بۇگىن - اقىن مۇقاعالي ماقاتاەۆتىڭ تۋعان كۇنى

ءدال وسى كۇنى 86 جىل بۇرىن (1931-1976) اقىن, اۋدارماشى, دراماتۋرگ, قازاقستاننىڭ مەملەكەتتىك سىيلىعىنىڭ لاۋرەاتى, «عاسىر اقىنى» اتاعىنىڭ يەگەرى مۇقاعالي ماقاتاەۆ دۇنيەگە كەلدى. ول الماتى وبلىسى رايىمبەك اۋدانىندا تۋعان. م.كيروۆ اتىنداعى قازاق مەملەكەتتىك ۋنيۆەرسيتەتىن ء(ال-فارابي اتىنداعى قازاق ۇلتتىق ۋنيۆەرسيتەتى) بىتىرگەن. 1952-1969 جىلدارى قاراساز باستاۋىش مەكتەبىندە ورىس ءتىلىنىڭ مۇعالىمى, قازاق راديوسىنىڭ ديكتورى, شالكودەدە قىزىل وتاۋ مەڭگەرۋشىسى, نارىنقول اۋداندىق «سوۆەتتىك شەكارا» (قازىرگى «ءحانتاڭىرى») گازەتىنىڭ جاۋاپتى حاتشىسى, «سوتسياليستىك قازاقستان» (قازىرگى «ەگەمەن قازاقستان») گازەتىندە, «مادەنيەت جانە تۇرمىس» (قازىرگى «پاراسات»), «جۇلدىز» جۋرنالدارىندا ادەبي قىزمەتكەر, جازۋشىلار وداعى پوەزيا ءبولىمىنىڭ كەڭەسشىسى قىزمەتتەرىن اتقارعان. 1973-1974 جىلدارى ماسكەۋدەگى ادەبيەت جانە ونەر ينستيتۋتىندا وقىعان. اقىننىڭ تىرناقالدى تۋىندىلارى نارىنقول اۋداندىق «سوۆەتتىك شەكارا» گازەتىندە 1948 جىلى جاريالانعان. ونىڭ «اق قايىڭ ءانى», «اققۋلار ۇيىقتاعاندا», «ارمان», «شولپان», «رايىمبەك! رايىمبەك!», «قاشقىن», «موتسارت. جان ازاسى» اتتى پوەما تولعاۋلارى مەن 650-دەن استام ليريكالىق ولەڭدەرى بار. ول قازاق ولەڭىن مازمۇن, ءپىشىن جاعىنان تۇرلەندىرىپ, ينتوناتسيا, ينۆەرسيا, مازمۇن تۇرعىسىنان جاڭالىق ەنگىزدى. مۇقاعالي ماقاتاەۆ پوەزيا جانرىندا عانا ەمەس, پروزا, دراما, سىن سالاسىندا دا قالام تارتتى. ونىڭ «قوش, ماحاببات» جيناعىنا ءار جىلدار جازىلعان «قۇلپىتاس», «مارۋسيانىڭ تاۋى», «وزگەرمەپتى», «اجە» اڭگىمەلەرى, «قوس قارلىعاش», «جىل قۇستارى» پوۆەستەرى مەن «قوش ماحاببات» پەساسى, بىرنەشە سىني ەڭبەكتەرى ەنگەن. اۋدارما سالاسىندا شەكسپيردىڭ سونەتتەرىن, دانتەنىڭ «قۇدىرەتتى كومەدياسىن», ە.ەۆتۋشەنكو, ا.اكوپيان, ف.مورگۋن, ۋ.ۋيتمەن, ر.بەرنس, ف.ءانساريدىڭ ولەڭدەرىن تارجىمالاعان. ونىڭ ولەڭدەرىنە نۇرعيسا تىلەنديەۆ, ءشامشى قالداياقوۆ, بەيبىت ورال ۇلى, التىنبەك قورازباەۆ تاعى باسقا سازگەرلەر ءان جازدى. الماتىدا اقىن اتىندا مەكتەپ, كوشە جانە سول كوشە بويىندا ەسكەرتكىشى بار. تۋعان اۋىلى قاراسازدا مۇراجايى اشىلدى. قازاقستان جازۋشىلار وداعى 1985 جىلدان بەرى ۇزدىك ادەبي شىعارما اۆتورلارىنا بەرىلەتىن مۇقاعالي ماقاتاەۆ اتىنداعى سىيلىق تاعايىنداعان.