جۋىردا م.اۋەزوۆ اتىنداعى وڭتۇستىك قازاقستان مەملەكەتتىك ۋنيۆەرسيتەتىنىڭ ستۋدەنتى سابينا اشىرباەۆا كوركەم گيمناستيكادان «Miss Valentine» حالىقارالىق تۋرنيرىندە التىن مەدالعا يە بولدى. ەستونيانىڭ تارتۋ قالاسىندا وتكەن باسەكەگە الەمنىڭ بولاشاعىنان مول ءۇمىت كۇتتىرگەن شەبەر گيمناسشىلارى قاتىسقان بولاتىن.
كوركەم گيمناستيكامەن بەس جاسىنان باستاپ اينالىسىپ كەلە جاتقان سابينانىڭ بۇل العاشقى جەڭىسى ەمەس, ارينە. بۇگىندە اتى الەمگە تانىلا باستاعان گيمناسشى سابينانىڭ سپورتقا اۋەستىگى اۋەل باستا ءاليا ءجۇسىپوۆانى ماقتان تۇتۋدان, سوعان ەلىكتەۋدەن باستالعان ەكەن.
گيمناستيكاعا دەگەن قىزىعۋشىلىعىن بايقاعان əكەسى بەس جاسار سابينانى شىمكەنتتەگى كوركەم گيمناستيكا ۇيىرمەسىنە ءوزى جەتەلەپ اپارىپتى. ون جاسقا دەيىن العاشقى باپكەرى ولگا سميرنوۆانىڭ توبىندا, كىلەڭ وزىنەن ۇلكەن قىزدارمەن جاتتىققان. توپتا ەڭ كىشىسى بولعانىنا قاراماستان, ءوزىن قالاي دا كورسەتۋگە تىرىسقان ول كوپتىڭ اراسىندا ەلەۋسىز قالعىسى كەلمەي ەڭبەكتەندى. سپورتقا جاقىن وتباسىندا دۇنيەگە كەلگەن قىزدىڭ ىنتا-تالپىنىسى اتا-اناسى تاراپىنان ءاردايىم قولداۋ تاۋىپ وتىردى. حوببي ەمەس, ومىرىندەگى باستى نəرسە ەكەنىن دە ەرتە ۇعىنعان سابينا كوركەم گيمناستيكاعا ونەر, ءسۇيىپ اينالىساتىن ءىسى رەتىندە قاراپتى.
جوعارى نəتيجەلەرگە جەتۋ ءۇشىن الدىنا ۇلكەن-ءۇلكەن ماقساتتار قويدى. ول ماقساتتارعا جەتۋ جولىندا باپكەرلەرىمەن بىرگە تەر توكتى. بۇل ورايدا, كوركەم گيمناستيكا شەبەرى Əليا جۇسىپوۆامەن بىرگە جۇمىس ىستەگەن جەتى جىلعا جۋىق ۋاقىتتىڭ بەرگەنى مول. مىسالى, سابينا 12 جاسىندا ۇلتتىق قۇراماعا قابىلداندى, 15 جاسىندا كوركەم گيمناستيكادان سپورت شەبەرى اتاندى. ىلە-شالا «حالىقارالىق دəرەجەدەگى سپورت شەبەرى» ءنورماتيۆىن ورىنداپ, مۇنداي اتاققا 15 جاسىندا قول جەتكىزگەن تۇڭعىش سپورتشى اتاندى. بۇل ورايدا ول جەكە باپكەرى ءاليا ءجۇسىپوۆادان وزىپ وتىر. ءاليا بۇل بەلەستى 17 جاسىندا باعىندىرعان بولاتىن.
سابينا 2014 جىلى ينچحوندا وتكەن ازيا ويىندارىندا كوماندالىق جارىستا قولا الدى. 2015 جىلى العاش رەت ازيا چەمپيوناتىنا قاتىستى. جەكەلەي ونەردە ەكى قولا ۇتتى. كوماندالىق ەسەپتە دە قولا مەدالدى يەلەندى. سول جىلى ليۋكسەمبۋرگتە وتكەن حالىقارالىق تۋرنيردە ءبىر التىن, ءبىر كۇمىس ولجالادى. ودان كەيىن Əلەم چەمپيوناتىندا 18-ورىننان كورىندى. ەكىنشى رەت ازيا چەمپيوناتىنا قاتىسىپ, ەكى قولا, ەكى كۇمىس مەدال الدى.
