«استانا» ويىنشىسى «سپورتينگ» كومانداسىنا اۋىسۋى مۇمكىن

«استانا» كومانداسىنىڭ جانە سەربيا ۇلتتىق قۇراماسىنىڭ جارتىلاي قورعاۋشىسى نەمانيا ماكسيموۆيچ پورتۋگاليانىڭ «سپورتينگ» كلۋبىنا اۋىسۋى مۇمكىن. بۇل تۋرالى vesti.kz حابارلادى. A Bola باسىلىمىنىڭ مالىمەتى بويىنشا, فۋتبولشىنىڭ اگەنتى ۆلاديمير يۋگوۆيچ ليسسابون قالاسىنا وسى ىسكە بايلانىستى كەلگەن. پورتۋگاليالىق كلۋبتىڭ باسشىلىعى كەلىسسوزدەردى تەزىرەك اياقتاپ, ماكسيموۆيچتى قىسقى ترانسفەردە ءوز قاتارلارىنان كورۋدى جوسپارلاپ وتىر. بۇعان دەيىن سەربيالىق فۋتبولشىعا بەلگيانىڭ «ستاندارتى» ەكى ميلليون ەۋرو ۇسىنعان بولسا, يسپانيالىق «ۆالەنسيانىڭ» باس جاتتىقتىرۋشىسى چەزارە پراندەللي قىزىعۋشىلىعىن راستاعان بولاتىن. ماكسيموۆيچتىڭ «استانامەن» كەلىسىمشارتى 2017 جىلدىڭ ماۋسىم ايىندا اياقتالادى. فيفا-نىڭ ەرەجەسى بويىنشا ول قاڭتار ايىندا كەز كەلگەن كوماندامەن الدىن الا كەلىسىم جاساي الادى. «استانانىڭ» باس مەنەدجەرى سايان حاميتجانوۆ شەتەلدىك كلبۋتاردان ۇسىنىس تۇسكەنىن راستادى. وسى قىستا ەلوردالىق كوماندادان كەتۋى ابدەن مۇمكىن. نەمانيا ماكسيموۆيچ ەلوردالىق ۇجىمنىڭ ساپىنا 2015 جىلدىڭ اقپان ايىندا كەلگەن. بۇگىنگە دەيىن ەكى مارتە ەل چەمپيونى اتانىپ, ءبىر رەت قازاقستان كۋبوگىندا جەڭىسكە جەتكەن. پرەمەر-ليگادا 54 ويىنعا قاتىسىپ, 9 گولدىڭ جانە 6 ناتيجەلى پاستىڭ اۆتورى اتاندى. سونىمەن قاتار, ءوز كلۋبىن چەمپيوندار ليگاسى مەن ەۋروپا ليگاسىنىڭ توپتىق كەزەڭىنە وتۋىنە سەپتىگىن تيگىزگەن. بۇدان بولەك, ول 2015 جىلى سەربيانىڭ جاستار قۇراماسىمەن (U-21) الەم چەمپيونى اتانسا, بيىل نەگىزگى قۇراماعا العاش رەت شاقىرتۋ الىپ, ءۇش جولداستىق كەزدەسۋگە قاتىستى. ايتا كەتەيىك, ماكسيموۆيچكە يسپانيانىڭ «سەۆيليا», انگليانىڭ «مانچەستەر يۋنايتەد», «ۆەست حەم», يتاليانىڭ «ميلان», «روما», «تورينو», «ينتەر», «دجەنوا», حورۆاتيانىڭ «دينامو», رەسەيدىڭ «سپارتاك», شۆەيتساريانىڭ «بازەل», گەرمانيانىڭ «نيۋرنبەرگ», «اينتراحت», «گامبۋرگ», سونداي-اق فرانتسيانىڭ «وليمپيك مارسەل», «ليون», «نانت» جانە «موناكو» كوماندالارى قىزىعۋشىلىق تانىتقانى تۋرالى الەمدىك باق حابارلاعان بولاتىن.