«كورەيانىڭ قازاقستاننان ۇيرەنەرى كوپ»

الماتىدا وتكەن قىسقى ۋنيۆەرسياداعا 54 ەلدەن 2 مىڭنان استام سپورتشى, الىس-جاقىن شەت ەلدەردەن مىڭداعان جانكۇيەر كەلگەنى بەلگىلى. سولاردىڭ اراسىندا جەرلەستەرىنە قولداۋ كورسەتكەن وڭتۇستىككورەيالىق كيم سانگ ۋك تە بار. – كيم سانگ مىرزا, الدىمەن ءوزىڭىز جايلى ايتىپ وتسەڭىز. – مەن – سەۋل قالاسىنىڭ تۋماسىمىن. قازىر ۋاقىتشا الماتىدا كورەيانىڭ كون­سۋل­دىعىندا قىزمەت اتقارامىن. سونىمەن قاتار, كورەيالىق «كورە يلبو» گازەتىنىڭ ال­ما­تىداعى بولىمشەسىن باس­قارىپ وتىرمىن. زايىبىم, قىزىم ۇشەۋ­مىز ۋنيۆەرسيادا تۋرالى گازەتىمىزگە ماقالالار جازىپ, سۋرەتكە ءتۇسىرىپ, جاريالادىق. – كەلەر جىلى قىسقى وليمپيادا ءسىزدىڭ ەلدە وتەدى. وسىعان بايلانىستى سەۋلدەن الماتىعا ارنايى دەلەگاتتار كەلگەن بولار؟ – ارينە, جەرلەستەرىم كەلىپ, ءبىراز تاجىريبە جيناقتاپ كەتتى. اشىلۋ سالتاناتىنان جاسالعان تەاترلاندىرىلعان كورىنىستى تاماشالادى. ءبىزدىڭ ەلدىڭ تاريحى دا ارىدە جاتىر عوي. سول جاعىنان ولار كوپ ويلاندى. مەن قازاقستاننىڭ بىرنەشە قالاسىن ارالاعانىمدى, سىزدەر تۋرالى بىلگەندەرىمدى ايتتىم. قوناقجاي حالىق ەكەندەرىڭىزدى كوردى. قاۋىپسىزدىك شاراسى, جانكۇيەرلەردىڭ ستاديونعا قالاي كىرىپ, قالاي شىعىپ جاتقانى, سپورتشىلارعا قولداۋ ءبىلدىرۋ ءۇشىن قوسىمشا اتريبۋتتاردىڭ تاراتىلۋى سەكىلدى ۇساق-تۇيەك ماسەلەلەردى دە قاپەرىنە العان ۇيىمداستىرۋشىلارعا ءبىزدىڭ ازاماتتار ءتانتى بولدى. ءتىپتى, تازالىق جاعى دا ەسكەرىلگەن. مىسال رەتىندە ايتايىن, قوناقتار كورەيادان كەلگەندە الماتىدا قالىڭ قار جاۋىپ تۇرعان ەدى. مۇنشاما قاردى تازالاۋ پروبلەما تۋدىرادى دەپ ويلاسا كەرەك, جەرلەستەرىم تاڭەرتەڭ كوشەگە شىققاندا: «كيم سانگ, كەشەگى قاردىڭ بارلىعى قايدا كەتكەن؟», دەپ تاڭدانىستارىن جاسىرا المادى. مەن كولىك قوزعالىسىنا كەدەرگى بولماۋى ءۇشىن تازالىققا جاۋاپ بەرەتىن ادامدار ءتۇنى بويى جۇمىس ىستەگەنىن ايتتىم. تىزبەكتەي بەرسەم, وسىنداي مىسالدار كوپ. ءبىر سوزبەن ايتقاندا, ۇيىمداستىرۋ جاعىنان كورەيانىڭ قازاقستاننان ۇيرەنەرى كوپ. – قار دەمەكشى, قىستا اۋا رايىنىڭ تەمپەراتۋراسى نولدەن جوعارى بولاتىن كورەيا ءۇشىن كەلەر جىلى وليم­پيادانى وتكىزۋ قيىنعا سوقپاي ما؟ – شىنى كەرەك, قازاقستان تابيعي بايلىعى جاعىنان دا, اۋا رايى تۇر­عى­سىنان دا پروبلەماسى جوق ەل دەر ەدىم. ءبىز بۇل جاعىنان ماقتانا المايمىز. بىراق قازىر تەحنيكا زامانى ەمەس پە؟ جاساندى قار دەگەن بولادى. ەگەر قار جەت­پەي جاتسا, سۋ قۇيساڭ, ونى ەكىنشى جاعىنان قار ەتىپ شىعاراتىن اپپارات بار, سونى پايدالانۋعا بولادى. بىراق, ول تابيعي قارعا جەت­پەيتىنى تاعى بار. سوعان قاراماستان, بارلىعى وي­دا­عىداي بولادى دەپ سەنەمىن. – سوڭعى كەزدە كورەيا سپورتشىلارى جازعى جانە قىسقى وليم­پيا­دالاردا ۇنەمى ۇزدىك وندىق­تان كو­رىنۋدە. بۇگىنگى ۋنيۆەرسيادادا ۇزدىك ۇشتىككە كىردى. مۇنداي جەتىس­تىككە قالاي جەتتىڭىزدەر؟ – كورەيا سپورتى قارقىندى دامىماسا دا, ءوز دەڭگەيىندە دەۋگە بولادى. اسىرەسە, كونكيشىلەر مەن شورت-ترەكشىلەردى اۋىز تولتىرىپ ايتۋعا بولادى. قىسقى ۋنيۆەرسيادادا وسى ەكى سپورت تۇرلەرىنەن جەرلەستەرىم 11 التىن, 5 كۇمىس جانە 5 قو­لا مەدال ەنشىلەدى. سونىڭ ارقاسىندا بەي­رەسمي كوماندالىق ەسەپتە ءۇشىنشى ورىن الدىق. شورت-ترەكتەن كوپتەگەن كورەي سپورتشىسى مەن باپكەرى وزگە ەل­دەردە ءجۇر. رەسەيگە وليمپيادادا ءۇش التىن الىپ بەرگەن ۆيكتور ان دا ۋاقى­تىندا ءبىزدىڭ ەلدىڭ اتىنان سىنعا ءتۇسىپ, وليمپيادا چەمپيونى بولعان. سىزدەردىڭ قۇرامالارىڭىزعا دا ءبىزدىڭ ەلدەن ءبىر قىز كەلدى. – سپورت باسشىلارىنىڭ شورت-ترەكتەن قىزدار كومانداسىن كۇ­شەيتۋ ءۇشىن جاساعان امالى بولۋى كەرەك. – ارينە, وعان تالاسىم جوق. فەدە­­را­تسيالارىڭىزدىڭ مۇنداي قا­دامعا بارۋىنىڭ بىردەن-ءبىر سەبەبى – حا­لىقارالىق جارىستاردا ناتيجە كورسەتۋ. سول ارقىلى بۇل سپورتتى حالىققا كەڭىنەن تانىتا الاتىنىن ءتۇسىنىپ وتىر. وكىنىشكە قاراي, ۋني­ۆەرسيادادا كيم ەنگ ا بەسىنشى ورىن الىپ, بيىك تۇعىردان كورىنە المادى. ال كوماندالىق سايىستا قىزدارىڭىز جارادى. ازۋلى جاپونيا قۇراماسىن ارتقا تاستاپ, قولا جۇلدەگە قول جەتكىزدى. باستاماسى جامان ەمەس. – اڭگىمەڭىزگە راحمەت. اڭگىمەلەسكەن الماس ماناپ, «ەگەمەن قازاقستان» الماتى