– كوركەم گيمناستيكا ماقتانىشى Əليا ءجۇسىپوۆا – جەكە باپكەرىم. افينى, بەيجىڭ وليمپيادالارىندا قازاق كوركەم گيمناستيكاسىن əلەمگە مويىنداتقان سپورتشى شاكىرتتەرىنە باپكەرلىك كوزقاراسپەن عانا ەمەس, گيمناست تۇرعىسىنان دا قارايدى. سول سەبەپتى دە, ول كىسى ءبəرىن تۇسىنەدى. كەي كۇندەرى شارشاپ, مازاڭ بولماي تۇرادى. جاتتىعۋ بارىسىندا ءبىر جەرىڭدى اۋىرتىپ الاتىن جاعدايلار دا كەزدەسەدى. ونداي كەزدە Əليا ماقسۇتقىزى سپورتتىق جولىندا باسىنان وتكەن جاعدايلاردى ايتىپ, كوڭىلىڭدى كوتەرىپ, ءتىپتى قاناتتاندىرىپ جىبەرەدى. جارىستاردا جاقسى نəتيجە كورسەتسەڭ, «كەلەسىدە سەن مىنا بيىكتى دە باعىندىرا الاسىڭ», دەپ سەنىمىڭدى وياتادى. ءبىر سوزبەن ايتقاندا, ءبىر-ءبىرىمىزدىڭ جاي-كۇيىمىزدى وتە جاقسى سەزىنەمىز. بۇل جاتتىعۋ بارىسىنا كوپ كومەكتەسەدى. ريودا ونەر كورسەتۋگە الاڭعا شىققاندا العاشقىدا تولقىدىم. باسىمدا سان وي ساپىرىلىسىپ كەتتى. بىراق, دەرەۋ ارتىق ويلاردى ىسىرىپ تاستاپ, كوڭىلىمدى تىنىشتاندىرا الدىم. «وسى ۋاقىتقا دەيىن ۇيرەنگەنىمدى, بار قابىلەتىمدى كورسەتەمىن» دەگەن ماقساتتى عانا العا قويدىم. سوڭىمدا باپكەرىم, دوستارىم, بۇكىل ەل تۇرعانىن سەزىندىم. 24 ەلدەن بارعان 26 گيمناسشىنىڭ اراسىندا 12-ورىن الدىم. بۇل دا جاقسى كورسەتكىش. ويتكەنى, ماعان قاراعاندا تəجىريبەلى, تانىمال سپورتشىلاردىڭ ءوزى مەنەن كەيىنگى ورىنداردا قالدى. قىتايلىق ارۋ چانگ رونگ ەكەۋمىز گيمناسشىلاردىڭ اراسىندا ەڭ جاسى بولعانىمىزدى دا ايتا كەتەيىن. كەلەسى وليمپيادادا ۇزدىك وندىققا, ءتىپتى, ۇزدىك بەستىككە كىرەمىن دەپ ويلايمىن. وليمپيادادان كەلگەن سوڭ ماعان م.Əۋەزوۆ اتىنداعى وڭتۇستىك قازاقستان مەملەكەتتىك ۋنيۆەرسيتەتىنىڭ «دەنەشىنىقتىرۋ جəنە سپورت» ماماندىعىنا ۋنيۆەرسيتەتتىڭ ءبىلىم گرانتى بەرىلدى. قازىر سوندا وقىپ ءجۇرمىن», – دەيدى سابينا اشىرباەۆا.
