دجەيكوبس: گولوۆكين مەنىمەن جۇدىرىقتاساتىنىن ۇمىتىپ كەتكەن سىڭايلى

گەننادي گولوۆكيننىڭ كەزەكتى قارسىلاسى امەريكالىق دەنيەل دجەيكوبس BoxingScene-گە سۇحبات بەردى. بۇل تۋرالى vesti.kz حابارلادى. 2017 جىلى گولوۆكين مەكسيكالىق ساۋل «كانەلو» الۆارەسپەن جەكپە-جەك وتكىزۋى ءتيىس. ەكى تاراپ ءالى كەلىسسوزدەر جۇرگىزىپ جاتىر. الدىن الا تاراعان مالىمەتتەر بويىنشا بۇل كەزدەسۋ قىركۇيەك ايىندا ءوتۋى مۇمكىن. قازاقستاندىق بوكسشى وعان دەيىن 18 ناۋرىزدا نيۋ-يورك قالاسىنداعى Madison Square Garden ارەناسىندا امەريكالىق دەنيەل دجەيكبوسپەن قولعاپ تۇيىستىرەدى. بۇعان قوسا, امەريكالىق سپورتشى گەنناديدىڭ بارلىق بەلبەۋىن تارتىپ الىپ, الەمدى تاڭ قالدىراتىنىن ايتقان بولاتىن. «شىنىمدى ايتسام, الدا بولار گولوۆكين مەن الۆارەستىڭ كەزدەسۋى مەنى مۇلدەم قىزىقتىرمايدى. شاماسى, گەننادي ءبىرىنشى مەنىمەن جۇدىرىقتاساتىنىن ۇمىتىپ كەتكەن سىڭايلى. دەگەنمەن, مۇنداي جاعداي مەنىڭ باسىمدا بۇعان دەيىن دە بولعان. پيتەر كۋيللين جايلى ايتقىم كەلىپ وتىر. ول مەنى جەڭىپ, ارى قاراي GGG سياقتى ۇلكەن جەكپە-جەكتەر تۋرالى جوسپارلاپ جۇرگەن. بىراق ءبارى باسقاشا ءوربىدى», – دەدى امەريكالىق سپورتشى. «قازىرگى باستى ماقساتىم – 18 ناۋرىزعا تىڭعىلىقتى دايىندالىپ, لايىقتى ونەر كورسەتۋ. بۇل ۇلكەن جەكپە-جەك. شارشى الاڭدا 36 مينۋت (12 راۋند) شىداس بەرىپ, قاجەتتى ناتيجەگە قول جەتكىزگىم كەلەدى. ال قالعانى بوس اڭگىمە», – دەدى ول. ايتا كەتەيىك, دجەيكوبس بۇعان دەيىن گولوۆكيننىڭ كەلل برۋكپەن وتكىزگەن ۇرىسىندا قاتەلىكتەرىن بايقاعانىن, ونى بريتانيالىققا قاراعاندا ءتيىمدى پايدالاناتىنىن مالىمدەگەن بولاتىن.