگەرى, 2016 جىلى ەۋروپا كۋبوگىنىڭ جەڭىمپازى بولعان. مىنە, وسى قارسىلاسىمدى ەكى ۆازاريمەن ۇتتىم. – الداعى جوسپارىڭ تۋرالى ايتىپ بەرسەڭ... – تاياۋ كۇندەرى شىمكەنت قا­لاسىندا بولاتىن وقۋ-جاتتىعۋ جيىنىنا بارامىز. ودان كەيىن قۇراما كوماندامەن بىرگە ءتۇر­كياعا اتتانامىن. ول ەلدە 5 ءساۋىر كۇنى گران-پري سىنى وتەدى. وسى دودادا ءوزىمدى تاعى دا جاقسى قىرلارىمنان كورسەتسەم دەيمىن. شىنىن ايتقاندا, باكۋدەگى جەڭىس مەنى قاتتى جىگەرلەندىردى. وزىمە دەگەن سەنىمنىڭ قايتا ورال­­عانىن سەزىندىم. مەن ءۇشىن سەنىمدىلىك – ورگە سۇيرەيتىن, جەڭىس­تەرگە قۇلشىندىراتىن كەرەمەت كۇش. – قۇراما كومانداداعى 90 كيلو سالماقتاعى ورنىڭدى سەن جوقتا كۇرەسكەن بالۋاندار وڭاي­لىقپەن بەرە سالمايتىن شىعار؟ – البەتتە. مەن جوقتا بۇل سالماقتا سۇڭعات زاكارياەۆ پەن ءداۋ­لەتحان جاقىپوۆ ونەر كور­سەتتى. ياعني, 90 كيلو سالماقتاعى باسەكەلەستىك ۇشەۋىمىزدىڭ ارامىزدا ءوربيتىن شىعار دەپ ويلايمىن. جالپى, مەن سىناقتىڭ قان­دايىنا بولسا دا دايىنمىن. قۇراماداعى ءوزىمنىڭ ورنىمدى ويىپ الىپ, مامىر ايىنداعى ازيا بىرىنشىلىگىندە, تامىزدا وتەتىن الەم چەمپيوناتىندا كۇرەسسەم دەيمىن. – دەگەنىڭە جەت! اڭگىمەلەسكەن قايرات ءابىلدينوۆ, «ەگەمەن قازاقستان»