وسى ارادا ايتا كەتەلىك, وقۋ ورنىندا سالاماتتى ءومىر سالتىن ۇستانۋعا, سپورتپەن اينالىسۋعا ەرەكشە ءمان بەرىلىپ كەلەدى. جالپى, ەل نامىسىن قورعاپ, الەمدىك ارەنالاردا, وليمپيادا ويىندارىندا كوك تۋىمىزدى جەلبىرەتكەن جەڭىمپازداردىڭ اراسىندا وسى جوعارى وقۋ ورنىنداعى دەنەشىنىقتىرۋ جانە سپورت فاكۋلتەتىندە وقىعان جانە ءبىلىم الىپ ءجۇرگەن قىزدار كوپ. كۇنى كەشە الماتىدا وتكەن ءححVىىى قىسقى ۋنيۆەرسيادادا فريستايلدان جۇلدەلى ورىننان كورىنگەن جانبوتا الدابەرگەنوۆا وسى وقۋ ورنىندا وقىدى. اۋىر اتلەتيكادان ريو وليمپياداسىنىڭ كۇمىس جۇلدەگەرى اتانعان جازيرا جاپپارقۇل دا م.اۋەزوۆ اتىنداعى وقمۋ-دىڭ ستۋدەنتى. ايگىلى گيمناسشى, ازيانىڭ ءبىرنەشە دۇركىن چەمپيونى, ەكى بىردەي وليمپياداعا قاتىسقان ءاليا ءجۇسىپوۆا, 2008 جىلعى بەيجىڭ وليمپياداسىنىڭ قولا جۇلدەگەرى اتانعان ەلەنا شالىگينا, زىلتەمىرشىلەر تاتيانا حروموۆا, دزيۋدوشى الەكساندرا پودريادوۆا, جەڭىل اتلەت تاتيانا بوچاروۆا, مەرگەن ولگا دوۆگۋن, سامبوشى پەريزات جاقىپبەكوۆا... وقۋ ورنىنىڭ تانىمال تالانتتار ءتىزىمى وسىلاي جالعاسا بەرەدى. الەمگە ايگىلى سپورتشىلاردىڭ جەڭىستى جولدارىن جالعاستىرا ريو تورىندەگى بايراقتى باسەكەگە قاتىسقان كوركەم گيمناسشى سابينا اشىرباەۆا مەن سەلينا جۇماتاەۆا بۇگىندە اتالعان وقۋ ورنىندا ءبىلىم الۋدا.
دارىندى سپورتشىلاردى قولداۋ ماقساتىندا جىل سايىن وقۋ ورنىنداعى عىلىمي كەڭەستىڭ شەشىمىمەن ۋنيۆەرسيتەت گرانتى بولىنەدى. بولاشاق جەڭىمپازداردىڭ جاتتىعۋىنا, شەبەرلىگىن شىڭداۋعا بارلىق جاعداي جاسالعان. جارىسقا, وقۋ-جاتتىعۋ جيىندارىنا قاتىسۋشىلار ءۇشىن سىناق تاپسىرۋدىڭ, ساباقتىڭ ءتيىمدى كەستەسى جاسالعان. جالپى, م.اۋەزوۆ اتىنداعى وقمۋ-دى بىلىكتىلىكپەن باسقارىپ كەلە جاتقان رەكتور جۇماحان ءمىرحالىقوۆتىڭ سپورتقا ايرىقشا كوڭىل بولەتىنى ەلگە ءمالىم. ونىڭ تالانتتى جاستارعا بارىنشا قامقورلىق تانىتىپ, قولداۋ كورسەتۋىنىڭ ارقاسىندا ۋنيۆەرسيتەتتىڭ ستۋدەنتتەرى تالاي بيىكتەردى باعىندىرىپ كەلەدى. ىرگەلى ءبىلىم ورداسى وليمپيا ويىندارى, الەم بىرىنشىلىكتەرىندە توپ جارعان ستۋدەنتتەرىن ماقتان تۇتادى. وسىنداي قولداۋ مەن قامقورلىقتان كەيىن ستۋدەنتتەر دە الاڭسىز جاتتىعىپ, ءتۇرلى دەڭگەيدەگى جارىستاردا جەڭىمپازدار قاتارىنان كورىنۋدە.
عالىمجان ەلشىباي,
«ەگەمەن قازاقستان»
وڭتۇستىك قازاقستان وبلىسى
