ۇلتتىق مۋزەيدە اسكەري تاقىرىپتا فوتوكورمە اشىلدى

ۇلتتىق ۇلاننىڭ ۇزاق جىلدار بويى ءفوتوتىلشىسى مىندەتىن ءمىنسىز اتقارعان ۆياچەسلاۆ گەلبلينگتىڭ ۇلتتىق مۋزەيدە جەكە فوتوكورمەسىنىڭ اشىلۋى سالتاناتى ءوتتى. ەل تاۋەلسىزدىگىنىڭ 25 جىلدىعىنا ارنالعان  بۇل شارا اسكەري تاقىرىپقا ارنالعان كورمە رەتىندە ەلىمىزدە تۇڭعىش رەت ۇيىمداستىرىلدى. تاۋەلسىزدىك جىلدارىندا ۇلتتىق ۇلاننىڭ ەل تىنىشتىعىن قورعاۋداعى ەرەن ەڭبەگى مەن داڭقتى جاۋىنگەرلىك جولى فوتوسۋرەتتەر ارقىلى ءارتۇرلى باسىلىمداردا وقتىن-وقتىن جاريالانىپ جاتتى. ويتكەنى, تاسقا باسىلىپ, شەجىرە رەتىندە قاتتالعان باسپا بەتتەرىندەگى فوتوسۋرەتتەر مەن رەپورتاجدار وزگە دە شىعارماشىلىق تۋىندىلار ءوز زامانىنىڭ تىنىسىنان حابار بەرەتىن. بۇل باعىتتا سوڭعى 15 جىل ىشىندە اسكەري فوتوشەجىرەنىڭ قالىپتاسۋىنا ەلەۋلى ۇلەس قوسىپ, ءوزىنىڭ كاسىبي شەبەرلىگىمەن قولتاڭباسىن قالدىرعان كانىگى ءفوتوتىلشى, زاپاستاعى پراپورششيك ۆياچەسلاۆ گەلبلينگتىڭ ەرەن ەڭبەگىن ەسكەرمەۋ مۇمكىن ەمەستەي. «اپتا بويى كورەرمەن نازارىنا ۇسىنىلاتىن فوتوكورمەنى ۇيىمداستىرۋداعى نەگىزگى ماقسات – اسكەري قىزمەتكەرلەردى رۋحاني تۇرعىدا تاربيەلەي وتىرىپ, ازاماتتاردىڭ ىشكى مادەنيەتى مەن سانا-سەزىمىن وياتۋ ءارى دامىتۋ بولىپ تابىلادى. سونىمەن قاتار, وتان قورعاۋشىلاردىڭ بويىنا پاتريوتتىق رۋحتى سىڭىرۋدە اسكەري فوتوجۋرناليستيكانىڭ ماڭىزى زور ەكەندىگىن كوپشىلىككە ۇعىندىرۋ ەدى», – دەدى سالتاناتتى شارانىڭ اشىلۋ راسىمىندە ءسوز العان ۇلتتىق ۇلان باس قولباسشىسىنىڭ تاربيە جانە الەۋمەتتىك-قۇقىق جونىندەگى ورىنباسارى, گەنەرال-مايور مۇحامەتقالي ساتوۆ. نەگىزىنەن, قۇقىقتىق ءتارتىپ اسكەرىنىڭ باس ءفوتوتىلشىسى ۆياچەسلاۆ گەلبلينگتىڭ وبەكتيۆىنەن تىس قالعان اسكەري ءومىردىڭ كورىنىستەرى نەكەن-ساياق. ول تۇسىرگەن فوتوسۋرەتتەردىڭ كوپشىلىگى كورەرمەن كوزايىمىنا اينالىپ, جۇرتشىلىقتىڭ ىستىق ىقىلاسىنا بولەنگەن. بۇل سوزىمىزگە ونىڭ جەكە مۇراعاتىندا ساقتالعان ءبىر ميلليوننان اسا فوتوسۋرەتتىڭ اشىلماعان سىرلارى ايقىن دالەل بولا الادى. ال ولاردىڭ بارلىعى دەرلىك مەملەكەتتىك جانە حالىقارالىق دەڭگەيدەگى شارالار كەزىندە ەل مەن ىشكى اسكەردىڭ, ۇلتتىق ۇلاننىڭ ءبىرىنشى تۇلعالارىنىڭ, سونداي-اق جاۋىنگەرلىك قىزمەتتىڭ تىنىس-تىرشىلىگىنەن حابار بەرەدى. تاۋەلسىزدىك تاڭىنداعى ايتۋلى وقيعالاردى پاش ەتەتىن وسىنداي فوتوسۋرەتتەر ىشىنەن ىرىكتەلىپ, كورمەگە قويىلعان 54 تۋىندى ارقيلى تاعدىردى ارقاۋ ەتەدى. ونىڭ ءتۇسىرىلۋ تاريحىنان بولەك, جۇرتشىلىق نازارىنا ۇسىنۋدىڭ ءوزى اسقان مۇقياتتىلىق پەن جاۋاپكەرشىلىكتى جۇكتەيدى. «سۋرەتتەرىمنىڭ ىشىندە وزىمە ەرەكشە ۇنايتىنى «براتيشكي» دەپ اتالاتىن تۋىندىم. ويتكەنى, اسكەر قاتارىندا قىزمەت ەتىپ جۇرگەن بۋىندار اراسىنداعى ساباقتاستىقتىڭ ساقتالۋىنا قاتىستى وي ايتىلاتىن بۇل تۋىندىم ماسكەۋدە وتكەن حالىقارالىق فوتوونەر اپتالىعىنىڭ «ءومىر» جانە «ادامدار» نوميناتسياسىنىڭ جەڭىمپازى (2013 ج.) اتانعان. قاس-قاعىم ساتتە قاعىپ ءتۇسۋى ءتيىس كارتينادا بەينەنىڭ مازمۇندىق جاعىنان اشىلۋى مەن ونىڭ بەرىلۋ فورماسى دا وتە ءساتتى شىققان سەكىلدى», – دەيدى اۆتور. ايتا كەتەيىك, ۆياچەسلاۆ گەلبلينگ قارۋلى كۇشتەردىڭ 10 جىلدىعىنا ارنالعان «ارميا – تۋعان جەر مەن ەلدىڭ قۇرىش قامال قورعانى» تاقىرىبىمەن وتكەن فوتو بايقاۋدىڭ لاۋرەاتى. ال «ۇلتتىق ۇلان تاۋەلسىزدىك كۇزەتىندە» دەگەن اتاۋمەن ۇيىمداستىرىلعان كورمە 12 قاڭتارعا دەيىن جالعاساتىن بولادى دەپ كۇتىلۋدە. نۇرلىبەك دوسىباي, «ەگەمەن قازاقستان»