وڭتۇستىك قازاقستان وبلىسىنىڭ ونەرپازدارى قىتاي حالىق رەسپۋبليكاسىنا گاسترولدىك ساپارمەن بارىپ قايتتى. بۇل تۋرالى وقو ايماقتىق كوممۋنيكاتسيالار قىزمەتىندە وتكەن بريفينگتە وبلىستىق مادەنيەت جانە حالىق شىعارماشىلىعى ورتالىعى ديرەكتورىنىڭ ورىنباسارى بەرىك جورابەكوۆ ايتتى.
سونىمەن قاتار, بۇگىنگى ءباسپاسوز ءماسليحاتىنا قر مادەنيەت قايراتكەرى, «قازىنا» بي ءانسامبلىنىڭ جەتەكشىسى ز.اجىبەكوۆا مەن قر مادەنيەت قايراتكەرى, «تۇركىستان» سارايىنىڭ كوركەمدىك جەتەكشىسى ا.يساەۆا قاتىسىپ, قىتاي ەلىندەگى قانداستارىمىزدىڭ قازاق مادەنيەتىنە دەگەن ساعىنىشى تۋرالى ايتىپ بەردى.
قىتايداعى قانداستارىمىز تاريحي وتانىنا بارعانداي اسەر الىپتى. ولار اتاجۇرتقا دەگەن ساعىنىشىن جۇرەكجاردى ويلارىمەن ءبىلدىرىپتى.
باقتيار تايجان, «ەگەمەن قازاقستان».
