2017 جىلى پارلامەنت پەن ۇكىمەت جاۋاپكەرشىلىگىن كۇشەيتۋ ماسەلەسى قاراستىرىلادى

2017 جىلى پارلامەنت پەن ۇكىمەتتىڭ جاۋاپكەرشىلىگىن كۇشەيتۋ ماسەلەسى جان-جاقتى زەردەلەنەدى.  بۇل تۋرالى بۇگىن قر پارلامەنتى سەناتىنىڭ توراعاسى قاسىم-جومارت توقاەۆ سەناتتىڭ جالپى وتىرىسىندا مالىمدەدى. «قۇرمەتتى ارىپتەستەر, ەلباسى اتاپ وتكەندەي, ءبىز ەل دامۋىنىڭ كەلەسى 25 جىلدىق كەزەڭىنە قادام باستىق. پرەزيدەنت تاۋەلسىزدىگىمىزدىڭ 25 جىلدىعىنا ارنالعان سالتاناتتى جيىندا سويلەگەن سوزىندە مەملەكەت دامۋىنىڭ جاڭا ساتىسىنا كوشۋ جاعدايىندا پارلامەنت پەن ۇكىمەتتىڭ جاۋاپكەرشىلىگىن كۇشەيتۋ ماسەلەسىن كۇن تارتىبىنە قويعان بولاتىن. الداعى ۋاقىتتا وسى ماڭىزدى ماسەلە جان-جاقتى تەرەڭ زەردەلەنىپ, ءتيىستى زاڭدارعا وزگەرىستەر ەنگىزۋ بويىنشا ۇسىنىستار ازىرلەنەتىن بولادى. سەناتورلار مەملەكەتتىك باسقارۋ جۇيەسىن ودان ءارى جاڭعىرتۋدى كوزدەيتىن ماڭىزدى زاڭ جوبالارىمەن جۇمىستى كاسىبي تۇرعىدان جۇرگىزەتىنىنە مەن كامىل سەنەمىن»,-دەدى ول. ەستەرىڭىزگە سالا كەتەيىك, 15 جەلتوقساندا استاناداعى قازاقستان تاۋەلسىزدىگىنىڭ 25 جىلدىعىنا ارنالعان سالتاناتتى جيىندا مەملەكەت باسشىسى نۇرسۇلتان نازارباەۆ بيلىك وكىلەتتىلىگىن قايتا ۇيلەستىرۋ ماسەلەسىن كوتەرگەن بولاتىن. «جاڭا مەملەكەت قۇرۋ مەن رەفورمالاردىڭ ەڭ الدىمەن كۇشتى پرەزيدەنتتىك بيلىك ارقىلى عانا قامتاماسىز ەتىلەتىنىن تاۋەلسىزدىك تاريحى كورسەتىپ بەردى. مەملەكەت دامۋىنىڭ جاڭا ساتىسى ەلدەگى ىستەردىڭ جاعدايى ءۇشىن پارلامەنت پەن ۇكىمەتتىڭ جاۋاپكەرشىلىگىن كۇشەيتۋ ماسەلەسىن كۇن تارتىبىنە قويىپ وتىر. قازاقستان ءبىزدىڭ كونستيتۋتسيامىزدا كورسەتىلگەندەي, پرەزيدەنتتىك باسقارۋ فورماسىنداعى مەملەكەت بولعان, قازىر دە سولاي جانە الدا دا سولاي بولا بەرەدى. سونىمەن بىرگە, وكىلەتتىلىكتەردى پرەزيدەنت, ۇكىمەت جانە پارلامەنت اراسىندا بولىسكە سالۋ ماسەلەسىن قارايتىن ۋاقىت تا كەلدى. ارنايى كوميسسيا وسى ماسەلەلەردى زەرتتەپ, ءتيىستى زاڭدارعا, مۇمكىن كونستيتۋتسياعا دا وزگەرىستەر ەنگىزۋ بويىنشا ۇسىنىس ەنگىزۋى ءتيىس», - دەدى مەملەكەت باسشىسى.