داۋرەن اباەۆ: كۇدىكتى ويىنداردى ەسكە سالۋ - كۇماندى قاۋىمداستىقتارعا جاسالعان جارناما

قر اقپارات جانە كوممۋنيكاتسيالار ءمينيسترى داۋرەن اباەۆ بالالاردى سۋيتسيدكە شاقىراتىن كۇماندى ويىندارعا جارناما جاساماۋدى ءوتىندى. «جاسوسپىرىمدەردى وزىنە قول جۇمساۋعا يتەرمەلەيتىن ۆيرتۋالدى ويىندار ماسەلەسىنىڭ وزەكتى بولۋى تۇسىنىكتى, مۇندا بالالاردىڭ قاۋىپسىزدىگى ءسوز بولىپ وتىر. بىراق, اتالعان كۇدىكتى ويىنداردى باق-تىڭ قايتا-قايتا ەسكە سالۋى  -  كۇماندى قاۋىمداستىقتارعا جاسالعان جارناما ەكەنىن ۇمىتپاعان ءجون», - دەدى اباەۆ. ول «ۆەرتەر اسەرى» ۇعىمىن اتاپ ءوتىپ, سۋيتسيد تۋرالى جاڭالىقتىڭ وزەكتىلىگى مەن تانىمالدىلىعى ءوزىن-ءوزى ولتىرۋشىلەر سانىن ارتتىرىپ جىبەرۋى مۇمكىن ەكەنىن ايتىپ, مينيسترلىك اتقارىپ جاتقان جۇمىستارعا توقتالدى. «ءبىزدىڭ مينيسترلىك سۋيتسيدتىك باعىتتاعى توپتاردى انىقتاۋ ماقساتىندا الەۋمەتتىك مەدياعا تۇراقتى تۇدە مونيتورينگ جۇرگىزىپ وتىرادى. مۇنداي توپتاردى بۇعاتتاۋ جانە جىلدام ءوشىرىپ تاستاۋ ماسەلەلەرى بويىنشا الەۋمەتتىك جەلىنىڭ مەنشىك يەسىمەن بايلانىس ورناتىلعان. ناتيجەسىندە, سوڭعى جىلدارى كۇماندى كونتەنتى بار جۇزدەگەن توپتار جويىلدى», دەپ اتاپ ءوتتى مينيستر. سونىمەن بىرگە, د.اباەۆ قر ءىىم دەرەكتەرىنە سۇيەنىپ, 2016 جىلى جاسوسپىرىمدەردى وزىنە قول جۇمساۋعا يتەرمەلەۋ بويىنشا 9 قىلمىستىق ءىس قوزعالعانىن, بىراق ولاردىڭ مىنەز-قۇلقىنا الەۋمەتتىك جەلىلەر مەن توپتاردىڭ تيگىزگەن ىقپالى جايلى ەش مالىمەتتىڭ جوق ەكەنىن باسا ايتتى. «وتكەن جىلى رەسەيدە بالالاردىڭ وزىنە-ءوزى قول سالۋىنا ۆيرتۋالدى ويىنداردى كىنالادى. بىراق, تەرگەۋ بارىسىندا ءوزىن-ءوزى ولتىرگەن بالالاردىڭ ەشقانداي كۇماندى توپقا تىركەلمەگەنى انىقتالدى. دەمەك, ماسەلە وتە تەرەڭدە, قارىم-قاتىناستا جاتىر», - دەدى مينيستر. ونىڭ ايتۋىنشا, مۇنداي الەۋمەتتىك جاۋىزدىققا قارسى مەملەكەت, ءبىلىم بەرۋ مەكەمەلەرى, اتا-انالار مەن قالىڭ جۇرشىلىقتىڭ بىرىگىپ كۇرەسۋى كەرەك. سونىمەن قاتار ول كۇدىكتى پاراقشالارعا كەزدەيسوق تاپ بولعان ازاماتتاردى مىنا سىلتەمە بويىنشا شاعىم تۇسىرۋگە شاقىردى.