اۋىل شارۋاشىلىعىن دامىتۋ عىلىمعا بايلانىستى

ورتالىق كوممۋنيكاتسيالار قىزمەتىندە اۋىل شارۋاشىلىعىن دامىتۋ ماسەلەسىنە ارنالعان ءباسپاسوز ءماسليحاتى ءوتتى. وعان اۋىل شارۋاشىلىعى مينيسترلىگى «ۇلتتىق اگرارلىق عىلىمي-ءبىلىم بەرۋ ورتالىعى» كوممەرتسيالىق ەمەس اكتسيونەرلىك قوعامىنىڭ باسقارما توراعاسى اسقار نامەتوۆ پەن «اۋىل» پارتياسىنىڭ توراعاسى عاني قاليەۆ قاتىستى. «قازاقستاننىڭ اگرارلىق عىلىمىنىڭ ستراتەگيالىق ماقساتى – باسەكەگە قابىلەتتى ءونىمدى الۋ. وسى ماسەلەنى شەشۋ ماقساتىندا 2015 جىلدىڭ تامىز ايىندا ۇكىمەتتىڭ قاۋلىسى بويىنشا اۋىل شارۋاشىلىعى مينيسترلىگى «ۇلتتىق اگرارلىق عىلىمي-ءبىلىم بەرۋ ورتالىعى» كەاق قۇرىلدى. ورتالىقتى قۇرۋدىڭ نەگىزگى ماقساتى – جوعارى بىلىكتى مامانداردى دايىنداۋ جانە قايتا دايىنداۋ, عىلىمي زەرتتەۋلەر ناتيجەلەرىن وندىرىسكە ەنگىزۋ. اوك ءتيىمدى شەتەلدىك تەحنولوگيالاردى ترانسفەرتتەۋ نەگىزىندە قازاقستان ەكونوميكاسى اگرارلىق سەكتورىنىڭ يننوۆاتسيالىق دامۋىنا قولداۋ كورسەتۋ», – دەدى ول. ونىڭ ايتۋىنشا, قازىرگى تاڭدا ۇاعبو كەاق ءبىلىمدى, عىلىمي-تەحنيكالىق قىزمەت ناتيجەلەرى مەن عىلىمي-زەرتتەۋ ۇيىمدارىنىڭ قىزمەتتەرىن تاراتۋدىڭ ءتيىمدى جولدارىن قاراستىرۋدا. سونىمەن قاتار, «ۇاعبو» كەاق قۇرامىندا اگرارلىق تەحنولوگيالاردى ترانسفەرتتەۋ جانە كوممەرتسياليزاتسيالاۋ ورتالىعى (اتتك) جۇمىس ىستەيدى. ورتالىقتىڭ نەگىزگى قىزمەتى وتاندىق عىلىمي-زەرتتەۋ مەكەمەلەرىنىڭ عىلىمي-تەحنيكالىق ناتيجەلەرىن ەنگىزۋگە باعىتتالعان. بۇگىندە ەلىمىزدە شەتەلدىك يننوۆاتسيالاردى ەنگىزۋ ءۇشىن اتتك قىزمەتىن كەڭەيتۋ ماسەلەسى قاراستىرىلۋدا. وسى ماسەلەلەردى شەشۋ ارقىلى عىلىمي ۇيىمداردىڭ قىزمەتىن اۋىل شارۋاشىلىق تاۋار وندىرۋشىلەردىڭ قاجەتتىلىكتەرىنە سايكەس وندىرىسكە جاڭا تەحنولوگيالاردى ەنگىزۋگە باعىتتالعان زەرتتەۋدى دامىتۋعا جول اشادى. ايتا كەتۋ كەرەك, اۋىل شارۋاشىلىعى مينيسترلىگى عىلىم جانە ءوندىرىس اراسىنداعى بايلانىستى قامتاماسىز ەتۋ بويىنشا جۇمىستار جۇرگىزىپ جاتىر. بۇل فەرمەرلەر ءۇشىن ءتيىمدى يننوۆاتسيالىق تەحنولوگيالاردى ەنگىزۋمەن اينالىساتىن اۋىل شارۋاشىلىق تاۋار وندىرۋشىلەردىڭ سانىن 10 پايىزدان 25 پايىزعا دەيىن ارتتىرۋعا مۇمكىندىك بەرەدى. بۇگىنگى تاڭدا ۇلتتىق اگرارلىق عىلىمي-ءبىلىم بەرۋ ورتالىعىنىڭ قۇرامىندا 3 اگرارلىق جوو, 31 فيليالدارى بار 23 عىلىمي زەرتتەۋ ينستيتۋتتارى, 7 تاجىريبەلىك شارۋاشىلىقتار, 7 سەلەكتسيالىق ستانتسيالار, 4 سەرۆيستىك كومپانيالار بار. 2016 جىلدىڭ 1 قاراشاسىنا عىلىمي زەرتتەۋلەرمەن اينالىساتىن قىزمەتكەرلەر سانى 5513 ادامدى قۇرادى, ولاردىڭ ىشىندە 1443 عىلىمي قىزمەتكەرلەر: 142 عىلىم دوكتورى, 389 عىلىم كانديداتى, 4 PhD دوكتورى جانە 246 ماگيستر. داستان كەنجالين, «ەگەمەن قازاقستان»