قوستاناي وبلىسىندا تاعى ءبىر ءىرى ەلدى مەكەن تابيعي گازعا قوسىلدى

ليساكوۆ قالاسىنىڭ ىرگەسىندەگى وكتيابر كەنتىنە كوگىلدىر وتىن كەلدى. ول «قازترانسگاز» اق ۇلتتىق وپەراتورىنىڭ «قوستاناي وبلىسىنىڭ ەلدى-مەكەندەرىن گازداندىرۋ جانە گاز تاراتۋ جەلىلەرىن جاڭعىرتۋ» ينۆەستيتسيالىق جوباسى اياسىندا كەنتكە جەتكىزۋشى جانە كوشەارالىق گاز قۇبىرلارىنىڭ قۇرىلىسىن ءبىتىرۋدىڭ ارقاسىندا مۇمكىن بولدى. وكتيابر كەنتىن گازداندىرۋ ۇشىن مۇندا 3,5 كم جەتكىزۋشى جانە 36 كم كوشەارالىق قۇبىر سالىندى. ەلدى-مەكەندە 4 000 استام ادام تۇرادى. 35 كوپ قاباتتى جانە 700 جەكە تۇرعىن ءۇي گازعا قوسىلۋعا ءازىر. سونىمەن قاتار 36 كوممۋنالدىق-تۇرمىستىق جانە الەۋمەتتىك نىساندى گازبەن ۇزدىكسىز قامتاماسىز ەتۋگە مۇمكىندىك بار. گاز قۇبىرىن ىسكە قوسۋ سالتاناتىندا وبلىس اكىمى ارحيمەد مۇحامبەتوۆ ءوڭىر ۇرعىندارىنىڭ ءال-اۋقاتىن جاقسارتۋعا ىقپال ەتەتىن كوپتەگەن جوبالاردىڭ جۇزەگە اسىرىلعاندىعىن ايتتى. «سونىڭ ىشىندە «قازترانسگاز» ۇلتتىق وپەراتورى جانە «قازمۇنايگاز» ۇلتتىق كومپانياسىمەن ءبىزدىڭ وبلىسىمىزدىڭ ەلدى مەكەندەرىن گازداندىرۋ بويىنشا ىنتىماقتاستىق تۋرالى مەموراندۋمعا قول قويىلۋى ەدى. وكتيابر كەنتىن گازبەن جابدىقتاۋ بۇل ەلدى مەكەننىڭ ودان ارعى دامۋىنا وڭ ىقپال جاسايدى, ونىڭ تۇرعىندارىنىڭ ءومىر ءسۇرۋ ساپاسىن ايتارلىقتاي كوتەرەدى جانە جاڭا كاسىپورىندار اشۋ ءۇشىن تۇرتكى بولادى» دەدى ارحيمەد بەگەجان ۇلى. «كوگىلدىر وتىنى» لاۋلاپ تۇرعان اۋىلدارعا قىزىعا قارايتىنبىز. ونداعى تۇرعىندار كومىر تاسىپ, اعاش جارۋ دەگەندى الدەقاشان ۇمىتقان. وسىنداي قۋانىشتى جاڭالىق بىزگە دە جەتتى. ءبىزدىڭ وڭىردەگى اياز بارشاعا ايان. ەندى گاز قوسىلعاننان كەيىن ءبىزدىڭ ۇيىمىزدە دە قىسى-جازى جايلىلىق پەن جىلۋ بولادى» دەدى كەنت تۇرعىنى مەجامال نۇرسەيىتوۆا. «قازترانسگاز» اق باس ديرەكتورىنىڭ ءبىرىنشى ورىنباسارى عالىم ايدوسوۆ باستالعان ينۆەستيتسيالىق جوبا بويىنشا وبلىستىڭ بۇكىل ەلدى-مەكەندەرى گازداندىرىلاتىنىن ايتتى. بۇل جوبالاردى 2016-2017 جىلدارعى ۇزاق مەرزىمدى ينۆەستيتسيالىق باعدارلاما شەڭبەرىندە جۇزەگە اسىرۋدى كوزدەپ وتىر. ءنازيرا جارىمبەتوۆا «ەگەمەن قازاقستان»