اقىننىڭ ءىزباسارلارى اتىراۋدا ىرىكتەلەدى

ادەبيەتتى اردىڭ ءىسى رەتىندە ارداق تۇتقان الاش قالامگەرلەرىنىڭ ءبىرى – فاريزا وڭعارسىنوۆا. جۇرەك تۇكپىرىندەگى سىرشىل تۋىندىلارىمەن تانىلعان حالىق جازۋشىسىنىڭ ادەبي مۇراسى حالقىنا ءالى تالاي قىزمەت ەتەرى داۋسىز. الايدا, پوەزيا پاديشاسىنىڭ ءىزىن جالعاستىرار جاس اقىندار بار ما؟ اقىن شاكىرتتەرىنىڭ ءبىرى ءاليا داۋلەتباەۆانىڭ جەتەكشىلىگىندەگى «فاريزا جۇلدىزدارى» دەپ اتالاتىن جاس اقىندار كلۋبى وڭىردەگى جاس تالانتتاردى تاربيەلەۋ ءىسىن قولعا الدى. وعان جازۋشىلار وداعىنىڭ اتىراۋ فيليالى قولداۋ ءبىلدىرىپ وتىر. ازىرگە كلۋبتىڭ مۇشەلىگىنە 25 جاس اقىن قابىلداندى. – بۇل وڭىردە دە جاس اقىندار بار. الايدا, ولاردىڭ تالابىنا قولداۋ بىلدىرەتىن وسىنداي ءبىر ورتالىقتىڭ قاجەتتىگىن ويلاپ ءجۇر ەدىك. ويتكەنى, كەزىندە فاريزا اپايىمىزدىڭ ءوزى دە بۇرىنعى گۋرەۆ پەداگوگيكالىق ينستيتۋتىندا قۇرىلعان اقىندار ۇيىرمەسىنەن قاناتتانعان عوي. كلۋبقا مۇشە بولعان 25 جاس اقىننىڭ اراسىنان كەمى 5 جاس اقىندى ەلگە تانىتۋدى كوزدەپ وتىرمىز, – دەيدى كلۋب جەتەكشىسى ءاليا داۋلەتباەۆا. جاس اقىندار قادامىنا ساتتىلىك تىلەگەن جازۋشىلار وداعى توراعاسىنىڭ ورىنباسارى مارالتاي رايىمبەك ۇلى, اتىراۋ فيليالىنىڭ توراعاسى قويشىعۇل جىلقىشيەۆ, اقىن سۆەتقالي نۇرجانوۆ, سكريپكاشى ايمان مۇساقوجاەۆا فاريزا اقىننىڭ شىعارماشىلىعى مەن ادامي قاسيەتتەرى تۋرالى تولعانا اڭگىمەلەدى. جولداسبەك شوپەعۇل, «ەگەمەن قازاقستان» اتىراۋ