«ىبىرايدىڭ وسيەتى» ساحنالاندى

قوستاناي مەملەكەتتىك پەداگوگيكالىق ينستي­تۋتىنداعى ستۋدەنتتەر تەاترى اقىن, دراماتۋرگ اقىلبەك شاياحمەتتىڭ ۇلى اعارتۋشى ىبىراي التىنسارين تۋرالى «ىبىرايدىڭ وسيەتى» اتتى پەساسىن ساحنالادى. ستۋدەنتتەردىڭ قاي-قايسىسى دا وزىنە جۇكتەلگەن ءرولدى سەزىمتالدىقپەن ويناپ شىقتى. ىبىرايعا قازاق دالاسىندا مەكتەپ اشۋ عانا ەمەس, ساۋاتسىز ەلىنە ءبىلىمنىڭ ماڭىزىن ءتۇسىندىرۋ, ەكىنشى جاعىنان ميسسيونەرلەردىڭ ارام پيعىلىمەن ارپالىسا ءجۇرىپ, ونى ءوز حالقىنىڭ مۇددەسىنە پايدالانۋ دا وڭاي تيگەن جوق. –  ساحنادا التىنسارين تۇلعاسىن سومداۋ ماعان جەڭىل بولعان جوق. سەبەبى ىبىراي ءالتىنساريندى ەڭ ءبىرىنشى ويناۋعا نيەتتەنگەندە يسلام ءدىنىن ناقتى ۇستانعان ادام ءوزىنىڭ دىنىنە بەرىك ەكەندىگىن بىلەتىنمىن. قۇراننان كۇش-قۋات الاتىندىعىن سەزدىم. مەن دە وسى ءرولدى سومداۋ بارىسىندا ءوزىمدى سول بەتكە بۇرىپ, قۇران قادىرىن ءجىتى تۇسىنۋگە تىرىستىم. اسا تەرەڭ قايراتكەردىڭ كەيپىن سومداۋ ءۇشىن ونىڭ رۋحاني دەڭگەيىن ءتۇسىنۋ كەرەكتىگىن ۇقتىم, – دەيدى ىبىراي بابامىزدىڭ ءرولىن سومداعان جاراتىلىستانۋ-ماتەماتيكا فاكۋلتەتىنىڭ كا­سىپتىك وقىتۋ ماماندىعىنىڭ 3-كۋرس ستۋدەنتى دۋمان سايىن. اقىلبەك شاياحمەت ۇستازدىڭ سەرىگى اقىن نۇرجان ناۋشاباي ۇلىنىڭ ىبىرايعا دەگەن كىرشىكسىز ادال دوستىعىن بەينەلەگەن. ونىڭ ىبىرايعا مەكتەپ اشۋ بارىسىندا قارجىلىق جاعىنان دا دەمەۋشىلەر تابۋعا مول سەپتىگى تيگەندىگىن اڭعارۋعا بولادى. وسى باعا جەتپەس سىيلاستىقتى ساحنادا كورەرمەنگە جەتكىزە بىلگەن جاس ارتىستەردىڭ جەتەكشىسى اقبيداش ابدىركەنوۆانىڭ ەڭبەگى زور. ءنازيرا جارىمبەتوۆا, «ەگەمەن قازاقستان» قوستاناي