بۇۇ قاۋىپسىزدىك كەڭەسى زالىندا قر تۋى ورناتىلدى

2016 جىلعى 31 جەلتوقساندا بىرىككەن ۇلتتار ۇيىمىنىڭ نيۋ-يورك قالاسىنداعى شتاب-پاتەرىندە بۇۇ قاۋىپسىزدىك كەڭەسى زالىنىڭ الدىنا قازاقستان رەسپۋبليكاسىنىڭ مەملەكەتتىك تۋىن, سونداي-اق قك-ءنىڭ رەسمي زالىنداعى كەلىسسوزدەر ۇستەلىندە جانە جابىق كەلىسسوزدەرگە ارنالعان بولمەسىندە ەلىمىزدىڭ اعىلشىن تىلىندەگى اتاۋىن قامتيتىن تاقتايشاسىن ورناتۋ ءراسىمى بولىپ ءوتتى. قازاقستانمەن قاتار, رەسمي ۋاكىلەتتىلىگى 2017 جىلدىڭ 1 قاڭتارىنان باستالاتىن, قاۋىپسىزدىك كەڭەسىنىڭ جاڭادان سايلانعان باسقا دا تۇراقتى ەمەس مۇشەلەرى - بوليۆيا, يتاليا, شۆەتسيا جانە ەفيوپيانىڭ تۋلارى مەن تاقتايشالارى ورناتىلدى. بۇل ەلدەر, ءوز كەزەگىندە, تيىسىنشە مالايزيا, ۆەنەسۋەلا, يسپانيا, جاڭا زەلانديا جانە انگولانىڭ ورنىن باسادى. اتالعان ءراسىم كەڭەستىڭ تۇراقتى ەمەس مۇشەلىگىندەگى جاڭا بەستىكتىڭ ءوز جۇمىسىن باستايتىندىعىن بىلدىرەدى. ءبىز بۇل قۇرىلىمنىڭ قۇرامىنا وتۋدە, بۇدان بۇرىن كەڭەسكە سايلانعان جانە اتالمىش لاۋازىمدا جۇمىس ىستەۋ تاجىريبەسى بار, الەمنىڭ تۇكپىر-تۇكپىرىنە ءوز بىتىمگەرلەرىن جولداۋ ارقىلى كەڭەستىڭ كۇنتارتىبىندە تۇرعان ماسەلەلەردى شەشۋ ۇدەرىسىنە ەداۋىر ۇلەس قوسىپ جۇرگەن, لايىقتى قارسىلاستىڭ قاتاڭ باسەكەلەستىگىنە تاپ بولدىق. ەلىمىزدىڭ رەسمي ءوتىنىمى بويىنشا ازيا-تىنىق مۇحيتى توبىنان قاۋىپسىزدىك كەڭەسىنە 2017-2018 جج. ارنالعان كەزەڭنىڭ تۇراقتى ەمەس مۇشەلىگىنە سەنىمدى جەڭىسپەن سايلانۋ قازاقستاننىڭ 2016 جىلعى سىرتقى ساياساتتاعى نەگىزگى جەتىستىگى بولىپ تابىلادى. ويتكەنى 1945 جىلدان بەرگى بۇۇ-نىڭ تاريحىندا بۇل ورگانعا الەمنىڭ ەڭ ۇلكەن قۇرلىعىنان 23 ەل عانا سايلانىپ, سوندا جۇمىس ىستەگەن. ولاردىڭ قاتارىندا قىتاي, جاپونيا, كورەيا رەسپۋبليكاسى, ءۇندىستان, پاكىستان, يندونەزيا, مالايزيا, سينگاپۋر, فيليپپيندەر, بىرىككەن اراب امىرلىكتەرى سياقتى قۋاتتى مەملەكەتتەر بار. ەندى ورتالىق ازيالىق اۋقىمدى ءوڭىرىنىڭ وكىلى رەتىندە, وسى ەلدەردىڭ قاتارىنا قازاقستان دا قوسىلماق. بۇل جاڭا تابىس, قر ءىس جۇزىندە بۇكىل الەمگە سىيلى, بۇۇ قك-ءنىڭ ءۇش جەتەكشى كوميتەتىن باسقارۋ سەنىپ تاپسىرىلعان بەدەلدى مەملەكەتكە اينالعانىن جانە ءوزارا سەنىمنىڭ تومەندەۋى جاعدايىندا جەتەكشى الپاۋىت ەلدەردىڭ اراسىندا بايلانىس كوپىرىن ورناتا الاتىن ەل ەكەندىگىن كورسەتەدى. بۇكىلالەمدىك ۇيىمنىڭ بارلىق قاتىسۋشىلارىنىڭ ۇشتەن ەكىسىنەن استام كوپشىلىگى بىزگە داۋىس بەردى. وسىلايشا, قازاقستاننىڭ حالىقارالىق تۋربۋلەنتتىلىك جاعدايىنداعى «جاھاندىق قاۋىپسىزدىك ءۇشىن بىرىككەن» دەگەن ۇرانى الەمنىڭ كوپتەگەن ەلدەرىندە قولداۋ تاپتى. بۇۇ-نىڭ جارعىسىنا سايكەس, قاۋىپسىزدىك كەڭەسى ۇيىمنىڭ باس ورگاندارىنىڭ ءبىرى بولىپ تابىلادى جانە ونىڭ شەشىمدەرى زاڭدىق مىندەتتەۋشى كۇشكە يە. بۇۇ-نىڭ جىلدام جانە ءتيىمدى ءىس-ارەكەت ەتۋىن قامتاماسىز ەتۋ ءۇشىن مۇشە-مەملەكەتتەر قك-نە حالىقارالىق بەيبىتشىلىكتى جانە قاۋىپسىزدىكتى ساقتاۋ جونىندەگى باستى جاۋاپكەرشىلىكتى جۇكتەگەن جانە كەڭەستىڭ ءوز مىندەتىن اتقارۋ بارىسىندا مۇشە-مەملەكەتتەردىڭ اتىنان ءىس-ارەكەت جاسايتىندىعىنا كەلىسكەن. ءبىر ايتا كەتەرلىگى, بۇۇ قاۋىپسىزدىك كەڭەسىنىڭ 2017 جىلعى كۇنتىزبەسىندەگى العاشقى كەزدەسۋ 3 قاڭتاردا جوسپارلانعان, ال قازاقستان رەسپۋبليكاسىنىڭ كەڭەستىڭ تۇراقتى ەمەس مۇشەسى رەتىندە وكىلەتتىگى نيۋ-يوركتە پايدالانىلاتىن اقش جانە كانادا ۋاقىتىنا سايكەس جەكسەنبى كۇنى, 2017 جىلعى 1 قاڭتاردا ساعات 00:00-دە باستالدى.