مۇز ۇستىندە زۋىلدايدى كولىكتەر

وبلىس ورتالىعىنداعى ۋسولكا وزە­نىندە مۇز ۇستىندە دۋەلدى اۆتوجارىس ءوتتى. بۇل جولى «بۇرقاسىن-2017» اتاۋىنا اۋا رايى دا ساي كەلدى. اقپاننىڭ اق تۇتەك بورانى, ايازىنا قاراماستان, وزەن ءۇستىن­دەگى جارىس تا قىزا ءتۇستى. اۆتو­جارىس­قا پاۆلودار, اقسۋ, ەكىباستۇز بەن اس­تانادان كەلگەن اۆتوشاباندوزدار قاتىستى. دۋەلدى اۆتوجارىستىڭ قىسقى شوۋىن تاماشالاۋعا قالا تۇرعىندارى, جاستار, قوناقتار وتە كوپ جينالدى. اۆتوجارىستاعى كولىكتەردىڭ زۋلاعان جىلدامدىقتارى, قاتىسۋشىلاردىڭ شابىتتى ساتتەرى, شۇعىل بۇرىلىستار جاسايتىن عاجايىپ كورىنىستەرى كوپشىلىكتى تاڭعالدىردى. مۇز ۇستىندەگى اۆتوجارىس ءارى ەرەكشە, ءارى قاۋىپتى. بىراق, سوعان قاراماستان, ەكسترەمالدى سپورتقا دەگەن قىزىعۋشىلىقتارى باسىم اۆتوشاباندوزدار جارىس كورىگىن قىزدىرىپ, كورەرمەندەردىڭ دە كوڭىلىنە قانات ءبىتىردى. مۇز ۇستىندەگى بۇل ەرەكشە جارىستى ەلىمىزدىڭ اۆتو-موتو-سپورت فەدەراتسياسى, قالا اكىمدىگى, وبلىستىق جاستاردىڭ باستامالارىن قولداۋ ورتالىعىنىڭ قولداۋىمەن «RedZone» قوعامدىق بىرلەستىگى وتكىزدى. قىسقى دۋەلدى اۆتوجارىس قورىتىندىسى بويىن­شا ا.ۆيندەرگوللەر, ك.چيستياكوۆ, ا.بو­چين, ن.قابدۋاليەۆ, ف.راحمەتوۆ جانە باسقالارى جەڭىمپاز اتاندى. – بيىلعى جىلعى «بۇرقاسىن-2017» اۆتوجارىسى ەكسپو-2017 حالىق­ارالىق كورمەسىن قولداۋ ماقساتىندا وتكىزىلدى. «بۇرقاسىنعا» قاتىسۋشىلار سانى جىل ساناپ ارتىپ كەلەدى, ءبىز بۇعان وتە قۋانىشتىمىز. وتكىزىلىپ وتىرعان جارىستىڭ ماقساتى – اۆتوسپورتتى كوپ­شى­لىككە تاراتۋ جانە جاستاردىڭ اۆتو­سپورت­قا جانە سالاماتتى ءومىر سالتىنا دەگەن قىزىعۋشىلىعىن ارتتىرۋ, – دەيدى «RedZone» قوعامدىق بىرلەستىگىنىڭ توراعاسى ك.مۋزالەۆسكي. فاريدا بىقاي, «ەگەمەن قازاقستان» پاۆلودار سۋرەتتەردى تۇسىرگەن ولگا مۋزالەۆسكايا