الماتىدا ۋنيۆەرسيادانى وتكىزۋگە 109 ملرد تەڭگە بولىنگەن

28-ءشى دۇنيەجۇزىلىك قىسقى ۋنيۆەرسيادانى وتكىزۋگە رەسپۋبليكالىق بيۋدجەتتەن 109 ميلللارد تەڭگە بولىنگەن, دەپ حابارلايدى الماتى اكىمدىگىنىڭ ءباسپاسوز قىزمەتى. بۇگىن قازاقستان رەسپۋبليكاسى پرەمەر-ءمينيسترىنىڭ ورىنباسارى, 28-ءشى دۇنيەجۇزىلىك قىسقى ۋنيۆەرسيادا-2017 ۇيىمداستىرۋ كوميتەتىنىڭ توراعاسى يمانعالي تاسماعامبەتوۆ  سپورت نىساندارىنىڭ دايىندىعىن تەكسەرىپ, كوشپەلى كەڭەس وتكىزدى. الماتى قالاسىنىڭ اكىمى باۋىرجان بايبەك ۋنيۆەرسيادانى وتكىزۋ مەگوپاليستىڭ دامۋىنا, قىزمەت كورسەتۋ ساپاسىنا ايتارلىقتاي ىقپال ەتكەنىن ايتتى. اكىمنىڭ ايتۋىنشا, ۋنيۆەرسيادانى وتكىزۋگە, الماتىدا ينفراقۇرىلىمدى دامىتۋ مەن قۇرىلىسقا رەسپۋبليكالىق بيۋدجەتتەن 109 ملرد تەڭگە بولىنگەن. «ۋنيۆەرسيادا نىساندارىن سالۋ كەزىندە 1 550 شاعىن جانە ورتا بيزنەس وكىلدەرى جۇمىسپەن قامتىلىپ, قۇرىلىس سالاسىندا 30 مىڭنان اسا جۇمىس ورنى اشىلدى. 9,2 ملرد تەڭگە سالىق تولەندى. ۋنيۆەرسيادانىڭ وپەراتسيالىق دايىندىقتارىنا 5 مىڭ جۇمىسشىسى بار 200 كومپانيا تارتىلدى, ونىڭ 80 پايىزى الماتىلىقتار. بيۋدجەتكە تۇسكەن 12,3 ملرد تەڭگەنىڭ 1,5 ملرد-ى  باسقا سالىقتاردى ەسەپتەمەگەندە, قوسىمشا قۇن سالىعى رەتىندە قايتادى», - دەدى باۋىرجان بايبەك.